រដ្ឋមន្ត្រីក្រសួងធម្មការនឹងត្រូវកោះហៅទៅបំភ្លឺរឿងពុទ្ធសាសនបណ្ឌិត
ព្រះសង្ឃ ប្រជាពលរដ្ឋ ដោយមានការចូលរួមពីសំណាក់និស្សិតផងនោះ នៅព្រឹកថ្ងៃសុក្របានដង្ហែរញត្តិតវ៉ាមួយទាក់ទងទៅនឹងការជួលទីតាំងដីពុទ្ធសាសនបណ្ឌិតទំហំ៣០០០ម៉ែត្រការ៉េទៅឲ្យក្រុមល្បែងណាហ្គាវើល។ នៅក្នុងញត្តិដែលមាន៥ចំណុច ថ្វាយព្រះមហាក្សត្រ និងប្រគល់ជូនគណៈកម្មការទី៧រដ្ឋសភា ព្រះសង្ឃនិងប្រជាពលរដ្ឋបានទទួចសុំអន្តរាគមន៍ពីស្ថាប័នកំពូលទាំងពីរជួយទប់ស្កាត់ការជួលឬលក់ពុទ្ធសាសនបណ្ឌិតទៅឲ្យឯកជន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៧
ព្រះសង្ឃនិងប្រជាពលរដ្ឋព្រមទាំងនិស្សិតផងនោះ មានគ្នាប្រមាណជាង២០០អង្គ/នាក់ បានរំសាយនៅវេលាថ្ងៃត្រង់ថ្ងៃសុក្រនេះ បន្ទាប់ពីមានការដាក់ញត្តិនៅព្រះបរមរាជវាំង និងរដ្ឋសភាជាតិ ទាមទារឲ្យមានការការពារពុទ្ធសាសនបណ្ឌិតដែលគេសង្ស័យថា បានជួលទៅឲ្យក្រុមហ៊ុនសណ្ឋាគារនិងកាស៊ីណូ ណាហ្គាវើល។
ក្បួនធម្មយាត្រាដឹកនាំដោយព្រះសង្ឃមកពីតាមបណ្តាខេត្តក្រុងដែលជាសមាជិករបស់ព្រះសង្ឃឯករាជ្យដើម្បីយុត្តិធម៌សង្គម និងប្រជាពលរដ្ឋ រួមទាំងសិស្ស និស្សិត បានដង្ហែរក្បួនចេញពីមុខវត្តឧណាឡោម នៅម៉ោង៨,៣០ ព្រឹក ឆ្ពោះទៅកាន់មុខព្រះបរមរាជវាំង ទីដែលអ្នកតវ៉ាត្រូវដាក់ញ្ញតិថ្វាយព្រះមហាក្សត្រ។
ទោះជាមានប៉ូលីសប្រឆាំងបាតុកម្មក្រាស់ក្រែលក៏ដោយ តែមិនមានការប៉ះទង្គិចគ្នាណាមួយកើតឡើងនោះទេ។បន្ទាប់មកក្រុមព្រះសង្ឃនិងអ្នកចូលរួមឯទៀតបានដង្ហែរញត្តិទៅកាន់រដ្ឋសភាដោយយកញត្តិទៅប្រគល់ជូនលោកយ៉ែម បុញ្ញឬិទ្ធិ ប្រធានគណកម្មការទី៧រដ្ឋសភា។
នៅក្នុងញត្តិដែលបានថ្វាយព្រះមហាក្សត្រ ក៏ដូចជាជូនទៅរដ្ឋសភាជាតិដែរដោយក្នុងនោះមាន ៥ចំណុច ក្រុមអ្នកតវ៉ាដែលដឹកនាំដោយព្រះសង្ឃបានសរសេរថា ការបំផ្លាញនិងរុះរើរបងនិងខ្លោងទ្វារពុទ្ធសាសនបណ្ឌិត ហើយនិងការជួលដីទំហំ៣០ម៉ែត្រនិង១០០ម៉ែត្រទៅឲ្យរដ្ឋនិងឯកជនជាទង្វើខុសច្បាប់ ព្រោះដីពុទ្ធសាសនបណ្ឌិតទាំងស្រុង ជាទ្រព្យសម្បត្តិរបស់ព្រះពុទ្ធសាសនា ដែលមិនអាចមានបុគ្គលណា ក្រុមហ៊ុនឯកជនណាឬរដ្ឋយកទៅប្រើប្រាស់ជាកម្មសិទ្ធិឯកជនបានឡើយ។
មិនមានអត្ថាធិប្បាយពីមន្ត្រីព្រះមរមរាជវាំងយ៉ាងណានៅឡើយទេ ក៏ប៉ុន្តែលោកយ៉ែម បុញ្ញរិទ្ធិប្រធានគណៈកម្មការទី៧នៃរដ្ឋសភាបានថ្លែងថា បន្ទាប់ពីបានទទួលញត្តិកាលពីព្រឹកមិញ គណៈកម្មការរបស់លោកនឹងកោះហៅលោកមិន ឃិន រដ្ឋមន្ត្រីក្រសួងធម្មការនិងសាសនាទៅឆ្លើយបំភ្លឺនៅចំពោះមុខគណៈកម្មការទី៧នៅថ្ងៃទី៩ ខែតុលា ឆ្នាំ២០១៤ ខាងមុខ។
សូមបញ្ជាក់ថាពុទ្ធសាសនបណ្ឌិតបច្ចុប្បន្នស្ថិតនៅក្រោមការគ្រប់គ្រងរបស់ក្រសួងធម្មការនិងសាសនា ត្រូវបានកសាងឡើងនៅឆ្នាំ១៩៣០ ដោយស្តេចស៊ីសុវត្ថិ មុនីវង្ស។ឆ្លងកាត់ជាច្រើនសម័យ ពុទ្ធសាសនបណ្ឌិតត្រូវបានថែរក្សាគង់វង្សមិនមានការខូចខាតបាត់បង់អ្វីឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ