ចូលឆ្នាំខ្មែរ៖ពលរដ្ឋសម្រុកទៅលេងខេត្តសៀមរាបច្រើនជាងខេត្តទេសចរណ៍ផ្សេងៗ
ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ រយៈពេល ៤ថ្ងៃ នៅឆ្នាំ ២០១៦នេះ ប្រជាពលរដ្ឋកម្ពុជា បានសម្រុកទៅទស្សនាកម្សាន្ត នៅក្នុងខេត្តសៀមរាប ច្រើនជាងនៅតាមបណ្តាខេត្តទេសចរណ៍ដទៃទៀត។ នេះបើតាមការឲ្យដឹងពីក្រុមការងារវិស័យទេសចរណ៍ផ្នែកឯកជន។ យ៉ាងណាក៏ដោយ ខេត្តព្រះសីហនុ មណ្ឌលគិរី រតនគិរី ស្ទឹងត្រែង និងក្រចេះ ដែលស្ថិតនៅភាគឦសាននៃប្រទេស ក៏ជាគោលដៅទេសចរណ៍របស់ពលរដ្ឋកម្ពុជា នាឱកាសនេះផងដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៥
ព្រឹត្តិការណ៍អង្គរសង្ក្រាន្ត បានអូសទាញពលរដ្ឋខ្មែរក្នុងស្រុកជាច្រើននាក់ ឲ្យធ្វើដំណើរទៅកាន់ខេត្តសៀមរាប។ នេះជាការលើកឡើងរបស់លោកហូ វណ្ឌី សហប្រធានក្រុមការងារវិស័យទេសចរណ៍ផ្នែកឯកជន។ ទោះបីជាពេលនេះ គេមិនទាន់អាចបង្ហាញតួលេខនៃចំនួនអ្នកទេសចរ ទៅកាន់តំបន់ប្រវត្តិសាស្ត្រទេសចរណ៍មួយនេះក៏ដោយ ប៉ុន្តែតាមការសង្កេតលោកហូ វណ្ឌី ទទួលស្គាល់ថា ពិតជាមានពលរដ្ឋជាច្រើន ជាពិសេសគឺប្រជាជនក្នុងរាជធានីភ្នំពេញ បានសម្រុកចេញទៅកាន់ខេត្តសៀមរាបជាបន្តបន្ទាប់ ដើម្បីរីករាយជាមួយព្រឹត្តិការណ៍អង្គរសង្រ្កាន្ត អបអរឆ្នាំថ្មី ប្រពៃណីជាតិខ្មែរ។
ក្នុងបទសម្ភាសន៍ជាមួយវិទ្យុបារាំងអន្តរជាតិ នាពេលកន្លងមក អភិបាលខេត្តសៀមរាប លោកឃឹម ប៊ុនសុង បានបង្ហាញក្តីរំពឹងថា ខេត្តសៀមរាប នឹងទទួលបានអ្នកទេសចរ ប្រមាណជាង ១លាននាក់ ក្នុងឱកាសបុណ្យចូលឆ្នាំខ្មែរ នារយៈពេល ៤ថ្ងៃនេះ។ លោកអភិបាលខេត្ត បញ្ជាក់ថា អ្នកទេសចរ ដែលទៅចូលរួមក្នុងព្រឹត្តិការណ៍អង្គរសង្ក្រាន្ត ភាគច្រើនជាពលរដ្ឋខ្មែរ ដែលមកពីតាមបណ្តាខេត្តផ្សេងៗ ហើយភ្ញៀវទេសចរបរទេស គឺមានចំនួនត្រឹមតែតិចតួចប៉ុណ្ណោះ ដោយសារឱកាសនេះ គឺជាពេលវេលាឈប់សម្រាករបស់ពលរដ្ឋខ្មែរប្រចាំឆ្នាំ។
យ៉ាងណាក៏ដោយ លោកហូ វណ្ឌី បានបន្ថែមថា ក្រៅពីខេត្តសៀមរាប ពលរដ្ឋខ្មែរ បានចាប់អារម្មណ៍ចំណាយពេលសម្រាកលំហែកាយ នាឱកាសបុណ្យចូលឆ្នាំខ្មែរ នៅខេត្តព្រះសីហនុ និងខេត្តនៅតំបន់ភូមិភាគឦសាន រួមមានមណ្ឌលគិរី រតនគិរី ស្ទឹងត្រែង និងខេត្តក្រចេះ។ ហើយជាពិសេស អ្នកដែលរស់នៅរាជធានីភ្នំពេញភាគច្រើន បានចាកចេញពីទីក្រុងក្នុងពេលនេះ ដែលជាហេតុធ្វើឲ្យរាជធានីស្ងប់ស្ងាត់ជាងថ្ងៃធម្មតា។
លើសពីដំណើរកម្សាន្តក្នុងស្រុក សហប្រធានក្រុមការងារវិស័យទេសចរណ៍ផ្នែកឯកជនរូបនេះ បានឲ្យដឹងថា ក៏មានពលរដ្ឋមួយចំនួនទៀត បានចេញដំណើរទៅក្រៅប្រទេស ដើម្បីបំពេញដំណើរកម្សាន្តផងដែរ។ ពួកគេ បានទិញកញ្ចប់ដំណើរពេញមួយសប្តាហ៍ ដោយសារពិធីបុណ្យចូលឆ្នាំនៅឆ្នាំនេះ ភ្ជាប់គ្នាជាមួយនឹងថ្ងៃចុងសប្តាហ៍។
តាមលោកហូ វណ្ឌី ជារៀងរាល់ឆ្នាំ ក្នុងឱកាសបុណ្យជាតិធំៗ រួមមានពិធីបុណ្យចូលឆ្នាំខ្មែរ ពិធីបុណ្យចម្រើនព្រះជន្មព្រះមហាក្សត្រ បុណ្យភ្ជុំបិណ្ឌ និងបុណ្យអ៊ុំទូកជាដើម ពលរដ្ឋខ្មែរ ដែលធ្វើដំណើរកម្សាន្តក្នុងស្រុក មានប្រមាណពី ៨លានទៅ ១០លាននាក់ ខណៈពលរដ្ឋខ្មែរ ដែលធ្វើដំណើរកម្សាន្តទៅក្រៅប្រទេស មានប្រមាណត្រឹមតែពី ៨០ម៉ឺន ទៅ១លាននាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ