ប្រធានាធិបតីថ្មីនៅប៊ុលហ្ការី និងម៉ុលដាវី សុទ្ធតែប្រាថ្នាមានទំនាក់ទំនងល្អជាមួយរុស្ស៊ី
ចុះផ្សាយនៅថ្ងៃ៖
ស្តាប់ - ០៦:១៥
ហាក់បីក្រោមចំហាយនៃលទ្ធផលបោះឆ្នោតនៅស.រ.អាជាទីដែលលោកដូណាល់ ត្រាំ ជាបេក្ខជនហ៊ានចេញមុខប្រឆាំងនឹងប្រព័ន្ធអំណាចដុះស្លែ នៅក្រុងវ៉ាស៊ីនតោន ស្រាប់តែឈ្នះឆ្នោតក្នុងការបោះឆ្នោតជុំទី២ ថ្ងៃ១៣វិច្ឆិកាកន្លងទៅ ទាំងនៅប៊ុលហ្ការី ទាំងនៅម៉ុលដាវីដែលថ្នាក់ដឹកនាំ សុទ្ធតែស្ថិតជាប់ក្នុងខ្សែញាក់របស់បស្ចិមលោកឲ្យប្រឆាំងរុស្ស៊ី ប៉ុន្តែប្រជាជនប្រទេសទាំងពីរបានធ្វើជម្រើសខ្លួនទាំងផ្ទុយនឹងខ្សែញាក់នោះសោះ ហើយនាំគ្នាបោះឆ្នោតគាំទ្របេក្ខជនដែលមានទំនោរថ្មីចង់ស្តារឡើងវិញទំនាក់ទំនងជាមួយក្រុងម៉ូស្គូ។
វិមានក្រេមឡាំងសោមនស្សនឹងសេចក្តីថ្លែងការណ៍ធ្វើដោយអ្នកដែលបានទទួលជ័យជំនះ ក្នុងការបោះឆ្នោតនៅតាមប្រទេសទាំងពីរដែលបានថ្លែងអំពីភាពត្រៀមខ្លួនសហការជាមួយរុស្ស៊ីពង្រីកទំនាក់ទំនងជាមួយម៉ូស្គូ។ ប៉ុន្តែដោយហេតុថា ប្រព័ន្ធផ្សព្វផ្សាយនៅតាមប្រទេសខាងលិច ក៏ដូចជានៅរុស្ស៊ី នាំគ្នាប្រើពាក្យថាឈ្នះឆ្នោត គឺអ្នកដែល”រុស្ស៊ីនិយម” បានជាអ្នកនាំពាក្យផ្លូវការរបស់ប្រធានាធិបតីរុស្ស៊ី លោក ឌ្មីទ្រី ពេស្កូវអំពាវនាវពួកអ្នកកាសែតសូមកុំប្រើអី ពាក្យដែលថាប្រធានាធិបតីថ្មីនៅប៊ុលហ្ការី និងម៉ុលដាវីជាអ្នកប្រកាន់យកបន្ទាត់“អែបមកខាងម៉ូស្គូ” ឬ“រុស្ស៊ីនិយម” ស្អីណា។
ជាការរំលឹក នៅប៊ុលហ្ការី ឈ្នះឆ្នោតបានសម្លេងគាំទ្រដល់ទៅ៥៩.៣៥% គឺបេក្ខជនខាងបក្សសង្គមនិយម បក្សប្រឆាំង លោក ឧត្តមសេនីយ Roumen Radev ជាអតីតមេបញ្ជការទ័ពអាកាស ដែលហ៊ានថ្លែងប្រឆាំងនឹងប្រព័ន្ធអំណាចសព្វថ្ងៃនៅប៊ុលហ្ការី ដើម្បីការកែឲ្យល្អឡើងទំនាក់ទំនងជាមួយរុស្ស៊ី និងថែមទាំងដើម្បីការលុបទណ្ឌកម្មប្រឆាំងរុស្ស៊ីទៅផង រហូតដល់ថ្លែងថា ទឹកដីគ្រីមេតាមផ្លូវច្បាប់ De jure ជារបស់អ៊ុយក្រែន ប៉ុន្តែ តាមដំណើរការណ៍ជាក់ស្ដែងDe facto គឺជារបស់រុស្ស៊ី។
រីឯបេក្ខភាពលោកស្រី Tsetska Tsatcheva ជាប្រធានរដ្ឋសភា និងដែលបានតំណាងឲ្យគណបក្សកាន់អំណាចស្តាំ-កណ្តាលនិយមក្រោមឈ្មោះថាពលរដ្ឋដើម្បីការអភិវឌ្ឍន៍ប៊ុលហ្ការីតាមផ្លូវអឺរ៉ុប ហៅកាត់ថា GERB ដែលសន្យារក្សាទុកទិសដៅអឺរ៉ុប និងបក្សសម្ព័ន្ធអូតង់ របស់ប៊ុលហ្ការី ដូចលោកប្រធានាធិបតី RossenPlevnelievដែលត្រូវផុតអាណត្តិ បានសម្លេងគាំទ្រ៣៦,១៧ %។ដូច្នេះគម្លាតសម្លេងដែលបេក្ខភាពខាងបក្សកាន់អំណាច ចាញ់បេក្ខជនខាងបក្សប្រឆាំងគឺដល់ទៅជាង២៣%ឯណោះ។
តាមការពន្យល់បំភ្លឺនៃទស្សនវិទូ និងអ្នកសង្គមសាស្ត្រប៊ុលហ្ការី លោក Andrei Raichev ៖
-បរាជ័យនេះគឺសឲ្យឃើញពីការខកចិត្តរបស់ប្រជាជនប៊ុលហ្ការី នឹងស្ថានភាពសេដ្ឋកិច្ច វន្តលើប៊ុលហ្ការីដោយគម្រោងសេរីនិយមពីខាងសហភាពអឺរ៉ុប ដែលប៊ុលហ្ការីក្លាយជាសមាជិកក្នុងឆ្នាំ២០០៧ នាំឲ្យគេធ្លាក់ខ្លួនកាន់តែក្រទៅៗ។ ប្រជាជនប៊ុលហ្ការីក៏ខកចិត្តនឹងអំពើពុករលួយដែលស៊ីរូងប្រទេសនេះ។
-ជ័យជំនះលោកឧត្តមសេនីយ Roumen Radev រំលេចឲ្យឃើញថា ប្រជាជនមិនជឿឡើយតាមរលកឃោសនាបំភ័យដោយលោកប្រធានាធិបតី RossenPlevnelievដែលជិតផុតអាណត្តិទៅហើយ ដែលតែងប្រកាសប្រទេសរុស្ស៊ីថាជាកម្លាំងសែនអកុសលដែលត្រៀមវាយប្រហារលើអឺរ៉ុប ហើយកាន់កាប់អឺរ៉ុបខាងកើតទាំងមូលចំណែកឈ្មោះលោកពូទីនគឺជាអ្នកដើរតួចម្បង ខាងបំបែកបំបាក់ទ្វីបអឺរ៉ុប ហើយដាក់ប៊ុលហ្ការីជាប្រទសចំណុះដែលត្រូវអាស្រ័យទាំងស្រុងនឹងក្រុងម៉ូស្គូ។
តាមមតិទស្សនវិទូ អ្នកសង្គមសាស្ត្រប៊ុលហ្ការី លោក Andrei Raichev ៖ការឃោសនាបែបនេះ គឺវាផ្ទុយស្រឡះនឹងមនោសញ្ចេតនាជាប្រពៃណីរបស់ប្រជាជនប៊ុលហ្ការី ដែលតែងចាត់ទុកប្រជាជនរុស្ស៊ីជាបងប្អូនជាភាតរប្រជាជន។ គាត់រំលឹកថា ១៣០ឆ្នាំមុន ក្នុងសង្គ្រាមទល់នឹងចក្រភពអូតូម៉ាន់ គឺតួកគីសព្វថ្ងៃ មានពលរដ្ឋរុស្ស៊ីដល់ទៅ២សែននាក់បានពលីជីវិត ដើម្បីរក្សាទុកដដែលប្រជាជាតិប៊ុលហ្ការី ហើយហេតុការណ៍នេះនៅប៊ុលហ្ការី ទាំងស្រី ទាំងប្រុស គេចងចាំជាប់ជានិច្ចតាំងពីក្មេងមក។
គឺនៅខែមករាឆ្នាំក្រោយ ដែលត្រូវប្រព្រឹត្តទៅពិធីទទួលសច្ចាប្រណិធានឡើងកាន់តំណែងនៃលោកប្រធានាធិបតីថ្មីនៅប៊ុលហ្ការី សម្រាប់អាណត្តិ៥ឆ្នាំទៅមុខ។
ចំណែកនៅម៉ុលដាវី ឈ្នះឆ្នោតដោយសម្លេងគាំទ្រ៥៣,១២% គឺ លោក Igor Dodonខាងបក្សសង្គមនិយម ជាបក្សប្រឆាំងដែរ គោលជំហរគាត់ គឺតាំងភាពជាដៃគូយុទ្ធសាស្ត្រជាមួយរុស្ស៊ី ភ្ជាប់ខ្លួនMoldavie មកនឹងលំហពាណិជ្ជកម្មសេរីរបស់សហភាពសេដ្ឋកិច្ចអឺរ៉ុប-អាស៊ី (មាន៥ប្រទេសជាសមាជិក គឺRussia,Belarus,Kazakhstan,kirghizistan,Armenia)។
គួរនិយាយថា បានភ្ជាប់ខ្លួនមកនឹងលំហពាណិជ្ចកម្មនេះទៅហើយ គឺVietnam។ Moldavie មានប្រយោជន៍នឹងនាំកសិផលខ្លួនមកកាន់រុស្ស៊ីដូចសម័យមុនអញ្ចឹង ។
ក្នុងសម្ភាសន៍មកទូរទស្សន៍រុស្ស៊ី យប់ថ្ងៃ១៤វិច្ឆិកា គាត់ថែមទាំងថ្លែងទទួលស្គាល់ថា Crimeaពិតជាដែនដីសហព័ន្ធរុស្ស៊ី។
ចំណែកគូប្រជែងគាត់ លោកស្រីMaia Sandu ដែលជាបេក្ខភាពរួមតែមួយរបស់ពួកគណបក្សស្តាំដែលមានទំនោរទៅខាងសហភាពអឺរ៉ុប និងអូតង់ បានសម្លេងគាំទ្រតែ៤៧,៧១% ប៉ុន្តែគាត់មិនប្រញាប់ប្រញាល់ទទួលស្គាល់បរាជ័យខ្លួនទេ ហើយថែមទាំងអំពាវនាវបក្សពួកខ្លួនឲ្យចុះថ្នល់តវ៉ាទៅផង។ ថ្ងៃបន្ទាប់មក មានយុវជនប៉ុន្មានរយនាក់បានចុះថ្នល់ធ្វើបាតុកម្មមែន ប៉ុន្តែ ក្នុងបទយកការណ៍អំពីបាតុកម្មនោះ អ្នកឆ្លើយឆ្លងនៃកាណាល់ទូរទស្សន៏រុស្ស៊ី យោងទៅលើសំដីនិស្សិតម្នាក់ បង្ហើបឲ្យដឹងថា គេមកចូលរួមតវ៉ានេះ ដោយគេបានទទួលម្នាក់ៗ២០ដុល្លារ។ ហើយនៅថ្ងៃក្រោយៗមក បរិយាកាសក្នុងរដ្ឋធានីម៉ុលដាវី លែងកក្រើករញ្ជួយទៀតឡើយ។
លោក Igor Dodon គូសបញ្ជាក់ថា ប្រទេសទី១ដែលគាត់នឹងធ្វើទស្សនកិច្ចក្រោយពីទទួលសច្ចាប្រណិធានចូលកាន់តំណែងជាប្រធានាធិបតីថ្មីនៅម៉ុលដាវី គឺសហព័ន្ធរុស្ស៊ីតែម្តង។
ជាការកត់សម្គាល់ ដោយមកពីមានការតវ៉ាពីខាងបេក្ខជនចាញ់ឆ្នោត បានជាទៅទល់ចុងសប្តាហ៍នេះ គ.ជ.ប.ត្រូវបញ្ជាក់ពីលទ្ធផលបោះឆ្នោតនោះ ហើយបញ្ជូនវាទៅកាន់តុលាការធម្មនុញ្ញ។ ចំណែកតុលាការធម្មនុញ្ញមានពេល១០ថ្ងៃ ដើម្បីទទួលស្គាល់ការបោះឆ្នោតនោះ ថាស្របនឹងច្បាប់គោលរបស់ប្រទេស គឺស្របនឹងរដ្ឋធម្មនុញ្ញប្រទេស។ លុះនីតិវិធីនេះចប់សព្វគ្រប់ទៅ ទើបអាជ្ញាធរនឹងកំណត់ថ្ងៃទទួលពាក្យសម្បថរបស់ប្រធានាធិបតីថ្មី សម្រាប់អាណត្តិ៤ឆ្នាំទៅមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ