រដ្ឋមន្ត្រីក្រសួងការងារចូលបំភ្លឺសភាអំពីរឿងកម្មករ
រដ្ឋមន្ត្រីក្រសួងការងារលោកអ៊ិត សំហេង នៅថ្ងៃអង្គារទី១៤ តុលានេះបានដឹកនាំគណៈប្រតិភូក្រសួងចំនួន៧រូបទៅឆ្លើយបំភ្លឺនៅមុខគណៈទី៨រដ្ឋសភាជាតិដែលជាគណៈកម្មការការងារនិងបណ្តុះបណ្តាលវិជ្ជាជីវៈ ដែលដឹកនាំដោយគណបក្សសង្គ្រោះជាតិ។ មានប្រធានបទជាច្រើនក្នុងវិស័យកាត់ដេរត្រូវបានសាកសួរក្នុងរយៈពេលពីរម៉ោងរវាងប្រធានគណៈកម្មការទី៨របស់រដ្ឋសភានិងគណៈប្រតិភូចំនួន៧រូបរបស់ក្រសួងការងារ។
ចុះផ្សាយនៅថ្ងៃ៖
ស្តាប់ - ០២:៣៦
មានចំណុចសំខាន់ចំនួន៤ត្រូវបានសួរដេញដោលក្នុងការឆ្លើយបំភ្លឺរបស់រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ លោកអ៊ិត សំហេង នៅចំពោះមុខគណៈកម្មការទី៨របស់រដ្ឋសភាជាតិ។ ទី១ បញ្ហាប្រាក់ឈ្នួលគោលរបស់កម្មករកម្មការនីរោងចក្រដែលនៅចម្រូងចម្រាស់រវាងថៅកែរោងចក្រ និងកម្មករ ទី២ បញ្ហាប្រាក់អតីតភាពការងាររបស់កម្មកររោងចក្រហ៊ុយចៀន និងការទាមទាឱ្យតំណាងកម្មករចូលធ្វើការវិញ ទី៣ បញ្ហារំលោភសិទ្ធ និងការបណ្តេញចេញនៅក្រុមហ៊ុន CWKH និងទី៤គឺ បញ្ហាសិទ្ធសេរីភាពក្នុងការចុះបញ្ជីជាសហជីព និងសេរីភាពរបស់មេដឹកនាំសហជីពដែលកំពុងត្រូវបានគម្រាមពីតុលាការជាដើម។នេះបើតាមការបញ្ជាក់ពីលោកស្រីកែ សុវណ្ណរតន៍ ប្រធានគណៈកម្មការទី៨របស់រដ្ឋសភាដែលបានប្រាប់វិទ្យុបារាំង។
លោកស្រីបានបញ្ជាក់ថា លោកស្រីបានស្នើឱ្យក្រសួងពិនិត្យលទ្ធភាពវិសោធនកម្មមាត្រាទី១០៤ដែលបានចែងចេញពីប្រាក់គោលដែលមិនទានច្បាស់លាស់នៅឡើយ។
ឆ្លើយទៅកានកម្មកររោងចក្រហ៊ុយចៀនដែលកំពុងអង្គុយប្រមូលផ្តុំគ្នានៅក្រៅរបងសភា លោករដ្ឋមន្ត្រីបានសន្យាក្តែងៗថា ក្រសួងនឹងតម្រូវឱ្យរោងចក្រផ្តល់ប្រាក់អតីតភាពការងារដល់កម្មកររោងចក្រទាំងមូល និងការចូលធ្វើការវិញរបស់ថ្នាក់ដឹកនាំជាដើម។ បញ្ហាប្រាក់ខែគោលរបស់កម្មកវិញ លោករដ្ឋមន្ត្រីបានសន្យាព្យាយាមឱ្យអស់លទ្ធភាពដើម្បីស្វែងរកចំណុចទទួលយកបានទាំងភាគីរោងចក្រ និងសហជីព។
ក្រៅពីនេះ រដ្ឋាភិបាលនឹងបង្កើតយន្តការផ្តើមការចរចាចាប់ពីថ្ងៃទី២០តុលាខាងមុខ ដែលមានសមាសភាពគណៈកម្មការត្រីភាគី ៩-៩-។ ពោលគឺរដ្ឋាភិបាល៩ សហជីពសកម្មចំនួន៩ និងក្រុមថៅកែរោងចក្រចំនួន៩ដែរ។ យន្តការនេះនឹងចាប់ផ្តើមចរចាពីថ្ងៃទី២០ តុលាខាងមុខនេះតទៅ ដើម្បីស្វែងរកចំណុចរួមមុនពេលសម្រេចប្រាក់ខែគោលរបស់កម្មករសម្រាប់ឆ្នាំ២០១៥ ។
សូមបញ្ជាក់ថា រហូតមកដល់ពេលនេះ ជំហរប្រាក់ឈ្នួលគោលរវាងសមាគមរោងចក្រ និងកម្មករ បាននៅឆ្ងាយពីគ្នានៅឡើយ។ កម្មករទាមទារ១៥០ដុល្លារ ប៉ុន្តែសមាគមរោងចក្រគឺ១១០ដុល្លារ។ នេះបើតាមលោករដ្ឋមន្ត្រីបញ្ជាក់នៅព្រឹកថ្ងៃអង្គារនេះ។
ដោយឡែកបញ្ហាគម្រាមគំហែងសហជីពពីប្រព័ន្ធតុលាការនោះ លោករដ្ឋមន្ត្រី បានអះអាងនៅមុខសភាថា នឹងសម្របសម្រួលជាមួយក្រសួងយុត្តិធម៌ និងក្រុមថៅកែរោងចក្រដើម្បីអាចឈានទៅបិទបញ្ចប់បណ្តឹងដែលប្តឹងមកកាន់សហជីព។
យ៉ាងណាក៏ដោយទន្ទឹមនឹងការប្រកាសដោះស្រាយរបស់ក្រសួងការងារក្តែងៗ រដ្ឋភាបានសង្កត់ធ្ងន់ថា ការសន្យារបស់រដ្ឋាភិបាលជារឿងមួយ ប៉ុន្តែលទ្ធផលដែលទទួលយកបានមិនបាននោះគឺអាស្រ័យលើលទ្ធផល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ