អតីតប្រធានាធិបតីប៉ាគីស្ថានPervez Musharraf រងការចោទប្រកាន់ថ្មីៗទៀត ពីបទមនុស្សឃាត
នៅថ្ងៃចន្ទនេះ ប៉ូលិសប៉ាគីស្ថានបានដាក់ពាក្យបណ្តឹងថ្មីមួយទៀតទៅតុលាការ ដើម្បី ចោទប្រកាន់លោក Pervez Musharraf អតីតប្រធានាធិបតីប៉ាគីស្ថាន ពីបទឃាតកម្មសម្លាប់អ៊ីម៉ាំដឹកនាំការសូត្រធម៌មួយរូប នៅវិហារក្រហមក្រុងអ៊ីស្លាម៉ាបាដ។ គួររំលឹកថា កាលពី៦ឆ្នាំមុន វិហារក្រហមក្រុងអ៊ីស្លាម៉ាបាដ គឺជាទីកន្លែងដែលទាហានធ្លាប់បានធ្វើការវាយលុកបង្ហូរឈាម។ នេះជានីតិវិធីថ្មីមួយក្នុងចំណោមនីតិវិធីចុងក្រោយនានា ប្រឆាំងនឹងលោក Musharraf តាំងតែពីលោកបានត្រលប់ចូលប៉ាគីស្ថានវិញ នៅខែមិនាដើមឆ្នាំ បន្ទាប់ពីបានភៀសខ្លួន ទៅក្រៅប្រទេសអស់៥ឆ្នាំមក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២៣
នៅក្នុងការចោទប្រកាន់ថ្មីនេះ អ្នកដឹកនាំការសូត្រធម៌មួយរូបនៃវិហារក្រហម នៅប៉ាគីស្ថាន ឈ្មោះ អាប់ឌុល រ៉ាស្ហ៊ីត ហ្កាស៊ី គឺជាជនរងគ្រោះមួយរូបក្នុងចំណោមជនរងគ្រោះជាងមួយរយនាក់ ដែលបានស្លាប់ កាលពីថ្ងៃ១០កក្កដា ឆ្នាំ២០០៧ នៅក្នុងការឡោមព័ទ្ធ និងការវាយលុកពីសំណាក់កងទ័ពប៉ាគីស្ថាន នៅក្រុងអ៊ីស្លាម៉ាបាដ។ វិហារក្រហមនេះ ជាទីកន្លែងដែលអ្នកកាន់សាសនាអ៊ីស្លាមនានា បានទាមទារសុំអោយបង្កើតច្បាប់អ៊ីស្លាម ដែលហៅថា Charia នោះ នៅក្នុងប្រទេស និងទាមទារអោយរដ្ឋាភិបាលលោក មូស្ហារ៉ាហ្វ ចុះចេញពីអំណាច។
បន្ទាប់ពីហេតុការណ៍នោះមក ក្រុមឧទ្ទាមតាលីបង់នៅប៉ាគីស្ថានបានបង្កអំពើភេរវកម្មជាច្រើនដែលមិនធ្លាប់មានពីមុនមក នៅគ្រប់ទីកន្លែងក្នុងប្រទេស សម្លាប់មនុស្សអស់រាប់ពាន់នាក់។ ប៉ូលិសប៉ាគីស្ថានមានការញញើត មិនហ៊ានធ្វើបណ្តឹងប្រឆាំងលោក មូស្ហារ៉ាហ្វ ដោយសារតែសំណុំរឿងនេះ គឺជាប្រធានបទដ៏ក្តៅគគុក។ ប៉ុន្តែ កូនប្រុសអ៊ីម៉ាំអ្នកសូត្រធម៌ បានជំរុញតុលាការកំពូលក្រុងអ៊ីស្លាម៉ាបាដ អោយបង្ខំប៉ូលិសអោយសំរេចកិច្ចការនេះ។ នៅថ្ងៃចន្ទនេះ ប៉ូលិសបានបញ្ជាក់ថា បានដាក់ពាក្យបណ្តឹងចោទប្រកាន់អតីតប្រធានាធិបតីពីបទឃាតកម្មលើអ្នកសូត្រធម៌ ហ្កាស៊ី នេះហើយ។
អតីតប្រធានាធិបតី Pervez Musharraf ធ្លាប់កាន់អំណាចនៅប៉ាគីស្ថាន ពីឆ្នាំ១៩៩៩ ដល់ឆ្នាំ២០០៨ កំពុងស្ថិតនៅក្រោមការស៊ើបអង្កេត ពីបទធ្លាប់ដាក់ប្រទេសក្រោមការប្រកាសអាសន្ន កាលពីឆ្នាំ២០០៧ និងពីបទសម្លាប់មេដឹកនាំក្រុមឧទ្ទាមមួយរូប នៅខេត្តបាលូតឈីស្តង់។ កាលពីខែកក្កដា កន្លងទៅ តុលាការបានដាក់ពិរុទ្ធលោក Musharraf ពីបទធ្វើឃាតអតីតនាយករដ្ឋមន្ត្រី បេណាស៊ៀរ ប៊ុតតូ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ