តើប្រធានថ្មីរបស់ក្រុមប្រឹក្សាអឺរ៉ុបខុសពីប្រធានចាស់យ៉ាងដូចម្តេចខ្លះ?
ចុះផ្សាយនៅថ្ងៃ៖
ស្តាប់ - ០៣:២០
ប្រធានថ្មីរបស់ក្រុមប្រឹក្សាអឺរ៉ុបបានចូលកាន់តំណែងជាផ្លូវការ កាលពីថ្ងៃចន្ទ ទី១ធ្នូ នៅទីក្រុងព្រុចស៊ែល ប្រទេសបែលហ្សិក បន្ទាប់ពីសភាអឺរ៉ុបបានបោះឆ្នោត ជ្រើសរើស កាលពីខែសីហា។ លោក ដូណាល់ ទូស្ក អតីតនាយករដ្ឋមន្រ្តីប៉ូឡូញ ត្រូវចូលជំនួសលោកអ៊ែកម៉ាន់ វ៉ាន់រ៉ុមពុយ ដែលកាន់តំណែងជាប្រធានក្រុមប្រឹក្សាអឺរ៉ុប អស់រយៈពេល ៥ឆ្នាំ។ នេះជាលើកទីមួយ និងជាប្រវត្តិសាស្រ្ត ដែលប្រទេសមកពីអឺរ៉ុបខាងកើត ដូចជាប៉ូឡូញបានចូលកាន់តំណែងជាន់ខ្ពស់ នៅក្នុងសហភាពអឺរ៉ុប។
តំាងពីចូលកាន់តំណែងជាប្រធានក្រុមប្រឹក្សាអឺរ៉ុបថ្មី លោកដូណាល់ ទូស្ក បានបង្ហាញជំហរនយោបាយការទូតខុសគ្នា ដាច់ស្រឡះ ពីប្រធានចាស់។ ខុសពីលោក អ៊ែកម៉ាន់ វ៉ាន់រ៉ុមពុយ ដែលនិយមប្រើនយោបាយសម្របសម្រួលរវាងប្រទេសសមាជិក ជាពិសេសរវាងបារាំង និងអាល្លឺម៉ង់នោះ លោកប្រធានក្រុមប្រឹក្សាអឺរ៉ុបថ្មីមិនខ្លាចនឹងបញ្ចេញគំនិត យោបល់ ឬជំហរផ្ទាល់ខ្លួននោះទេ។ នេះបើតាមការសង្កេតរបស់មន្រ្តីទូតអឺរ៉ុប។
ខុសពីលោកប្រធានចាស់ ជនជាតិបែលហ្ស៊ិក ដែលមិនបានលាយច្របល់បញ្ហាជាតិ ចូលជាមួយបញ្ហាអឺរ៉ុប លោកប្រមុខដឹកនាំអឺរ៉ុបថ្មីបានបង្ហាញយ៉ាងច្បាស់ ដោយគ្មានសង្ស័យពីជំហររបស់លោក ក្នុងនាមជាអ្នកនាំពាក្យ អ្នកនាំផលប្រយោជន៍ឲ្យប៉ូឡូញ និងបណ្តាអឺរ៉ុបខាងកើត ដែលរហូតមកដល់ពេលនេះ ត្រូវគេផាត់ ទុកចោលមិនផ្តល់តម្លៃ នៅក្នុងរង្វង់សហភាពអឺរ៉ុប។
គេអាចនិយាយបានថា លោក ដូណាល់ ទូស្ក អាចប្រើតំណែងប្រធានប្រឹក្សាអឺរ៉ុបដើម្បីលើកនិយាយពីកង្វល់ផ្ទាល់របស់ប៉ូឡូញ ជុំវិញ ព្រឹត្តិការណ៍ដែលកំពុងកើតមាននៅភាគខាងកើតអ៊ុយក្រែន។ ជាក់ស្តែង គ្រាន់តែចូលកាន់កាប់ការិយាល័យរបស់ខ្លួនភ្លាម បានប៉ុន្មានម៉ោង ប្រធានក្រុមប្រឹក្សាអឺរ៉ុបថ្មីបានទូរស័ព្ទទៅប្រធានាធិបតីអាមេរិក លោកបារ៉ាក់ អូបាម៉ាភ្លាម។ ប្រមុខដឹកនាំកំពូលទាំងពីរបានបង្ហើរសាររួមគ្នា ទាមទារឲ្យរុស្ស៊ីដកទ័ពចេញពីទឹកដីអ៊ុយក្រែន។ ប្រធានក្រុមប្រឹក្សាអឺរ៉ុបថ្មី បានអំពាវនាវផងដែរឲ្យរុស្ស៊ីឈប់ផ្តល់អាវុធ ដល់ពួកឧទ្ទាម ទាមទារផ្តាច់ទឹកដីនៅអ៊ុយក្រែន និងបើកផ្លូវឲ្យអ្នកសង្កេតការណ៍របស់អង្គការដើម្បីសន្តិសុខ និងសហប្រតិបត្តិការអឺរ៉ុបOSCEបានចូលទៅធ្វើការដោយសុវត្ថិភាព។
ជំហរម៉ឺងម៉ាត់របស់លោក ដូណាល់ ទូស្ក ចំពោះវិមានក្រេមឡាំង មិនមែនជារឿងថ្មីទេ។ តាំងពីនៅជានាយករដ្ឋមន្រ្តីប៉ូឡូញម្ល៉េះ លោក ដូណាល់ ទូស្ក តែងតែទទូចឲ្យសហភាពអឺរ៉ុបដាក់ទណ្ឌកម្មសេដ្ឋកិច្ចទៅលើរុស្ស៊ី នៅពេលដែលប្រធានក្រុមប្រឹក្សាអឺរ៉ុបចាស់ និងមេដឹកនាំប្រទេសអឺរ៉ុបដទៃទៀត មិនសូវជាតឹងរ៉ឹង ចង់ដាក់ទណ្ឌកម្ម ទៅលើរុស្ស៊ី។
ហេតុអ្វីបានប៉ូឡូញរករឿងរុស្ស៊ី នៅពេលដែលរុស្ស៊ីកំពុងបញ្ហា នៅប្រទេសអ៊ុយក្រែនឯណោះសោះនោះ?
តាមលោកអតីតនាយករដ្ឋមន្រ្តីប៉ូឡូញ គេនឹងដឹងពីអារម្មណ៍របស់ប្រជាជនប៉ូឡូញ ប្រសិនបើគេមានផ្ទះ នៅជាប់នឹងឃ្លាំងស្តុកគ្រាប់បែកនុយក្លេអ៊ែរ ដែលរុស្ស៊ីប្រមូលផ្តុំនៅកាលីនីនក្រាត ក្បែរទឹកដីប៉ូឡូញ។ បន្ទាប់ពីរុស្ស៊ីកាត់ទឹកដីគ្រីមេរបស់អ៊ុយក្រែន និងការបញ្ជូនយន្តហោះចម្បាំង ហោះឆ្វែលចូលដែនអាកាសអឺរ៉ុប ប៉ូឡូញ ដែលស្ថិតនៅមិនឆ្ងាយប៉ុន្មានពីរុស្ស៊ី បានមើលឃើញកាន់តែច្បាស់ ការគំរាមកំហែងរបស់រុស្ស៊ី សម្រាប់អនាគតដែនដីរបស់ខ្លួន។
ក្រៅតែពីជំរុញឲ្យដោះស្រាយវិបត្តិអ៊ុយក្រែន ដែលជាសំណុំរឿងចំបង លោកប្រធានក្រុមប្រឹក្សាអឺរ៉ុបថ្មីត្រូវបានគេមើលឃើញជាមេដឹកនាំដែលមានមហិច្ឆតាសេដ្ឋកិច្ច។ លោក ដូណាល់ ទូស្ក បានទទួលតំណែងប្រធានក្រុមប្រឹក្សាអឺរ៉ុប ដោយមកពីលោកមានស្នាដៃ រក្សាកំណើនសេដ្ឋកិច្ចប៉ូឡូញ នៅក្នុងពេលប្រទេសអឺរ៉ុបផ្សេងទៀត កំពុងជួបវិបត្តិសេដ្ឋកិច្ច។
នៅក្នុងបេសកកម្មរបស់ខ្លួន ជាអ្នកកាច់ចង្កូតអឺរ៉ុប លោកអតីតនាយករដ្ឋមន្រ្តីប៉ូឡូញរូបនេះ ចង់ផ្តល់សន្ទុះ ជំរុញកំណើនសេដ្ឋកិច្ចអឺរ៉ុប។ នៅក្នុងកិច្ចសន្ទនាតាមទូរស័ព្ទ ជាមួយលោកប្រធានាធិបតីអាមេរិក កាលពីថ្ងៃចន្ទ លោក ដូណាល់ ទូស្ក បាននិយាយផងដែរពីសន្ធិសញ្ញា អន្តរអាត្លង់ទិក រវាងអឺរ៉ុប និងអាមេរិក ដែលពេលនេះ កំពុងស្ថិតនៅក្នុងដំណាក់កាលចរចានៅឡើយ។ សម្រាប់ប្រធានក្រុមប្រឹក្សាអឺរ៉ុប សហប្រតិបត្តិការសេដ្ឋកិច្ចជាមួយអាមេរិក មិនត្រឹមជំរុញសេដ្ឋកិច្ចអឺរ៉ុប ប៉ុន្តែ វាជាភូមិសាស្រ្តយុទ្ធសាស្រ្ត មួយដ៏សំខាន់សម្រាប់អនាគតអឺរ៉ុប ដែលពេល បច្ចុប្បន្ននេះ មាននយោបាយ និងសេដ្ឋកិច្ច លុបបាំងជិតដោយប្រទេសទើបមានសេដ្ឋកិច្ចរីកលូតលាស់ថ្មី។
នៅក្នុងកិច្ចប្រជុំក្រុមប្រឹក្សាអឺរ៉ុប ដែលត្រូវធ្វើ នៅថ្ងៃ ទី ១៨ និង ទី ១៩ធ្នូខាងមុខ ប្រធានក្រុមប្រឹក្សាអឺរ៉ុបប្រុងនឹងធ្វើការដើម្បីទាមទារការគាំទ្រពីសំណាក់មេដឹកនាំប្រទេសអឺរ៉ុបទាំង២៨សម្រាប់ជំរុញការវិនិយោគ ដែលលោកJean Claude Juncker ប្រធានគណៈកម្មការអឺរ៉ុបបានស្នើឡើង។ នៅក្នុងកម្មវិធីរបស់ខ្លួន ប្រធានក្រុមប្រឹក្សាអឺរ៉ុបថ្មី គ្រោងផងដែរ នឹងជំរុញការធ្វើកំណែទម្រង់រចនាសម្ព័ន្ធ នៅក្នុងសហភាពអឺរ៉ុបទាំងមូល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ