អាមេរិកទើបបានដាក់ទណ្ឌកម្មថ្មីប្រឆំាងអ៊ីរ៉ង់ស្តីពីរឿងនុយក្លេអ៊ែរ តែអ៊ីរ៉ង់ និងរុស្ស៊ីបានចាត់ទុកថា ខុសច្បាប់
សហរដ្ឋអាមេរិកបានប្រកាសឲ្យដឹងនៅថ្ងៃសុក្រ ទី២៩ សីហាពីការដាក់ទណ្ឌកម្មថ្មីប្រឆំាងប្រទេសអ៊ីរ៉ង់ពាក់ព័ន្ធនឹងកម្មវិធីនុយក្លេអ៊ែរអ៊ីរ៉ង់ដ៏ចម្រូងចម្រាស។ ទណ្ឌកម្មថ្មីនេះត្រូវបានទីក្រុងវ៉ាស៊ីនតោនសំដៅលើក្រុមហ៊ុន និងបុគ្គលដែលបានជួយគំាទ្រនៅក្នុងកម្មវិធីនុយក្លេអ៊ែរ ក៏ដូចជាការគំាទ្រភេរវនិយម។ ជាការឆ្លើយតបវិញ លោកប្រមុខការទូតអ៊ីរ៉ង់បានបញ្ចេញប្រតិកម្មពីទីក្រុងម៉ូស្គូដែលលោកបានទៅទស្សនកិច្ចថា ទណ្ឌកម្មរបស់បស្ចិមលោក គឺជារឿងខុសច្បាប់។
ចុះផ្សាយនៅថ្ងៃ៖
ស្តាប់ - ០២:០៧
គឺតាមរយៈសេចក្តីជូនដំណឹងរួមគ្នាពីសេតវិមាន ក្រសួងការបរទេស និងក្រសួងសេដ្ឋកិច្ចដែលអាមេរិកបានប្រកាសឲ្យដឹងពីការដាក់ទណ្ឌកម្មថ្មីប្រឆំាងអ៊ីរ៉ង់នៅក្នុងសំណុំរឿងនុយក្លេអ៊ែរដ៏ចម្រូងចម្រាស។ អ្នកនំាពាក្យរបស់ក្រុមប្រឹក្សាសន្តិសុខជាតិនៃសេតវិមានបានអះអាងថា ការដែលអាមេរិកបានបន្ថែមទណ្ឌកម្មថ្មីលើអ៊ីរ៉ង់ពេលនេះ គឺក្នុងគោលដៅបន្តរក្សាគំនាបលើរដ្ឋាភិបាលទីក្រុងតេហេរ៉ង់។ នៅក្នុងទណ្ឌកម្មបន្ថែមនោះ ក្រសួងសេដ្ឋកិច្ច និងការបរទេសអាមេរិកបានដាក់សំដៅលើក្រុមហ៊ុន និងបុគ្គលណាដែលបានចេញមុខជួយជម្រុញសកម្មភាពនុយក្លេអ៊ែរ ឬបានគំាទ្រភេរវនិយម ឬមួយក៏ជួយរដ្ឋាភិបាលអ៊ីរ៉ង់ឲ្យគេចផុតពីទណ្ឌកម្មអន្តរជាតិ។
អ្វីជាការកត់សម្គាល់ ទណ្ឌកម្មថ្មីរបស់អាមេរិកប្រឆំាងអ៊ីរ៉ង់ពេលនេះបានធ្វើឡើង ចំពេលដែលកិច្ចប្រជុំ ៥ភាគីបូក១ ស្តីពីកម្មវិធីនុយក្លេអ៊ែរអ៊ីរ៉ង់កំពុងបន្តមានដើម្បីស្វែងរកកិច្ចព្រមព្រៀងជាស្ថាពរមួយ។ តែរូបអ្នកនំាពាក្យរបស់ក្រុមប្រឹក្សាសន្តិសុខជាតិនៃសេតវិមានបានធានាថា ទីក្រុងវ៉ាស៊ីនតោននៅតែបន្តស្វែងរកដំណោះស្រាយផ្លូវទូតមួយសម្រាប់រឿងនុយក្លេអ៊ែរអ៊ីរ៉ង់ និងថា ទណ្ឌកម្មថ្មីរបស់អាមេរិកពេលនេះនឹងមិនប៉ះពាល់ដល់កិច្ចប្រជុំ ៥ភាគីបូក១ ដែលគ្រោងបើកធ្វើនាថ្ងៃខាងមុខទេ។ គួររម្លឹកជូនថា អ៊ីរ៉ង់ និងក្រុមប្រទេស ៥បូក១ បានឯកភាពគ្នាលើកិច្ចព្រមព្រៀងបឋមមួយកាលពីខែវិច្ឆិកា ឆ្នំា ២០១៣ និងគ្រោងបន្តកិច្ចចរចាដើម្បីសម្រេចឲ្យបាននូវកិច្ចព្រមព្រៀងស្ថាពរមួយនាពេលខាងមុខ។
តែយ៉ាងណាក៏ដោយ អ៊ីរ៉ង់ និងរុស្ស៊ីបានឆ្លៀតវាយប្រហារបស្ចិមលោករួមគ្នាដែលបានចាត់ទុកទណ្ឌកម្មសេដ្ឋកិច្ចរបស់អាមេរិក និងអឺរ៉ុបថា ជារឿងខុសច្បាប់។ ថ្លែងនៅក្នុងសន្និសីទកាសែតរួមគ្នាជាមួយលោកប្រមុខការទូតរុស្ស៊ីក្នុងទីក្រុងម៉ូស្គូ លោកប្រមុខការទូតអ៊ីរ៉ង់ដែលបានទៅបំពេញទស្សនកិច្ចនៅទីនោះបានថ្លែងថា ទណ្ឌកម្មរបស់បស្ចិមលោកបានត្រឹមតែសម្លាប់ប្រជាជនស៊ីវិលស្លូតត្រង់ប៉ុណ្ណោះ ពោលមិនអាចហាមឃាត់សិទ្ធិរបស់អ៊ីរ៉ង់ក្នុងការបំពាក់នុយក្លេអ៊ែរស៊ីវិលបានឡើយ។ សូមជម្រាបជូនថា សហគមន៍អន្តរជាតិនៅតែសង្ស័យថាអ៊ីរ៉ង់កំពុងពួនសម្ងំផលិតគ្រាប់បែបបរមាណូ តែអ៊ីរ៉ង់បានបដិសេធដោយអះអាងថា កម្មវិធីនុយក្លេអ៊ែររបស់ខ្លួនមានគោលដៅស៊ីវិលសុទ្ធសាធ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ