ថៃ ៖ ហាងទំនិញ ឈប់ឱ្យថង់ប្លាស្ទិក ដើម្បីចូលរួមចំណែកគិតគូរដល់បរិស្ថាន
ចាប់តាំងពីថ្ងៃទី១មករា ដើមឆ្នាំ២០២០នេះមក ហាងទំនិញទាំងឡាយនៅក្នុងប្រទេសថៃ មិនផ្តល់ថង់ប្លាស្ទិក ឱ្យអតិថិជន ដោយឥតគិតថ្លៃ ដូចពីមុនទៀតទេ។ នេះគឺតាមជាបម្រាមរបស់ក្រសួងបរិស្ថាន និងដែលជាការជំរុញទាមទាររបស់អ្នកស្រឡាញ់បរិស្ថាន នៅក្នុងប្រទេសថៃ។ មិនតែប៉ុណ្ណោះ ចាប់ពីដើមឆ្នាំនេះទៅ ផលិតផលសម្អាងកាយ ដែលមានបង្កប់មីក្រូប្លាស្ទិក ក៏ត្រូវហាមឃាត់ដែរ។ នេះបើតាមក្រសួងសុខាភិបាលថៃ។ រដ្ឋាភិបាលថៃ ថែមទាំងប្តេជ្ញាចិត្តខ្លាំងថា នឹងត្រូវហាមឃាត់ឈប់ប្រើថង់ប្លាស្ទិកតែម្តង នៅឆ្នាំ២០២២។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៩
តាំងពីថ្ងៃទី១មករាមក ប្រជាពលរដ្ឋថៃ ដែលចូលទៅទិញទំនិញ នៅហាងពាណិជ្ជកម្មនានា គឺបានយកថង់ផ្ទាល់ខ្លួនពីផ្ទះ។ អ្នកខ្លះ យកញ្ច្រែង យកបង្វិចស្ពាយ ឬរទេះរុញផ្ទាល់ខ្លួន ដើម្បីដាក់ទំនិញដែលខ្លួនត្រូវការ។ មនុស្សមួយចំនួនធ្វើរឿងនេះដោយស្នាមញញឹមទៀតផង។ នេះជាការចូលរួមផ្ទាល់ខ្លួនពីពលរដ្ឋម្នាក់ៗ ទន្ទឹមនឹងហាងទំនិញធំៗ ដូចជា 7 Eleven និងសមាគមអ្នកចែកចាយទំនិញ បានបំផុសស្មារតីនិងប្តេជ្ញាចិត្ត ថាមិនចែកថង់ប្លាស្ទិកឱ្យហ្វ្រីៗ (ដោយឥតថ្លៃ) ដល់អតិថិជន ដូចពីមុនឡើយ។
ស្មារតីគិតគូរពីបរិស្ថាននេះ ផ្ទុះខ្លាំងតាំងខែតុលា២០១៩មក បន្ទាប់ពីសត្វតោសមុទ្រមួយក្បាល ងាប់ ហើយក្នុងពោះវា ឃើញសុទ្ធតែសំរាម។ រឿងអាស្រូវនេះ ត្រូវបណ្តាញទំនាក់ទំនងសង្គមនាំគ្នាផ្អើល ហើយទាមទារឱ្យមហាជនយកចិត្តទុកដាក់ចំពោះបរិស្ថាន ពិសេសគឺការប្រើប្រាស់ថង់ប្លាស្ទិក។
តាមរបាយការណ៍, ជនជាតិថៃម្នាក់ ក្នុងមួយថ្ងៃ គឺប្រើថង់ប្លាស្ទិក យ៉ាងតិច ៨ ថង់, រាប់ចាប់តាំងពីថង់ដាក់កាហ្វេ, កែវកាហ្វេធ្វើពីប្លាស្ទិក រហូតដល់ថង់ខ្ជាប់ចំណីអាហារទៀត ដែលបាស្ទិកទាំងនេះ គឺបង្កជាសំរាមរាប់លានតោន នៅស្រុកថៃ។ ថៃជាប្រទេសធំមួយដែលបញ្ចេញកាកសំណល់និងប្លាស្ទិកច្រើនសន្ធឹក នៅអាស៊ីអាគ្នេយ៍។ តំបន់នេះ គឺប្រភពធំទី៦ ដែលបំពុលទឹកសមុទ្រ ដោយសារតែកាកសំណល់ និងសំរាមប្លាស្ទិក។
អង្គការការពារបរិស្ថានជាច្រើន បានសាទរចំពោះស្មារតីភ្ញាក់រលឹករបស់ពលរដ្ឋថៃដែលផ្តើមយកចិត្តទុកពីបរិស្ថាន តែតំណាងអង្គការ Greenpeace នៅក្រុងបាងកក យល់ថា «ត្រឹមតែហាមឃាត់មិនឱ្យប្រើថង់ប្លាស្ទិក នៅមិនទាន់គ្រប់គ្រាន់ទេ ក្នុងការបញ្ចប់វិបត្តិប្លាស្ទិកក្នុងប្រទេសមួយនេះ តែការសំខាន់ត្រូវបញ្ឈប់តែម្តង វប្បធម៌ទម្លាប់នៃការចោលសំរាម ពាសវាលពាសកាល ទើបជាដំណោះស្រាយយូរអង្វែង»។
នៅតាមកញ្ចក់ទូរទស្សន៍ថៃ ជាបណ្តើរៗ ការផ្សាយពាណិជ្ជកម្មណាដែលមានបង្ហាញពីថង់ប្លាស្ទិក ក៏ត្រូវកាត់បន្ថយ ឬត្រូវ«ហាមប្រាម» ដូចការហាមផ្សាយបារី ស្រា ដែរ។ ទន្ទឹមនេះ រដ្ឋាភិបាលថៃ ថែមទាំងប្តេជ្ញាចិត្តខ្លាំងថានឹងផ្តើមហាមឃាត់ការប្រើការប្រើប្រាស់ថង់ប្លាស្ទិកចាប់ពីពេលនេះ ហើយនឹងត្រូវហាមឃាត់ឈប់ប្រើថង់ប្លាស្ទិកតែម្តង នៅឆ្នាំ២០២២។ ដូច្នេះ ពេលនេះ ថង់ដាក់អ៊ីវ៉ាន់ដែលធ្វើពី ក្រដាស និងពីក្រណាត់ (កំណាត់) កំពុងតែពេញនិយម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ