កម្ពុជាដាក់ចេញនូវប្រកាសថ្មីដើម្បីការពារសិទ្ធ អ្នកធ្វើការងារខាងផ្នែកសេវាកម្សាន្ត
បន្ទាប់ពីមានបញ្ហាប្រឈមជាច្រើន សម្រាប់កម្មករនិយោជិតផ្នែកសេវាកម្សាន្តមក ក្រសួងការងារ និងបណ្តុះបណ្តាលវិជ្ជាជីវៈ នៅថ្ងៃទីពុធ ទី ៨ តុលានេះ បានដាក់ចេញនូវប្រកាសលេខ ១៩៤ ជាផ្លូវការ ដើម្បីការពារដល់សិទ្ធិកម្មករទាំងអស់ដែលបម្រើការងារនៅក្នុងផ្នែកនេះ។ កម្មករផ្នែកកម្សាន្តទាំងអស់ នឹងទទួលបានច្បាប់ការពារសិទ្ធរបស់ខ្លួនជាផ្លូវការ ដូចកម្មករនិយោជិតផ្សេងៗទៀតដែរ។
ចុះផ្សាយនៅថ្ងៃ៖
ស្តាប់ - ០២:១០
ប្រកាសលេខ ១៩៤ ស្តីពី លក្ខខណ្ឌការងារ វិធានការអនាម័យ និងសន្តិសុខការងារ នៃសហគ្រាស គ្រឹះស្ថាន ក្រុមហ៊ុនផ្នែកសេវាកម្សាន្តត្រូវបានប្រកាសឲ្យប្រើជាផ្លូវការនៅថ្ងៃពុធទី០៨តុលានេះដោយលោក អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ នៅឯទីស្តីការក្រសួង។ ប្រកាសនេះ អំពាវនាវឲ្យមានការការពារសុខភាព និងសុវត្ថិភាពការងារ ក៏ដូចជាសិទ្ធិការងារ របស់កម្មករនិយោជិតផ្នែកសេវាកម្សាន្តដែរ។
វិធានការនេះ ត្រូវបានដាក់ចេញដើម្បីឆ្លើយតប ទៅនិងបញ្ហាប្រឈមជាច្រើន ដែលកម្មករនិយោជិតផ្នែកសេវាកម្សាន្តជួបប្រទះ ដូចជា សុវត្ថិភាពការងារ ការអប់រំ និងការការពារសុខភាពនៅមានកម្រិតទាប អំពើហិង្សា និងការបៀតបៀនផ្លូវភេទ ចំនួនម៉ោងធ្វើការច្រើនលើសលុប និងការទទួលបានប្រាក់បៀវត្សរ៍ទាប និងការត្រូវបានគេបង្ខំឲ្យទទួលទានជាតិស្រវឹងជាដើម។ មិនត្រឹមតែប៉ុណ្ណោះប្រកាសថ្មីនេះ នឹងអំពាវនាវឲ្យលុបបំបាត់ពលកម្ម ដោយបង្ខំ និងការរំលោភបំពានពាក់ព័ន្ធនានា នៅក្នុងឧស្សាហកម្មនេះ ដូចជាការដាក់ពិន័យ ការកាត់ប្រាក់ឈ្នួល និងការបង្ខំឲ្យយកកូនចេញជាដើម។
លោកស្រី ចាន់ ឌីណា តំណាងបណ្តាញកម្មករនិយោជិតផ្នែកសេវាកម្សាន្តនៅថ្នាក់ជាតិ បានលើកឡើងថា ទីបំផុត រដ្ឋាភិបាលបានទទួលស្គាល់កម្មករនិយោជិតផ្នែកសេវាកម្សាន្តថា ជាកម្មករនិយោជិតដូចគេដូចឯង ហើយពួកគេគួរទទួលបានការពារ ក្រោមច្បាប់ស្តីពីការងារដែរ។ លោកស្រីបានបន្ថែមទៀតថា ម្ចាស់គ្រឹះស្ថាន ផ្នែកសេវាកម្សាន្ត មានភារកិច្ចមើលថែកម្មករនិយោជិតរបស់ខ្លួន និងទប់ស្កាត់មិនឲ្យមានបញ្ហាធំៗកើតមានឡើងដូចជា អំពើហិង្សា និងការរំលោភបំពានផ្លូវភេទជាដើម។
សូមបញ្ជាក់ថា រហូតមកទល់នឹងបច្ចុប្បន្ននេះ មណ្ឌលកម្សាន្តសម្រាប់មនុស្សពេញវ័យ ដែលរួមមានរង្គសាល ខារ៉ាអូខេ ឌីស្គូក្លឹបជាដើមនោះ មានចំនួន ៦៥៩ កន្លែង ហើយក្នុងនោះមាន៤៨០កន្លែង បានចុះបញ្ជីការត្រឹមត្រូវ។ ដោយឡែកបុគ្គលិកដែលបម្រើការងារនៅក្នុងផ្នែកនេះ គឺមានជាង ១ម៉ឺននាក់។ នេះបើតាមការបញ្ជាក់របស់លោករដ្ឋមន្ត្រីក្រសួងទេសចរណ៍ ថោង ខុន នៅក្នុងពិធីដាក់ចេញនូវប្រកាសថ្មី ១៩៤ នៅព្រឹកមិញនេះ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ