ចលនាយុវជនទាមទារឲ្យរដ្ឋាភិបាលបញ្ឈប់សកម្មភាពកាប់បំផ្លាញព្រៃឈើ
នៅថ្ងៃទី៥ មិថុនានេះ ដែលជាទិវាបរិស្ថានពិភពលោក មានអង្គការ-សមាគមកម្ពុជាយ៉ាងតិច ចំនួន៥ និងសកម្មជនដែលស្រឡាញ់បរិស្ថាន ប្រមាណជិត ៣០០នាក់ បានជួបជុំគ្នានៅមុខរដ្ឋសភា ដើម្បីប្រារព្ធទិវាបរិស្ថានពិភពលោកលើកទី៤១ ក្រោមប្រធានបទ “ព្រៃឈើយើង បរិស្ថានយើង”។ គោលបំណងនៃការប្រារព្ធទិវាបរិស្ថានរបស់អង្គការ និងសមាគមកម្ពុជា នៅថ្ងៃនេះ គឺដើម្បីស្នើឲ្យរដ្ឋាភិបាលចាត់វិធានការការពារបរិស្ថា ននិងត្រួតពិនិត្យទៅលើក្រុមហ៊ុនដីសម្បទាន សេដ្ឋកិច្ចដែលកំពុងប្រតិបត្តិការ នៅកម្ពុជា ហើយកំពុងតែកាប់បំផ្លាញព្រៃឈើយ៉ាងច្រើនក្រោមរូបភាពដីសម្បទានសេដ្ឋកិច្ច ឬសម្បទានរ៉ែនោះ។
ចុះផ្សាយនៅថ្ងៃ៖
ស្តាប់ - ០២:១៤
តាំងពីម៉ោង៧ កន្លះព្រឹក នៅថ្ងៃពុធនេះ ក្រុមសកម្មជនស្រឡាញ់បរិស្ថានប្រហែល ៣០០នាក់ ដែលមកពីអង្គការសង្គមស៊ីវិល និងសមាគមចំនួន៥ បានមកប្រមូលផ្តុំគ្នា នៅមុខព្រះបរមរាជវាំង ក្នុងគោលបំណងដើរដង្ហែរក្បួននាំញត្តិឆ្ពោះមកកាន់មន្ទីររដ្ឋសភាជាតិ ប៉ុន្តែការជួបជុំនេះត្រូវបានរារំាងដោយក្រុមសមត្ថកិច្ចនគរបាលរាជធានីភ្នំពេញ ក្រោមហេតុផលថា ធ្វើឲ្យប៉ះពាល់សណ្តាប់ធ្នាប់មុខព្រះបរមរាជវាំង។
ទោះយ៉ាងណា ក្រុមអ្នកបរិស្ថានទាំងអស់នោះ បានព្យាយាមប្រមូលផ្តុំគ្នា នៅមុខមន្ទីររដ្ឋសភាវិញ នៅពេលបន្ទាប់ ដោយមិនមានការប៉ះទង្គិចជាមួយនឹងក្រុមសមត្ថកិច្ចនោះឡើយ ដើម្បីដាក់ញត្តិជូនសមាជិក សភា ក្នុងគោលបំណងជំរុញរដ្ឋាភិបាលជួយការពារបរិស្ថានព្រៃឈើ នៅកម្ពុជា។ នេះបើយោងតាមលោក វន ពៅ ប្រធានសមាគមប្រជាធិបតេយ្យឯករាជសេដ្ឋកិច្ចក្រៅប្រព័ន្ធ ដែលរៀបចំការដឹកនាំពិធីជាមួយនឹងអង្គការមួយចំនួនទៀតនោះ។
យោងតាមញតិដែលសកម្មជនបរិស្ថាន ដាក់ជូនរដ្ឋសភា បានសរសេរឲ្យដឹងថា ការជួបជុំរបស់សកម្មជនបរិស្ថាន ដែលភាគច្រើនជាយុវជន គឺដើម្បីបង្ហាញពីសេចក្តីព្រួយបារម្ភរបស់ខ្លួន ចំពោះវិនាសកម្មព្រៃឈើដែលកំពុងកើតមានទ្បើង នៅប្រទេសកម្ពុជា នាប៉ុន្មានឆ្នាំចុងក្រោយនេះ ហើយកំពុង តែធ្វើឲ្យប៉ះពាល់ដល់បរិស្ថានយ៉ាងធ្ងន់ធ្ងរ។
ញត្តិដដែល ក៏បានទាមទារឲ្យរដ្ឋាភិបាលចាត់វិធានការការពារបរិស្ថាន និងត្រួតពិនិត្យទៅលើក្រុមហ៊ុនដីសម្បទាន សេដ្ឋកិច្ចដែលកំពុងប្រតិបត្តិការណ៍ នៅកម្ពុជា ហើយក៏បានជំរុញផងដែរ ឲ្យរដ្ឋាភិបាលបញ្ឈប់ការផ្តល់ដីសម្បទានសេដ្ឋកិច្ច សម្បទានរ៉ែ ចំពោះក្រុមហ៊ុនណាដែលមិនមានការវាយតម្លៃផលប៉ះពាល់បរិស្ថានឲ្យបានត្រឹមត្រូវ និងមិនបានគោរពច្បាប់របស់ប្រទេសកម្ពុជា។
របាយការណ៍នៃសមាគមអាដហុក ផ្សាយក្នុងខែកុម្ភៈ ឆ្នាំ២០១៣នេះ បានបង្ហាញថា ដីសម្បទានជាង ៣០កន្លែង ដែលមានទំហំជាង ២០៨ ៨០៥ហិកតាត្រូវបានផ្តល់ទៅឲ្យក្រុមហ៊ុនឯកជន។
ប៉ុន្តែលោកចាន់ សារុន រដ្ឋមន្រ្តីកសិកម្ម និងរុក្ខាប្រមាញ់ ដែលបានថ្លែងនៅក្នុងរដ្ឋសភា កាលពីខែឧសភា កន្លងទៅនេះ ក្នុងពេលពិភាក្សាច្បាប់ស្តីពីសហគមន៍កសិកម្មបានអះអាងថា គិតមកត្រឹមពេលនេះមានក្រុមហ៊ុន៦៣ ហើយដែលត្រូវបានដកហូតដីសម្បទានសេដ្ឋកិច្ច។ហើយរដ្ឋាភិបាលបានសម្រេចផ្អាកការផ្តល់ដីសម្បទានសេដ្ឋកិច្ចដល់ក្រុមហ៊ុនឯកជនចាប់តាំងពីខែឧសភាឆ្នាំ២០១២មកម្ល៉េះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ