មន្ត្រីកម្ពុជាកំពុងសាកសួរជនជាតិម៉ុងតាញ៉ាទាំង១៣នាក់
ជនភៀសខ្លួនម៉ុងតាញ៉ាទាំង១៣នាក់ដែលកំពុងស្នាក់នៅកម្ពុជា នៅពេលនេះត្រូវបាននាយកដ្ឋានជំនាញជនភៀសខ្លួននៃក្រសួងមហាផ្ទៃកំពុងបន្តការសាកសួរបន្ទាប់ពីពួកគេមកដល់ទីក្រុងភ្នំពេញ។ ការសាកសួរនេះគឺដើម្បីឈានទៅដល់ការវាយតម្លៃផ្តល់ឋានៈជាជនភៀសខ្លួនស្របច្បាប់ពីរដ្ឋាភិបាលកម្ពុជា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៧
ប្រធាននាយកដ្ឋានជនភៀសខ្លួនក្រសួងមហាផ្ទែ បានឱ្យដឹងថាមន្ត្រីជំនាញបានចាប់ផ្តើមសាកសួរ និងស្រាវជ្រាវសាវដានៃជនភៀសខ្លួនម៉ុងតាញ៉ាទាំង១៣ជាជំហ៊ានបឋមហើយ។ ជាការស្រាវជ្រាវដើម្បីវាយតម្លៃលើលក្ខខ័ន្តិកៈនៃការទទួលបានសិទ្ធជនភៀសខ្លួនពីកម្ពុជាស្របច្បាប់ ហើយការសាកសួរនេះគឺធ្វើឡើងជាក្រុមតែម្តង។ លោកបន្តថា នៅពេលនេះអាជ្ញាធរមិនអាចកំណត់លំអិត និងវាយតម្លៃជនភៀសខ្លួនពីវៀតណាមទាំងនេះព្រោះថារដ្ឋាភិបាលកម្ពុជាយ៉ាងហោចណាស់ត្រូវការពេលវេលាប្រមាណ៩០ថ្ងៃក្រោយការទទួលបានពាក្យសុំសិទ្ធជនភៀសខ្លួន ទើបអាចផ្តល់ចម្លើយបាន។ ហើយនិតិវិធីនេះ គឺធ្វើឡើងតាមអនុក្រិត្យ ២២៤ របស់រដ្ឋាភិបាល ស្តីពីនីតិវិធី ក្នុងការពិនិត្យ និងទទួលស្គាល់ឋានៈជនភៀសខ្លួនឬសិទ្ធិជ្រកកោនដល់ជនបរទេសនៅក្នុង ព្រះរាជាណាចក្រកម្ពុជា។ នេះបើតាមលោក កែម សារិទ្ធដដែល។
សូមរំលឹកថា កាលពីចុងសប្តាហ៍មុន ជនជាតិភ្នំម៉ុងតាញ៉ាក្នុងទឹកដីវៀតណាមចំនួន១៣នាក់ដែលរួមមានស្ត្រីម្នាក់ផង បានមកជួបជាមួយមន្ត្រីអង្គការសហប្រជាជាតិទទួលបន្ទុកសិទ្ធមនុស្សដើម្បីសុំសិទ្ធជ្រកកោណស្របច្បាប់បន្ទាប់ពីពួនសំងំលាក់ខ្លួនក្នុងព្រៃខេត្តរតនៈគីរីរបស់កម្ពុជាដើម្បីគេចវេសពីការធ្វើទុកបុក្ខម្នេញផ្នែកសាសនាពីរដ្ឋាភិបាលវៀតណាម។ អ្នកនាំពាក្យក្រសួងមហាផ្ទៃ លោក ខៀវ សុភ័គបានបញ្ជាក់ថា ជនជាតិភ្នំម៉ុងតាញ៉ានៅប្រទេសវៀតណាមចំនួន១៣នាក់បច្ចុប្បន្នកំពុងស្នាក់ទីតាំងឯកជនមួយនៅទីក្រុងភ្នំពេញដើម្បីបន្តនិតិវិធីផ្លូវច្បាប់ជាមួយមន្ត្រីជំនាញ។
នៅឆ្នាំ១៩៥១ កម្ពុជាបានក្លាយជាភាគីហត្ថលេខីនៃអនុសញ្ញាស្តីពីជនភៀសខ្លួន និងពិធីសារឆ្នាំ១៩៦៧ ស្តីពីឋានៈជនភៀសខ្លួន ហើយកម្ពុជាមានអនុក្រិត្យ២២៤ ដែលតម្រូវឱ្យកម្ពុជាមិនអាចបណ្តេញចេញពីជនភៀសខ្លួនណាដែលទទួលទុកបុក្ខម្នេញខាងផ្លូវនយោបាយ ឬដោយសារជាប់និន្នាការក្រុមប្រឆាំងពីប្រទេសដែលខ្លួនរស់នៅដើមនោះទេ។ ដូចនេះកម្ពុជាត្រូវផ្តល់ការស្នាក់អាស្រ័យបណ្តោះអាសន្នដល់ជនទាំងឡាយណាដែលបានដាក់ពាក្យសុំសិទ្ធជ្រកកោណ ឬសុំសិទ្ធជាជនភៀសខ្លួនស្របច្បាប់។
ប្រធាននាយកដ្ឋានជនអន្តោប្រវេសន៍ក្រសួងមហាផ្ទៃលោក កែម សារិទ្ធ បានបញ្ជាក់ថា កម្ពុជានឹងសម្រេចផ្តល់ឋានៈជាជនភៀសខ្លួនដល់ជនជាតិម៉ុងតាញ៉ាទាំងនោះប្រសិនបើពួកគេអាចផ្តល់ព័ត៌មានតាមលក្ខខ័ណ្ឌកំណត់ដែលមានចែងក្នុងច្បាប់របស់កម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ