ភាពតានតឹងបានផ្ទុះជាថ្មីរវាងទាហានឥណ្ឌា និងប៉ាគីស្ថាននៅតំបន់ Cachemire
នៅថ្ងៃចន្ទ ទី១២ សីហា ប្រទេសប៉ាគីស្ថានបានចោទទាហានឥណ្ឌាថា បានបើកការបាញ់រះលើតំបន់ Cachemire ខាងភាគីប៉ាគីស្ថាន ដោយបណ្តាលឲ្យមានស្លាប់ជនស៊ីវិលម្នាក់ នេះបើយោងតាមអ្នកទទួលខុសត្រូវប៉ាគីស្ថាន។ ឧប្បវហេតុថ្មីនេះបានកើតមានឡើង បន្ទាប់ពីឥណ្ឌាបានទម្លាក់កំហុសលើប៉ាគីស្ថានពីការស្លាប់ទាហានឥណ្ឌា ៥នាក់កាលពីសប្តាហ៍មុននៅតាមបណ្តោយព្រំដែនរវាងប្រទេសគូសត្រូវទំាងពីរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៩
យោងតាមអ្នកទទួលខុសត្រូវយោធាប៉ាគីស្ថានដែលមិនព្រមបញ្ចេញឈ្មោះ ការបាញ់រះរបស់ទាហានឥណ្ឌាបានកើតមានឡើងនៅតាមខ្សែបន្ទាត់ព្រំដែនដែលខ័ណ្ឌចែកតំបន់ជម្លោះ Cachemire។ រូបអ្នកទទួលខុសត្រូវយោធាប៉ាគីស្ថានដដែលក៏បានបញ្ជាក់ថា ទាហានប៉ាគីស្ថានក៏បានបាញ់តបវិញដែរ តែមិនបានបញ្ជាក់ថា តើមានស្លាប់មនុស្សនៅខាងឥណ្ឌា ឬអត់ទេ។
យ៉ាងណាក៏ដោយ នៅក្រោយព្រឹត្តិការណ៍នោះ ក្រសួងការបរទេសប៉ាគីស្ថានបានកោះហៅលោកអនុឧត្តមស្នងការដ្ឋានឥណ្ឌាប្រចំាក្រុងអ៊ីស្លាម៉ាបាតឲ្យចូលជួប ដើម្បីសម្តែងពីការបន្តរំលោភបំពានលើបទឈប់បាញ់ពីសំណាក់ទាហានឥណ្ឌា។ ចំណែកអ្នកទទួលខុសត្រូវនៅតំបន់ Cachemire ខាងប៉ាគីស្ថានបានរៀបចំក្បួនបាតុកម្មមួយមានគ្នាប្រមាណជា ៤០០នាក់នៅពីមុខការិយាល័យអង្គការសហប្រជាជាតិក្នុងតំបន់ Cachemire។
គួរជម្រាបជូនថា បច្ចុប្បន្ន បេសកកម្មរបស់អង្គការសហប្រជាជាតិនៅតំបន់ Cachemire មានគ្នា ៣៨នាក់ដែលមានតួនាទីឃ្លំាមើលការឈប់បាញ់រវាងទាហានប៉ាគីស្ថាន និងឥណ្ឌានៅតំបន់ Cachemire។ តំាងពីបានទទួលឯករាជ្យរៀងៗខ្លួនក្នុងឆ្នំា ១៩៤៧ មក គូសត្រូវទំាងពីរបានផ្ទុះសង្រ្គាមនឹងគ្នាចំនួន ៣លើកមកហើយ និងដែល ២លើកមានជាប់ពាកព័ន្ធនឹងតំបន់ Cachemire ដែលភាគីនីមួយៗដណ្តើមគ្នាកាន់កាប់ផ្តាច់មុខ។ តំបន់ Cachemire ដែលបទឈប់បាញ់បានត្រូវចូលជាធរមានតំាងពីឆ្នំា ២០០៣ និងស្ថិតក្រោមការឃ្លំាមើលរបស់អង្គការសហប្រជាជាតិ។
ចំណែកកិច្ចចរចាសន្តិភាពរវាងគ្នាក៏បានចាប់ផ្តើមជាថ្មីក្នុងឆ្នំា ២០១១ ពោលគឺ ៣ឆ្នំា ក្រោយអំពើភេរវកម្មក្នុងទីក្រុងប៊ុមបៃដែលបណ្តាលឲ្យមានមនុស្សស្លាប់ ១៦៦នាក់។ យ៉ាងណាក៏ដោយ ភាពតានតឹងជាថ្មីនៅតំបន់ Cachemire ពេលនេះបានកើតមានឡើង ចំពេលដែលលោកនាយករដ្ឋមន្រ្តីថ្មីប៉ាគីស្ថាន Nawaz Sharif បានចាត់ទុកការបង្កើនទំនាក់ទំនងល្អជាមួយឥណ្ឌា ជាអាទិភាពរបស់លោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ