ពាណិជ្ជកររុស្ស៊ី ឈ្មោះ Serguei Polonski នៅបន្តជាប់ឃុំឃាំងក្នុងពន្ធនាគារខ្មែរ
រឿងនេះត្រូវប្រព័ន្ធផ្សព្វផ្សាយរុស្ស៊ី លើកយកមកនិយាយជារឿយៗ អស់ជាង២សប្តាហ៏ហើយ តាំងពីថ្ងៃទី៣១ ធ្នូមក គឺតាំងពីពេលដែលរូបគាត់ និងជាតិរុស្ស៊ី ២នាក់ទៀតជាគ្នីគ្នាគាត់ ត្រូវបានអាជ្ញាធរខ្មែរចាប់ខ្លួន តាមបទប្រើអំពើហិង្សាលើនាវិកខ្មែរ ៦នាក់។ ជាតិរុស្ស៊ីទាំង៣នាក់នោះ នៅជាប់គឺក្នុងបន្ទប់ឃុំឃាំង នៃពន្ធនាគារក្រុងព្រះសីហនុ។
ចុះផ្សាយនៅថ្ងៃ៖
ស្តាប់ - ០២:៤៥
តាមអ្នកឆ្លើយឆ្លងនៃកាសែតក្រុងម៉ូស្គូ Kommersant ដែលថ្ងៃ១៧ មករា ម្សិលមិញ បានវត្តមានក្នុងអង្គសវនាកានៃតុលាការក្រុងព្រះសីហនុ យោងទៅលើការពន្យល់បំភ្លឺ នៃចៅក្រម តុលាការនេះគឹថា ស្របនឹងច្បាប់កម្ពុជា ដរាបណាដែលការស៊ើបអង្កេត ដោយតុលាការជុំវិញសំណុំរឿង មិនទាន់ចប់សព្វគ្រប់ទេ ទោះបីជនជាប់ចោទ ដាក់ប្រាក់ធានាក្តី ក៏ពួកគេមិនអាចត្រូវដោះលែង ឲ្យមានសេរីភាពឡើយ។ សម្រាប់តុលាការក្រុងព្រះសីហនុ គឺចាំបាច់ត្រូវតែពិនិត្យមើល តើស្របច្បាប់រឺទេ ការព្រមព្រៀងគ្នា រវាងភាគីដើមចោទ ដែលសុខចិត្តដកពាក្យបណ្តឹងទៅវិញ ជាថ្នូរនឹងប្រាក់សងជម្ងឺចិត្ត ពីខាងភាគី ដែលជាប់ចោទ។
តាមការផ្សាយឲ្យដឹង នៃមធ្យោបាយឃោសនាមហាជន នៅម៉ូស្គូ សំណុំរឿងដែលមាន គឺបណ្តាលមកពីឧប្បត្តិហេតុ ដែលកើតឡើងថ្ងៃ៣១ ធ្នូ នៅលើកាណូតកំសាន្ត ដែលបើកចេញពីកោះមួយ ទៅកាន់ឆ្នេរក្រុងព្រះសីហនុ។ ពេលជិះនោះ ជាតិរុស្ស៊ីទាំងបីនាក់ បានបាញ់កាំជ្រួច ដើម្បីអបអរការចូលឆ្នាំថ្មី ឆ្នាំសាកល ២០១៣ ហើយតបនឹងការរិះគន់ពីខាងក្រុមអ្នកបើកបរជាតិខ្មែរ ដែលមានគ្នា៦នាក់ ថៅកែរុស្ស៊ីឈ្មោះ Serguei Polonski បានប្រើកាំបិតកំញើញ ហើយថែមទាំងបង្ខំនាវិកខ្មែរទាំងនោះ ឲ្យចូលទៅក្នុងបន្ទប់លើកាណូត រួចចាក់សោគេ ហើយបន្ទាប់មក បញ្ជាឲ្យគេទាំងនោះ លោតទៅក្នុងទឹកសមុទ្រទៅផង។
លុះក្រោយពីមានអន្តរាគមន៍ពីខាងយោធាខ្មែរ ជាតិរុស្ស៊ីទាំងបីនាក់ ក៏ត្រូវបានចាប់ខ្លួន ហើយពេលចាប់នោះ ពួកគេថែមទាំងគ្មានក្រដាសស្នាមអ្វីណា សម្គាល់ខ្លួនឡើយ។
តាមដែលទូរទស្សន៍រដ្ឋរុស្ស៊ី ផ្សាយកាលពីប៉ុន្មានថ្ងៃមុន ប្រាក់សងជម្ងឺចិត្តនោះ គឺក្នុងទំហំ ២០.០០០ដុល្លារអាមេរិក សម្រាប់នាវិកខ្មែរទាំង៦នាក់។ ប៉ុន្តែតាមកាសែតរុស្ស៊ី Kommersant លេខថ្ងៃនេះ សម្រាប់នាវិកខ្មែរម្នាក់ៗ ដែលរងគ្រោះនោះ គឺតែ ១.០០០ដុល្លារប៉ុណ្ណោះ។
យោងទៅលើសំដី លោកតាន់ សារេត អនុរក្សពន្ធនាគារក្រុងព្រះសីហនុ ទីភ្នាក់ងារព័ត៌មានរុស្ស៊ី RIA Novosty ផ្សាយថា ជាតិរុស្ស៊ីបីនាក់នោះ ជាប់ក្នុងបន្ទប់ដែលមានផ្ទៃក្រឡា ៩ម៉ែត្រការ៉េ គឺ៣ម៉ែត្រ គុណនឹង៣ម៉ែត្រ ដោយរួមជាមួយជាតិខ្មែរ ២នាក់ទៀត ហើយពីក្នុងនោះម្នាក់ ជាប់តាមបទជួញគ្រឿងញៀន ដែលបានទទួលសេចក្តីអនុញ្ញាត ឲ្យសាច់ញាតិខ្លួន យកទូរទស្សន៍មួយគ្រឿង ទៅដាក់ក្នុងបន្ទប់ឃុំឃាំងនោះ ដើម្បីកែអផ្សុកទៅផង។
ប៉ុន្មានថ្ងៃមុន ពាណិជ្ជកររុស្ស៊ី ឈ្មោះ Serguei Polonski អាយុ ៤០ឆ្នាំ ថែមទាំងបានដាក់ពាក្យថ្វាយព្រះមហាក្សត្រខ្មែរ សុំចូលសញ្ជាតិជាពលរដ្ឋ នៃរាជាណាចក្រកម្ពុជាទៅផង ក្រោមលេសថា ដើម្បីពង្រីក Business របស់គាត់នៅកម្ពុជា ដូចជាសង់សណ្ឋាគារផ្កាយ៧ជាដើម។ ខុទ្ទកាល័យរាជវាំង បានបញ្ជាក់ថា មានទទួលពាក្យសុំចូលសញ្ជាតិបែបនេះមែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ