ក្រសួងបរិស្ថានរៀបចំវេទិកាជាតិស្តីពីការប្រែប្រួលអាកាសធាតុ
ក្រសួងបរិស្ថាននឹងរៀបចំវេទិការថ្នាក់ជាតិលើកទី៣ ស្តីពីការប្រែប្រួលអាកាសធាតុ រយៈពេល៣ថ្ងៃចាប់ពីថ្ងៃទី៥ដល់ថ្ងៃទី៧វិច្ឆិកា។ ជាវេទិកាដែលត្រូវរៀបចំរៀងរាល់២ឆ្នាំម្តង។ វេទិកាស្តីពីការប្រែប្រួលអាកាសធាតុឆ្នាំនេះនឹងត្រូវប្រព្រឹត្តិទៅក្រោមប្រធានបទ «ធ្វើសកម្មភាពឆ្ពោះទៅរកការអភិវឌ្ឍដោយចីរភាពក្នុងបរិបទនៃការប្រែប្រួលអាកាសធាតុ»។ រដ្ឋមន្ត្រីក្រសួងបរិស្ថាន លោក សាយ សំអាល់បានថ្លែងអោយដឹងថា ក្នុងរយៈពេល២ឆ្នាំចុងក្រោយនេះ ទឹកប្រាក់ប្រមាណ២៥០លានដុល្លារ ត្រូវបានប្រើប្រាស់ដើម្បីអនុវត្តគម្រោងទប់ទល់ការប្រែប្រួលអាកាសធាតុ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៥
វេទិកាថ្នាក់ជាតិលើកទី៣ស្តីអំពី ការប្រែប្រួលអាកាសធាតុនឹងត្រូវរៀបចំធ្វើពីថ្ងៃទី៥ដល់ថ្ងៃទី៧វិច្ឆិកានេះក្រោមប្រធានបទ «ធ្វើសកម្មភាពឆ្ពោះទៅរកការអភិវឌ្ឍដោយចីរភាពក្នុងបរិបទនៃការប្រែប្រួលអាកាសធាតុ»។ លោកនាយករដ្ឋមន្ត្រីហ៊ុន សែននឹងត្រូវចូលរួមបើកវេទិកាដែលនឹងត្រូវរៀបចំធ្វើនៅវិមានសន្តិភាព។
រដ្ឋមន្ត្រីក្រសួងបរិស្ថាន លោកសាយ សំអាល់បានថ្លែងប្រាប់អ្នកសារព័ត៌មានថា នៅក្នុងវេទិកាជាតិស្តីពីការប្រែប្រួលអាកាសធាតុនេះ រដ្ឋាភិបាលនឹងប្រកាសដាក់ឱ្យប្រើប្រាស់ផែនការយុទ្ធសាស្រ្តឆ្លើយតបនឹងការប្រែប្រួលអាកាសធាតុកម្ពុជា ដែលនឹងក្លាយជាឯកសារផែនការយោងពិស្តារមួយ សម្រាប់វិធានការរបស់កម្ពុជាទៅថ្ងៃអនាគតដើម្បីឆ្លើយតបនឹងការប្រែប្រួលអាកាសធាតុ។ ជាផែនការដែលលោករដ្ឋមន្ត្រីក្រសួងបរិស្ថានជឿជាក់ថា វានឹងអាចទប់ទល់នឹងផលវិបាកទាំងឡាយដែលកើតចេញពីការប្រែប្រួលអាកាសធាតុ។
ទឹកជំនន់ គ្រោះរាំងស្ងួត និងខ្យល់ព្យុះ ត្រូវបានចាត់ទុកថាជាផលវិបាកនៃការប្រែប្រួលអាកាសធាតុ ដែលនឹងរាំងស្ទះដល់ការអភិវឌ្ឍន៍របស់ប្រទេសនៅក្នុងពិភពលោក ពិសេសប្រទេសកំពុងអភិវឌ្ឍន៍ដូចជាកម្ពុជា។
ចំពោះលោករដ្ឋមន្ត្រីក្រសួងបរិស្ថាន កម្ពុជាងាយរងគ្រោះពីផលប៉ះពាល់នឹងការប្រែប្រួលអាកាសធាតុ ក៏ដោយសារតែ សេដ្ឋកិច្ចរបស់ប្រទេសនេះពឹងផ្អែកលើកសិកម្ម ដោយសារភាពទន់ខ្សោយនៃហេដ្ឋារចនាសម្ព័ន្ធនានា ទាំងធនធានមនុស្ស និងហិរញ្ញវត្ថុ និងខ្វះបចេ្ចកទេសសមស្របសម្រាប់ដោះស្រាយបញ្ហាប្រែប្រួលអាកាសធាតុ។
នៅក្នុងបទសម្ភាសន៍មួយជាអ្នកកាសែត នៅមុនការមកដល់នៃវេទិកាជាតិស្តីពីការប្រែប្រួលអាកាសធាតុនេះ លោករដ្ឋមន្ត្រី សាយ សំអាល់ ដែលជាប្រធានគណៈកម្មាធិការជាតិគ្រប់គ្រងការប្រែប្រួលអាកាសធាតុ បានរៀបរាប់អំពីវិធានការជាច្រើនរបស់រដ្ឋាភិបាលកម្ពុជាក្នុងការងារទប់ទល់នឹងការប្រែប្រួលអាកាសធាតុនេះ ជាពិសេសវិធានការនៃការកាត់បន្ថយឧស្ម័នផ្ទះកញ្ចក់។ បើតាមលោករដ្ឋមន្ត្រីដដែល ក្នុងរយៈពេល២ឆ្នាំចុងក្រោយនេះ ថវិកាប្រមាណ២៥០លានដុល្លារ ត្រូវបានកៀងគរសម្រាប់គាំទ្រគម្រោងមួយចំនួនដូចជា សម្ព័ន្ធភាពប្រែប្រួលអាកាសធាតុកម្ពុជា កម្មវិធីយុទ្ធសាស្ត្រសម្រាប់ភាពធន់ទ្រាំនឹងអាកាសធាតុជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ