ជំងឺផ្តាសាយបក្សីបានសម្លាប់កុមារកម្ពុជា១២នាក់ហើយក្នុងឆ្នាំ២០១៣
ក្រសួងសុខាភិបាល និងអង្គការសុខភាពពិភពលោក កាលពីថ្ងៃទិ៤វិច្ឆិកា បានចេញសេចក្តីប្រកាសព័ត៌មានរួមគ្នាមួយ អំពីការស្លាប់របស់កុមារីម្នាក់ទៀត ដោយសារជំងឺផ្តាសាយបក្សី កាលពីពាក់កណ្តាលខែតុលាកន្លងទៅ។ សរុបទៅមានកុមារកម្ពុជា១២នាក់ហើយ ដែលបានស្លាប់ដោយសារតែមេរោគ H5N1។ នេះជាបញ្ហាដែលក្រសួងសុខាភិបាលកម្ពុជាកំពុងតែព្រួយបារម្ភជាខ្លាំង និងស្នើឲ្យប្រជាជនយកចិត្តទុកដាក់ការពារខ្លួនពីជំងឺនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៤
មានកុមារីអាយុ២ឆ្នាំ ម្នាក់ ដែលរស់នៅក្នុងឃុំបឹងបត់កណ្តាល ស្រុកបាកាន ខេត្តពោធិ៍សាត់ បានស្លាប់បាត់បង់ជីវិត ដោយសារតែនាងមានឆ្លងជំងឺផ្តាសាយបក្សី H5N1 តាំងពីពាក់កណ្តាលខែតុលា។ នេះគឺជាករណីទី២៣ ក្នុងឆ្នាំ២០១៣ និងជាករណីទី៤៤ ចាប់ពីឆ្នាំ ២០០៥ ដែលកម្ពុជាមានឆ្លងវីរុសផ្តាសាយបក្សី H5N1។
តាមសេចក្តីប្រកាសព័ត៌មាន មាន៣៣ករណី ក្នុងចំណោមករណីទាំង៤៤ បានកើតឡើងទៅលើកុមារដែលមានអាយុក្រោម ១៤ឆ្នាំ។ ក្នុងនោះ មាន១០ករណី នៅឆ្នាំ២០១៣ ដែលមិនបានបង្កឲ្យកុមារស្លាប់។ ប៉ុន្តែ ករណីផ្សេងទៀត គឺបានបណ្តាលឲ្យកុមារ១២នាក់ស្លាប់ ក្នុងរយៈពេល ១០ខែ ក្នុងឆ្នាំ២០១៣។ ចំនួននេះកើនឡើងជាងឆ្នាំ២០១២។
លោក វេជ្ជបណ្ឌិត លី សូវ៉ាន់ អនុប្រធាននាយកដ្ឋានប្រយុទ្ធនឹងជំងឺឆ្លង នៃក្រសួងសុខាភិបាល បានប្រាប់វិទ្យុបារាំងអន្តរជាតិថា មិនត្រឹមតែចំនួនអ្នកស្លាប់បានកើនឡើងទេ ប៉ុន្តែ មេរោគនេះ ក៏បានសាយភាយទៅកាន់ខេត្តថ្មីៗជាច្រើនផងដែរ តាមរយៈការធ្វើអាជីវកម្មលក់សត្វបក្សី។
នៅក្នុងសេចក្តីប្រកាសនោះ លោកម៉ម ប៊ុនហេង រដ្ឋមន្ត្រីក្រសួងសុខាភិបាល បាននិយាយថា ជំងឺផ្តាសាយបក្សីនៅតែបន្តគម្រាមកំហែង ដល់សុខភាពប្រជាជនកម្ពុជា និងជាពិសេសគឺកុមារ។ លោកបានបន្តថា កុមារភាគច្រើនងាយនឹងប្រឈមមុខនឹងបញ្ហានេះ ដោយសារតែ ក្មេងៗចូលចិត្តលេងជាមួយសត្វចិញ្ចឹម ជាពិសេសគឺជាមួយពពួកបក្សី។ តាមលោក ម៉ម ប៊ុនហេង ករណីដែលឆ្លងទៅកុមារទាំងនោះ ក៏មានភាគច្រើននៅតាមទីជនបទ ដែលឪពុកម្តាយពួកគេប្រកបរបបចិញ្ចឹមសត្វទាំងនោះផងដែរ។
សូមបញ្ជាក់ថា ជំងឺផ្តាសាយបក្សី H5N1 គឺជាជំងឺផ្តាសាយមួយ ដែលជាធម្មតាចម្លងរវាងសត្វបក្សីឈឺ ទៅបក្សីផ្សេងទៀត។ ប៉ុន្តែ ជួនកាលក៏ចម្លងពីបក្សីទៅមនុស្សផងដែរ។ ទោះបីជាជំងឺនេះ វាមិនងាយឆ្លងពីមនុស្សម្នាក់ទៅមនុស្សម្នាក់ទៀត ប៉ុន្តែ បើវាផ្លាស់ប្តូរវានឹងអាចរាលដាលពីមនុស្សទៅមនុស្ស ដូចជំងឺផ្តាសាយតាមរដូវកាលដែរ។
ក្រសួងសុខាភិបាលបានអំពាវនាវឲ្យប្រជាជនដែលសង្ស័យថាមានករណីឆ្លងជំងឺនេះ ត្រូវឆាប់រាយការណ៍ជាបន្ទាន់ទៅមណ្ឌលសុខភាពដែលនៅជិតបំផុត ឬទូរស័ព្ទទៅលេខ១១៥។ ក្រសួងសុខាភិបាលក៏មានចែកឱសថតាមមជ្ឃមណ្ឌលសុខភាពមួយចំនួន ដើម្បីការពារអ្នកឆ្លងជំងឺនេះកុំឲ្យស្លាប់បាត់បង់ជីវិតផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ