ក្រុមអ្នកជំនាញផ្តើមស្រាវជ្រាវជំងឺឆ្លងនៅកម្ពុជានិងបណ្តាប្រទេសក្នុងតំបន់
កម្ពុជា និង បណ្តាប្រទេស ក្នុងតំបន់អាស៊ីអាគ្នេយ៍បានចាប់ផ្តើមសិក្សាស្រាវជ្រាវទៅលើជំងឺឆ្លងនានា និងមេរោគបង្កជំងឺផ្សេងៗ ដូចជាមេរោគជំងឺគ្រុនឈាម ជំងឺគ្រុនផ្តាសាយធំ ភាពស៊ាំរបស់បាក់តេរី និងជំងឺគ្រុនផ្តាសាយបក្សី ដែលកំពុងតែកើតមាននៅកម្ពុជា និងបណ្តាប្រទេសក្នុងតំបន់។ ការសិក្សានេះ ត្រូវបានធ្វើឡើងបន្ទាប់ពីសន្និសីទស្តីពី« ជំងឺឆ្លងក្នុងតំបន់អាស៊ីអាគ្នេយ៍» ដែលបើកធ្វើ ចាប់ពីថ្ងៃទី ១១ ដល់ ១២ មីនា នៅទីក្រុងភ្នំពេញ ត្រូវបានបញ្ចប់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៥
ក្រុមអ្នកវិទ្យាសាស្ត្រខាងវេជ្ជសាស្ត្របានផ្តើមសិក្សាស្រាវជ្រាវអំពីជំងឺឆ្លងនៅកម្ពុជា និងក្នុងតំបន់។ ការស្រាវជ្រាវនេះបានធ្វើឡើង បន្ទាប់ពីគេបានរកឃើញថា កម្ពុជានិងបណ្តាប្រទេសនៅក្នុងតំបន់អាស៊ីអាគ្នេយ៍ គឺជាតំបន់ដែលងាយទទួលរងផលប៉ះពាល់ពីជំងឺឆ្លង ដែលមានពីសត្វ ទៅមនុស្ស។ ការរកឃើញនេះត្រូវបានបង្ហាញ នៅក្នុងសន្និសីទ ស្តីពី «ជំងឺឆ្លងក្នុង តំបន់អាស៊ីអាគ្នេយ៍» ដែលបានបើកធ្វើនៅសណ្ឋាគារឡឺរ៉ូយ៉ាល់ ក្នុងរាជធានីភ្នំពេញ កាលពីថ្ងៃទី ១១ និង ទី ១២ មីនាកន្លងទៅនេះ។
លោក លី សុវណ្ណ អនុប្រធាននាយកដ្ឋានប្រយុទ្ធនឹងជំងឺឆ្លងនៃក្រសួងសុខាភិបាល បានឲ្យដឹងថា សន្និសីទនេះ បានផ្តល់សារៈសំខាន់យ៉ាងច្រើនដល់ប្រទេសកម្ពុជា ដើម្បីសិក្សា និងបានផ្តល់ចំណេះដឹងថ្មីៗ នៅក្នុងការសិក្សាស្រាវជ្រាវរកវិធានការថ្មី ដើម្បីទប់ស្កាត់ការរីករាលដាល នៃមេរោគថ្មីៗ នាពេលបច្ចុប្បន្ននេះ។
លោកបានបញ្ជាក់ថា ជាក់ស្តែងដូចជាករណីគ្រុនផ្តាសាយបក្សីនៅកម្ពុជានៅពេលថ្មីៗនេះ ដែលបានកើតមានរហូតដល់ទៅ ៨ ករណីក្នុងដើមឆ្នាំ ២០១៤។ ចំនួននេះ មានការកើនឡើង បើប្រៀបធៀបនឹងឆ្នាំមុន ប៉ុន្តែចំនួនអ្នកស្លាប់មានការថយចុះ ដោយសារតែ ក្រសួងសុខាភិបាលបានធ្វើការពិនិត្យតាមដាន ការវិវឌ្ឍន៍របស់មេរោគនេះ ហើយធ្វើការទប់ស្តាត់បានទាន់ពេលវេលា។
សូមបញ្ជាក់ថា ក្រុមអ្នកវិទ្យាសាស្ត្រសុខាភិបាលជាច្រើនមកពីប្រទេសបារាំង និងពីប្រទេសក្នុងតំបន់បានមកជួបជុំគ្នា រយៈពេលពីរថ្ងៃ នៅភ្នំពេញដើម្បីពិភាក្សាអំពីបញ្ហាជំងឺឆ្លង។ ជំនួបជាអន្តរជាតិនេះ ជាឱកាសដែលពួកគេបានជជែកផ្លាស់ប្តូរយោបល់គ្នាអំពីជំងឺឆ្លង និងបានឈានដល់ការស្រាវជ្រាវអំពីជំងឺឆ្លងនៅកម្ពុជា។
ទន្ទឹមនឹងនោះ កម្ពុជាក៏បានដាក់សម្ពោធឲ្យដំណើរការអគារពិសោធន៍ស្រាវជ្រាវថ្នាក់តំបន់អាស៊ី នៅវិទ្យាស្ថានប៉ាស្ទ័រផងដែរ កាលពីថ្ងៃទី ១១ មីនា។ លោកវេជ្ជបណ្ឌិត លី សុវណ្ណ ក៏បានសម្តែងសាទរចំពោះសមិទ្ធផលថ្មីនេះ។ លោកបញ្ជាក់ថា នេះជាឱកាសដ៏ល្អមួយសម្រាប់វិស័យសុខាភិបាលកម្ពុជាដើម្បីពិនិត្យ និងតាមដានរាល់ការវិវឌ្ឍន៍របស់មេរោគនានា ហើយក៏ជាកន្លែងផ្តល់ចំណេះដឹង និងការបណ្តុះបណ្តាលដល់វេជ្ជបណ្ឌិតកម្ពុជា ឲ្យកាន់តែមានជំនាញច្បាស់លាស់ថែមទៀតផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ