នុយក្លេអ៊ែរ៖កិច្ចចរចាស្វែងរកកិច្ចព្រមព្រៀងរវាងអ៊ីរ៉ង់ និងបស្ចិមលោកកំពុងស្ថិតក្នុងភាពមិនច្បាស់លាស់
ចុះផ្សាយនៅថ្ងៃ៖
ស្តាប់ - ០៥:៣០
ប្រទេសអ៊ីរ៉ង់ និងក្រុមប្រទេស ៥បូក១ បានជួបប្រជុំគ្នារយៈពេល ១០ថ្ងៃ នៅក្នុងទីក្រុងញូយ៉ក សហរដ្ឋអាមេរិក។ គឺជាកិច្ចប្រជុំមួយដែលបានរៀបចំធ្វើនៅក្រៅក្របខ័ណ្ឌនៃមហាសន្និបាតអង្គការសហប្រជាជាតិ និងដើម្បីបន្តជជែកគ្នាពីភាពមិនចុះសម្រុងមួយចំនួន មុននឹងអនុម័តចេញនូវកិច្ចព្រមព្រៀងចុងក្រោយស្តីពីបញ្ហានុយក្លេអ៊ែរអ៊ីរ៉ង់។ កិច្ចប្រជុំរយៈពេល ១០ថ្ងៃដែលពោរពេញដោយការតស៊ូមតិគ្នាយ៉ាងខ្លំាងក្លានោះ បានបញ្ចប់ទៅដោយភាគីនីមួយៗបានទទួលស្គាល់ថា គ្មានការរីកចម្រើនទៅមុខគួរឲ្យកត់សម្គាល់ទេ។ តែយ៉ាងហោចណាស់ ភាគីពាក់ព័ន្ធបានព្រមព្រៀងគ្នាជួបប្រជុំជាថ្មីនៅមុនពាក់កណ្តាលខែតុលាខាងមុខនៅក្នុងទឹកដីអឺរ៉ុប ដោយមិនទាន់បានកំណត់យកប្រទេសអឺរ៉ុបណាមួយទេ។ តើអ៊ីរ៉ង និងបស្ចិមលោកអាចនឹងសម្រេចបានកិច្ចព្រមព្រៀងចុងក្រោយឬទេ?
វាហាក់ដូចជារហ័សពេកដែលគេហ៊ាននិយាយថា គ្មានថ្ងៃដែលអ៊ីរ៉ង់ និងបស្ចិមលោកអាចសម្រេចបាននូវកិច្ចព្រមព្រៀងចុងក្រោយមួយស្តីពីបញ្ហានុយក្លេអ៊ែរអ៊ីរ៉ង់ដ៏ស្មុគស្មាញ និងចម្រូងចម្រាសនោះ។ តែគេក៏ត្រូវហ៊ានទទួលស្គាល់ថា ការដែលភាគីទំាងអស់បាននំាគ្នាបន្តជួបចរចារហូតមកដល់សព្វថ្ងៃ ពិតជាសញ្ញាវិជ្ជមានមួយដែលបញ្ជាក់ពីឆន្ទៈចង់ដោះស្រាយសំណុំរឿងដ៏អូសបន្លាយនេះ។ នៅក្នុងកិច្ចប្រជុំចុងក្រោយកាលពីខែកក្កដាកន្លងទៅ អ៊ីរ៉ង់ និងក្រុមប្រទេស ៥បូក១ មានចិន សហរដ្ឋអាមេរិក បារំាង អង់គ្លេស រុស្ស៊ី និងប្រទេសអាល្លឺម៉ង់បានព្រមព្រៀងគ្នាថា នឹងរកឲ្យឃើញនូវកិច្ចព្រមព្រៀងផ្តាច់ព្រាត់មួយស្តីពីបញ្ហានុយក្លេអ៊ែរអ៊ីរ៉ង់ឲ្យបានមុនថ្ងៃទី២៤ វិច្ឆិកា ឬក៏យ៉ាងហោចណាស់ត្រឹមថ្ងៃទី២៤ វិច្ឆិកាដែរ។ តែសំណួរដែលកំពុងចោទពេលនេះគឺថា តើអាចទៅរួចដែរ ឬទេ និងថា បើសម្រេចមិនបានទេ តើអាចនឹងមានការពន្យាពេលបន្ថែមដែរ ឬយ៉ាងណា?
ថ្ងៃទី២៤ វិច្ឆិកា គឺស្ថិតមិនឆ្ងាយប៉ុន្មានទេ ពោលនៅកំបំាងមិនដល់ ២ខែ ទៀតផង។ អ៊ីចឹងហើយបានជានៅក្រៅក្របខ័ណ្ឌនៃមហាសន្និបាតអង្គការសហប្រជាជាតិក្នុងទីក្រុងញូយ៉ក សហរដ្ឋអាមេរិក ភាគីទំាងពីរក៏បានឆ្លៀតជួបប្រជុំគ្នាដើម្បីបន្តជជែកពីភាពមិនចុះសម្រុងគ្នាដែលនៅសេសសល់។ ក្រៅពីជំនួបជាលក្ខណៈរួមរវាងអ៊ីរ៉ង់ និង ៥ភាគីបូក១ ក៏មានជំនួបជាលក្ខណៈឧភតោភាគីរវាងអ៊ីរ៉ង់ និងប្រទេសពាក់ព័ន្ធនីមួយៗដែរ។ កិច្ចប្រជុំជាលក្ខណៈរួមត្រូវបានគេធ្វើអស់រយៈពេល ១០ថ្ងៃពេញ ១០ថ្ងៃដែលពោរពេញទៅដោយការនិយាយត ថ្លៃគ្នា និងដែលមានបង្កប់ដោយការដំឡើងសរសែ ក ដាក់គ្នាទៀតផង។ តែគួរឲ្យស្តាយ និងអាចថា មិនមានអ្វីគួរឲ្យភ្ញាក់ផ្អើលក៏ថាបាន ព្រោះថានៅទីបំផុត កិច្ចប្រជុំរយៈពេល ១០ថ្ងៃនោះមិនបានហុចលទ្ធផលអ្វីជាដុំកំភួនទេ និយាយឲ្យស្រួលយល់ ភាពមិនចុះសម្រុងគ្នា និងបញ្ហានៅសេសសល់នៅបន្តសេសសល់ដដែល។
តើវាជាកំហុសរបស់អ្នកណា?
រហូតមកដល់ពេលនេះ គ្មាននរណាម្នាក់ហ៊ានចាត់ទុកកិច្ចប្រជុំក្នុងទីក្រុងញូយ៉កថាទទួលបរាជ័យទេ ហើយក៏គ្មាននរណាម្នាក់ហ៊ានទម្លាក់កំហុសដាក់នរណាម្នាក់ដែរ។ តែទន្ទឹមគ្នានេះ គ្រប់គ្នាក៏បានទទួលស្គាល់ថា គ្មានការចម្រើនទៅមុខដូចដែលគេសង្ឃឹមទុកនោះឡើយ។ អ្នកទទួលខុសត្រូវជាន់ខ្ពស់អាមរិកំាងម្នាក់បានថ្លែងសារភាពថា គម្លាត ឬភាពមិនចុះសម្រុងគ្នារវាងអ៊ីរ៉ង់ និងបស្ចិមលោកនៅមានទំហំធំណាស់ និងថា នៅមានចំណុចជាច្រើនដែលគេពិបាកនឹងនិយាយស្តាប់គ្នាបាន។ ការទទួលស្គាល់ដូចគ្នានេះក៏មានចេញពីមាត់លោកអនុរដ្ឋមន្រ្តីការបរទេសអ៊ីរ៉ង់អាបាស់ អារ៉ាជីដែរ។ លោកអារ៉ាជីដែលបានថ្លែងថា ភាគីពាក់ព័ន្ធបានបង្កើតឲ្យមានបរិយាកាសមួយដោយមានការយល់គ្នាល្អណាស់ តែភាពមិនចុះសម្រុងគ្នានៅតែមានជានិច្ច។ ដោយមិនបានលំអិតអំពីលទ្ធផលនៃកិច្ចប្រជុំក្នុងទីក្រុងញូយ៉ក លោមអារ៉ាជីបានគូសបញ្ជាក់ពីលទ្ធភាពក្នុងការសម្រេចឲ្យបាននូវកិច្ចព្រមព្រៀងផ្តាច់ព្រាត់មួយស្តីពីសំណុំរឿងនុយក្លេអ៊ែរអ៊ីរ៉ង់នៅមុនថ្ងៃទី ២៤ វិច្ឆិកា និងបន្ថែមថា ការពន្យាពេលកិច្ចចរចាជារឿងមួយឥតប្រយោជន៍។
ចំណាប់អារម្មណ៍ក៏មានពីលោកប្រធានាធិបតីអ៊ីរ៉ង់ហាសាន រ៉ូហានីដែរ។ ថ្លែងនៅលើវេទិកានៃមហាសន្និបាតអង្គការសហប្រជាជាតិ លោកប្រមុខរដ្ឋអ៊ីរ៉ង់បានបញ្ជាក់ជាថ្មីថា អ៊ីរ៉ង់បានប្តេជ្ញាចិត្តបន្តកិច្ចចរចាប្រកបដោយភាពស្មោះត្រង់ និងចង់សម្រេចឲ្យបាននូវកិច្ចព្រមព្រៀងមួយដូចថ្ងៃកំណត់។ តែទន្ទឹមគ្នានេះ លោករ៉ូហានីក៏បានឆ្លៀតព្រមានប្រឆំាងពីការទាមទារចង់បានជ្រុលហួសហេតុរបស់បស្ចិមលោក។ ដោយមិនចង់ភ្ជាប់ទៅនឹងសង្រ្គាមក្នុងប្រទេសអ៊ីរ៉ាក់ និងស៊ីរីដែលជាមិត្តរបស់អ៊ីរ៉ង់ លោករ៉ូហានីបានអះអាងថា កិច្ចព្រមព្រៀងស្តីពីនុយក្លេអ៊ែររវាងអ៊ីរ៉ង់ និងបស្ចិមលោកនឹងបើកផ្លូវឆ្ពោះទៅរកកិច្ចសហប្រតិបត្តិការរវាងទីក្រុងតេហេរ៉ង់ និងបស្ចិមលោក។ ទន្ទឹមគ្នានេះ លោករ៉ូហានីក៏បានរម្លឹកជាថ្មីពីជំហររបស់អ៊ីរ៉ង់ដែលចង់ឲ្យបស្ចិមលោកលើកទ័ណ្ឌកម្មទំាងស្រុងចេញពីអ៊ីរ៉ង់ ទ័ណ្ឌកម្មដែលត្រូវបានដាក់បន្ថែមជាបន្តបន្តាប់តំាងពីឆ្នំា ២០០៦ មកម្ល៉េះ។
សូមជម្រាបជូនថា តំាងពីមានកិច្ចព្រមព្រៀងបឋមមួយចុះហត្ថលេខាដោយអ៊ីរ៉ង់ និងក្រុមប្រទេស ៥ភាគីបូក១ ក្នុងទីក្រុងហ្សឺណែវ ប្រទេសស្វីសកាលពីខែវិច្ចិកាឆ្នំា ២០១៣ មក កិច្ចចចារបានបន្តជួបប្រទះនឹងឧបសគ្គតែដដែល។ នៅម្ខាង អ៊ីរ៉ង់ចង់ឲ្យកិច្ចព្រមព្រៀងផ្តាច់ព្រាត់ជាថ្នូរនឹងការលើកទ័ណ្ឌកម្មទំាងអស់ គឺទ័ណ្ឌកម្មដាក់ដោយអង្គការសហប្រជាជាតិ ទ័ណ្ឌកម្មដាក់ដោយអាមរិក និងទ័ណ្ឌកម្មដាក់ដោយសហភាពអឺរ៉ុប។ នៅម្ខាងទៀត ក្រុមប្រទេស ៥ភាគីបូក១ចង់កាត់បន្ថយជាងពាក់កណ្តាលនូវបំពង់ចម្រើនធាតុអ៊ុយរ៉ាញ៉ូម។ ហេតុផលរបស់លោកខាងលិចគឺថា មានបំពង់ចម្រើនធាតុអ៊ុយរ៉ាញ៉ូមកាន់តែតិចរឹតតែល្អ ព្រោះវានឹងអាចរារំាងអ៊ីរ៉ង់មិនឲ្យផលិតគ្រាប់បែកបរិមាណូ។ គួរបញ្ជាក់ថា ធាតុអ៊ុយរ៉ាញ៉ូមដែលចម្រើនក្នុងកម្រិតទាបអាចយកទៅប្រើក្នុងវិស័យស៊ីវិល តែបើចម្រើនក្នុងកម្រិតខ្ពស់អាចយកទៅប្រើក្នុងវិស័យយោធា។
យ៉ាងណាក៏ដោយ ភាគីទំាងអស់បានព្រមព្រៀងគ្នានឹងបន្តកិច្ចចរចាជាបន្តទៀតដោយចាប់ផ្តើមជាថ្មីនៅដើមខែតុលាខាងមុខក្នុងទឹកដីអឺរ៉ុប អាចនៅក្នុងប្រទេសស្វីស ឬប្រទេសអូទ្រីស។ ឃើញថា ពេលវេលាកាន់តែខើច និងដែលភាគីនីមួយៗគ្មានជម្រើសអ្វី ក្រៅពីសម្រេចឲ្យបាននូវកិច្ចព្រមព្រៀងផ្តាច់ព្រាត់មួយនៅមុនថ្ងៃកំណត់ទី២៤ វិច្ចិកា។ ឆន្ទៈមានហើយ តែការមិនទុកចិត្តគ្នានៅបន្តមាន និងដែលគ្រប់គ្នាត្រូវដឹងថា ជោគជ័យ ឬបរាជ័យ គឺជាកំហុសសមូហភាពទំាងអស់គ្នា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ