សញ្ញាណទីផ្សារពាណិជ្ជកម្មនៃសតវត្សទី២១
ចុះផ្សាយនៅថ្ងៃ៖
ស្តាប់ - ០៤:១៦
ទីផ្សារនាពេលបច្ចុប្បន្នលែងកំរិតតែលើសកម្មភាពពាណិជ្ជកម្មតាមអគារ ឬតាមទីផ្សារទំនើបធំៗដែលពោរពេញទៅដោយហាងលក់ទំនិញស្អេកស្កះទៀតហើយ។ ក្នុងសតវត្សទី២១ ពិសេសក្នុងមួយទសវត្សចុងក្រោយនេះ សញ្ញាណនៃទីផ្សារ បានពង្រីកន័យរបស់ខ្លួនដើម្បីគ្របដណ្តប់លើតំបន់ថ្មីនៃការផ្សព្វផ្សាយនិងធ្វើប្រតិបត្តិការ ពាណិជ្ជកម្ម ពោលគឺវិបសាយ និងបណ្តាញសង្គម។
បន្ទាប់ពីការលក់ទំនិញក្នុងតម្លៃពិសេស នារដូវកាលបុណ្យណូអែលបានបញ្ចប់ទៅនៅថ្ងៃទី២៤ធ្នូ ទិវានៃការលក់ទំនិញបញ្ចុះតម្លៃក្រោយថ្ងៃបុណ្យនេះ ឲ្យឈ្មោះថា Boxing Day បានចូលមកដល់និងធ្វើឡើងនៅទី២៦ធ្នូ។ តែ នៅសហរដ្ឋអាមេរិកនិងកាណាដា គេមិនចាំបាច់ចាំរហូតដល់ថ្ងៃទី២៦ធ្នូដើម្បីដឹង ពីតំលៃនិងអាចបញ្ជាទិញទំនិញ ឬសេវាកម្មបញ្ចុះតម្លៃនៅថ្ងៃ Boxing Day នោះទេ ព្រោះក្រុមហ៊ុននានាដូចជាក្រុមហ៊ុនលក់គ្រឿងអេឡិចត្រូនិក មាន Bestbuy និង Futurshop ជាដើម បានធ្វើយុទ្ធនាការផ្សព្វផ្សាយពាណិជ្ជកម្មស្វែងរកអតិថិជនតាម អ៊ីនធ័រនែតតាំងពីពេលល្ងាចទី២៤ធ្នូម្លេះ បើទោះជាហាងនឹងបិទទ្វារនៅថ្ងៃទី២៥ និងបើកឡើងវិញនៅថ្ងៃទី២៦រសៀល ក៏ដោយ។
វិបសាយ និងបណ្តាញសង្គម បានក្លាយជាទីតាំងសំរាប់ការធ្វើពាណិជ្ជកម្មដែលក្រុមហ៊ុនសហគ្រាសនានាមិនអាច មើលរំលង។ ទាំងនេះមិនមែនបានសេចក្តីថា ដោយសារតែ Google និង Facebook មានវត្តមានលើបណ្តាញ អ៊ីនធ័រនែតដល់ទៅ ៣៥%នោះទេ តែគឺដោយសារតែភាពចាំបាច់នៃក្រុមហ៊ុននិមួយៗក្នុងការស្វែរកអតិថិជនរបស់ ខ្លួន នៅទីកន្លែងដែលពួកគេឋិតនៅ។
បើតាមអ្នកជំនាញខាងទីផ្សារលើវិបសាយនិងបណ្តាញសង្គម បានឲ្យដឹងថា៩៤%នៃប្រតិបត្តិការទិញលក់នៅតាម ហាងឬនៅតាមផ្សារនានា សុទ្ធតែជាប្រតិបត្តិការដែលធ្វើបន្ទាប់ពីអតិថិជនបានស្វែងយល់ពីពត៌មានចាំបាច់នៅ តាមវិបសាយ និងបណ្តាញសង្គមនានា លើផលិតផលឬសេវាកម្មទាំងនោះ។ ឧទាហរណ៍ជាក់ស្តែងគឺករណីនៃការស្វែងរកសេវាកម្មសណ្ឋាគារ ភោជនីយដ្ឋាន គ្រឿងអេឡិចត្រូនិក ក៏ដូចជាសេវាកម្មនិងផលិតផលជាច្រើនផ្សេង ទៀតផងដែរ។
ក្នុងបរិបទនៃការធ្វើពាណិជ្ជកម្មសម័យថ្មីនេះ ប្រសិនបើក្រុមហុ៊នសហគ្រាសណាមួយដែលមិនមានវត្តមាន លើ បណ្តាញអ៊ីនធ័រនែតតាមរយៈវិបសាយ និង បណ្តាញសង្គមនោះទេ ក្រុមហុ៊នសហគ្រាសនោះនឹងអាចដើរចាញ់គេ យ៉ាងឆ្ងាយប្រៀបទៅនឹងក្រុមហ៊ុនដ៏ទៃដែលប្រើមធ្យោបាយនេះ។
លោក Christian Dumont អ្នកជំនាញទីផ្សារសញ្ជាតិកាណាដាបានមានប្រសាន៍ថា សម័យឥឡូវមិនមែន ការផ្គត់ផ្គង់របស់ក្រុមហ៊ុនសហគ្រាសនោះទេ ដែលជាអ្នកគ្រប់គ្រងទីផ្សារ តែគឺតម្រូវការរបស់អតិថិជននៅលើ ទីផ្សារទៅវិញទេដែលមានអំណាចលើទីផ្សារ។ ក្រុមហ៊ុនសហគ្រាសនានាមិនមានជំរើសអ្វីក្រៅតែពីសម្របខ្លួន ទៅតាមរបៀបថ្មីនៃការធ្វើពាណិជ្ជកម្មនេះប៉ុណ្ណោះ។
ក្នុងយុទ្ធសាស្រ្តថ្មីនៃការផ្សព្វផ្សាយពាណិជ្ជកម្ម លោកបានកំនត់ធាតុសំខាន់ចំនួនបួនដែលគេត្រូវយកចិត្តទុកដាក់៖ ទីមួយគឺទីតាំាងធុរកិច្ច (ឬទីកន្លែងធ្វើអាជីវកម្ម) ទីពីរគឺទូរស័ព្ទ ទីបីគឺវិបសាយ និងទីបួនជាការវិវឌ្ឍន៍ចុងក្រោយ គឺបណ្តាញសង្គម។
ការធ្វើទីផ្សារតាមបែបប្រពៃណីនៅតែមានតម្លៃតែគេត្រូវមានការផ្លាស់ផ្តូរនូវចក្ខុវិស័យ។ ឧទាហរណ៍ដូចជា ការផ្សាយពាណិជ្ជកម្មតាមរយៈប័ណ្ណបញ្ចុះតម្លៃ ឬសារពត៌មានកាស្សែតលើក្រដាស់ ក្នុងករណីដែលមានកំហុស ត្រង់តម្លៃឬទំនិញ គេអាចកែប្រែដោយបោះពុម្ពកែតម្រូវនៅថ្ងែបន្ទាប់ប៉ុណ្ណោះ ប៉ុន្តែចំពោះកំហុស ឬភាពមិនប្រក្រតី លើបណ្តាញតាមវិបសាយ និងបណ្តាញសង្គមវិញ គេអាចកែប្រែបានភ្លាមៗតែម្តង។
ម៉្យាទៀត ការមកដល់នូវ Netflix និងក្រុមហ៊ុនផ្សព្វផ្សាយតាមអ៊ីនធ័រនែតនានាដូចជា Youtube ជាដើម ក៏ចូលរួម ក្នុងការកែប្រែ របៀបនៃការផ្សព្វផ្សាយពាណិជ្ជកម្មតាមវិទ្យុនិងទូរទស្សន៍ផងដែរ។ ព្រោះអតិថិជនឬអ្នកប្រើប្រាស់ សម័យថ្មី លែងរងចាំមើលការផ្សាយពត៌មាន ឬខ្សែភាពយន្ត ដែលខ្លួនចូលចិត្ត ទៅតាមពេលនិង ម៉ោងបញ្ចាំង ទៀតហើយ ព្រោះគេអាចបញ្ជាឲ្យម៉ាសីុនថតចំលងទុកសំរាប់មើលនៅពេលដែលខ្លួនទំនេរ និងតាមចំណង់។
ដូចនេះហើយការបង្កើតវិបសាយរបស់ក្រុមហ៊ុន ដែលអាចឲ្យគេចូលមើលនិងទិញទំនិញឬជាវសេវាកម្ម២៤ម៉ោង លើ២៤ម៉ោង បានក្លាយជាវិធានការចំាបាច់បឋមបំផុតក្នុងការធ្វើពាណិជ្ជកម្មក្នុងបរិបទថ្មីនេះ មុននឹងឈានដល់ ការបង្កើតវិធានការជាយុទ្ធសាស្រ្ត ស្វែងរក និងទាក់ទាញ អតិថិជនតាមរយៈការបង្កើតឃ្លីបពាណិជ្ជកម្មដើម្បីផ្សព្វ ផ្សាយតាមប្រព័ន្ធផ្សព្វផ្សាយសង្គមដូចជា Facebook, Youtube ជាដើម ព្រមទាំងបណ្តាញសង្គមទាំងឡាយណា ដែលអតិថិជនសក្តានុពល មានវត្តមានផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ