ម៉ូស្គូអើពើនឹងលិខិតចំហរបស់ពលរដ្ឋរុស្ស៊ីដែលនៅជាប់ក្នុងគុកខ្មែរ
ក្រសួងការបរទេសរុស្ស៊ី ជាប្រតិកម្មនឹងលិខិតចំហរបស់សេដ្ឋីជាតិរុស្ស៊ី ឈ្មោះ Polonski ដែលនៅជាប់ឃុំឃាំងអស់ជិត១ខែហើយក្នុងពន្ធនាគារក្រុងព្រះសីហនុ ថ្ងៃទី២៨ មករាបានប្រកាសថា គ្រូពេទ្យស្ថានទូតរុស្ស៊ីនៅរាជធានីភ្នំពេញក្នុងពេលឆាប់ៗខាងមុខ នឹងទៅពិនិត្យមើលសុខភាពគាត់តែម្តង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៧
ក្នុងលិខិតចំហនោះដែលបង្ហើរតាមបណ្តាញសង្គម ថ្ងៃទី២៧ មករា ផ្ញើជូនលោករដ្ឋមន្ត្រីការបរទេសរុស្ស៊ី Serguei Lavrov សេដ្ឋីជាតិរុស្ស៊ីឈ្មោះ Polonski ដែលនៅជាប់ឃុំឃាំងអស់ជិត១ខែហើយ ក្នុងពន្ធនាគារក្រុងព្រះសីហនុចោទពួកអ្នកការទូតរុស្ស៊ីថា មិនព្រមជួយដោះលែងរូបគាត់ និងគ្នីគ្នាគាត់ជាតិរុស្ស៊ី២នាក់ទៀតឲ្យមានសេរីភាព។ ជនអភ័ព្វនោះត្អូញត្អែរថា ដោយជាប់ក្នុងការឃុំឃាំងតាំងពីថ្ងៃ៣១ ធ្នូមក សុខភាពគាត់ស្រុតចុះអាក្រក់ មែនទែន។ តាមរយៈលិខិតនោះ គាត់សុំក្រសួងការបរទេសរុស្ស៊ីឲ្យជួយវែកញែកបំភ្លឺបានឆាប់ឡើង អំពីស្ថានការណ៍ដែលកើតឡើងជុំវិញសំណុំរឿងគាត់ និងគ្នីគ្នាគាត់២នាក់ទៀត។
ក្រសួងការបរទេសរុស្ស៊ី ពីចំណែកខ្លួនជូនជាដំណឹងថា ពលរដ្ឋរុស្ស៊ីរូបណាក៏ដោយ ក្នុងករណីចាំបាច់សុទ្ធតែមានលទ្ធភាពទទួលជំនួយពេទ្យប្រកបដោយគុណភាព។ ស្ថានទូតរុស្ស៊ីនៅកម្ពុជាបន្តផ្តល់ការជួយជ្រោមជ្រែង តាមផ្លូវកុងស៊ុលដល់ពលរដ្ឋរុស្ស៊ី៣នាក់នោះដែលកំពុងជាប់ក្នុងការឃុំឃាំងនៅកម្ពុជា។ គួររំលឹកថា ជាតិរុស្ស៊ី៣នាក់នោះជាប់ចោទ តាមបទប្រើអំពើហិង្សាទៅលើពួកអ្នកដើរកប៉ាល់ជាតិខ្មែរ៦នាក់។ ស្ថានទូតរុស្ស៊ីនៅកម្ពុជាតែងទ្រទ្រង់ទំនាក់ទំនងជាប់ជានិច្ច ជាមួយអាជ្ញាធរកម្ពុជាសម្រាប់ធានាឲ្យមានការពិនិត្យមើលបានត្រឹមត្រូវជាសត្យានុម័តទៅលើសំណុំរឿងនោះ និងឲ្យមានការគោរពចំពោះសិទ្ធិស្របច្បាប់របស់ពលរដ្ឋរុស្ស៊ី។
ក្រសួងការបរទេសរុស្ស៊ីបញ្ចប់សេចក្តីថា ការទិតៀន និងការចោទប្រកាន់មកលើរដ្ឋអំណាចរុស្ស៊ីដែលមានលើកឡើងក្នុងលិខិតចំហនោះ ហើយដែលត្រូវលើកយកទៅផ្សព្វផ្សាយដោយមធ្យោបាយឃោសនាមហាជននៅរុស្ស៊ី គឺគ្មានអ្វីជាសំអាងឡើយ។
គួរនិយាយថា ក្នុងលិខិតចំហនោះ ពាណិជ្ជកររុស្ស៊ី Polonski អះអាងថា មានអ្នកខ្លះនៅម៉ូស្គូបានបង់លុយច្រើនសម្បើមទៅឲ្យភាគីកម្ពុជា ដើម្បីខ្ទប់រូបគាត់ឲ្យជាប់នៅក្នុងគុកខ្មែរសម្រាប់រយៈពេល ៣ឆ្នាំ ទាំងបន្ទាប់មក អាចពន្យារពេលជាប់នេះ តទៅទៀតផង ក្នុងគោលដៅបិទផ្លូវគាត់ឲ្យលែងមានលទ្ធភាពគ្រប់គ្រងលើ Business របស់គាត់នៅរុស្ស៊ី និងនៅតាមប្រទេសឯទៀត មាននៅកម្ពុជាជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ