សាលាឧទ្ធរណ៍សម្រេចសំណើនៅក្រៅឃុំនៅថ្ងៃអង្គារ ១៨ មករា
ជនជាតិថៃ៥នាក់ដែលសាលាដំបូងរាជធានីភ្នំពេញបដិសេធការស្នើសុំនៅក្រៅឃុំបណ្តោះអាសន្ន កាលពីសប្តាហ៍មុននោះ នឹងត្រូវបង្ហាញខ្លួនជាសាធារណៈសាជាថ្មី នៅសាលាឧទ្ធរណ៍ នៅព្រឹកថ្ងៃអង្គារស្អែក ដើម្បីស្តាប់ការសម្រេចរបស់តុលាការឧទ្ធរណ៍។ កាលពីថ្ងៃទី១៣មករា តុលាការរាជធានីភ្នំពេញបានសម្រេចដោះលែងអោយនៅក្រៅឃុំបណ្តោះអាសន្នតាមការស្នើសុំរបស់មេធាវី នូវជនជាតិថៃតែ២នាក់ប៉ុណ្ណោះ គឺសមាជិកសភា និងស្ត្រីជនជាតិថៃម្នាក់ទៀត។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់លាង ដឺលុចពីទីក្រុងភ្នំពេញ
នៅព្រឹកថ្ងៃអង្គារទី១៨មករាស្អែកនេះ ចៅក្រមសាលាឧទ្ធរណ៍នឹងប្រកាសសម្រេចអនុញ្ញាត ឬមិនអនុញ្ញាតអោយជនជាតិថៃ៥នាក់នៅក្រៅឃុំបណ្តោះអាសន្ន តាមបណ្តឹងរបស់មេធាវីរបស់ពួកគេ។ មេធាវីដែលបានប្តឹងជំទាស់ការសម្រេចរបស់តុលាការរាជធានីភ្នំពេញ ដែលបានសម្រេចដោះលែងជនជាតិថៃតែ២នាក់អោយនៅក្រៅឃុំបណ្តោះអាសន្ន ហើយបានបដិសេធចំពោះជនជាតិថៃ៥នាក់ផ្សេងទៀត។
លោកជួន ស៊ុនឡេង ចៅក្រមសាលាឧទ្ធរណ៍ដែលកាន់សំណុំរឿងនេះបានអះអាងប្រាប់វិទ្យុបារាំងអន្តរជាតិថា ជនជាតិថៃទាំង៥នាក់នឹងត្រូវនាំមកក្នុងសាលសវនាការនៃសាលាឧទ្ធរណ៍នៅព្រឹកថ្ងៃអង្គារដើម្បីស្តាប់ការសម្រេចរបស់ចៅក្រម។ ការសម្រេចដែលមិនត្រឹមតែជនជាប់ចោទទាំង៥ទេដែលរង់ចាំ ប៉ុន្តែគឺរដ្ឋាភិបាលថៃផងដែរ។
ក្រោយពីការចាប់ខ្លួនជនជាតិថៃ៧នាក់ដែលរួមមានសមាជិកសភាថៃមួយរូប និងក្រុមសមាជិកអាវលឿងកាលពីថ្ងៃទី២៩ធ្នូ ក្រោមបទចោទប្រកាន់អំពីការឆ្លងដែនខុសច្បាប់ចូលទឹកដីកម្ពុជា ប្រមុខការទូតថៃបានមកដល់ទីក្រុងភ្នំពេញភ្លាមដើម្បីជួបជាមួយរដ្ឋមន្ត្រីការបរទេសកម្ពុជា។ ប្រមុខការទូតថៃលោកកាស៊ីត ភិរម្យ ក្រោយពីបានឃើញខ្សែវីដេអូគ្លីបដែលបង្ហាញថា ជនជាតិថៃទាំង៧នាក់បានដើរចូលក្នុងទឹកដីកម្ពុជាមែននោះ បានថ្លែងប្រាប់អ្នកសារព័ត៌មានថា លោកគោរពការអនុវត្តច្បាប់របស់កម្ពុជា ហើយលោកបានស្នើអោយតុលាការពន្លឿននីតិវិធី។
មេដឹកនាំរដ្ឋាភិបាលកម្ពុជាក៏បានថ្លែងសារនយោបាយជាបន្តបន្ទាប់ ប្រាប់ទៅរដ្ឋាភិបាលថៃ ខ្លួនមិនលូកដៃចូលក្នុងឯករាជភាពរបស់តុលាការទេ។
យោងតាមការផ្សព្វផ្សាយរបស់បណ្តាញសារព័ត៌មានថៃនៅថ្ងៃនេះ នាយករដ្ឋមន្ត្រីថៃលោកអាភីស៊ីត វេចាជីវ៉ាបានថ្លែងថា លោកមានជំហរសុទិដ្ឋិនិយមថា ជនជាតិថៃទាំង៥នាក់នឹងត្រូវដោះលែងអោយនៅក្រៅឃុំបណ្តោះអាសន្ននៅព្រឹកថ្ងៃអង្គារស្អែកនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ