កាសែតអាមេរិក៖លោកអូបាម៉ាបានសម្រេចពន្យារបេសកកម្មទាហានប្រយុទ្ធអាមេរិកនៅអាហ្វហ្កានីស្ថានរយៈពេល ១ឆ្នំា
យោងតាមព័ត៌មានចុះផ្សាយដោយកាសែតអាមេរិក New York Times នៅថ្ងៃសុក្រ ទី២១ វិច្ឆិកាឲ្យដឹងថា លោកប្រធានាធិបតីអាមេរិកបារ៉ាក់ អូបាម៉ាបានសម្រេចពន្យារបេសកកម្មទាហានប្រយុទ្ធអាមេរិកនៅក្នុងប្រទេសអាហ្វហ្កានីស្ថានរយៈពេល ១ឆ្នំាបន្ថែមទៀត។ បើតាមកាសែត New York Times ដដែល ការសម្រេចរបស់លោកអូបាម៉ាត្រូវបានធ្វើឡើងតាមរយៈការចុះហត្ថលេខាលើក្រិត្យមួយកាលពីប៉ុន្មានសប្តាហ៍កន្លងទៅ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៣
តាមការគ្រោងទុកមកដល់ពេលនេះ បេសកកម្មរបស់ទាហានប្រយុទ្ធអាមេរិកទំាងអស់នៅក្នុងប្រទេសអាហ្វហ្កានីស្ថាននឹងត្រូវបិទបញ្ចប់នៅដំណាច់ឆ្នំា ២០១៤ នេះ ហើយចាប់ពីថ្ងៃទី១ ខែមករា ឆ្នំា ២០១៥ ទៅ ទាហានអាមេរិកទំាង ៩ ៨០០នាក់ បូកជាមួយទាហានអាល្លឺម៉ង់ ៣ ០០០នាក់ និងទាហានអ៊ីតាលី ព្រមទំាងទាហានរបស់ប្រទេសសម្ព័ន្ធមិត្តផ្សេងទៀតដែលបន្តស្ថិតក្នុងប្រទេសអាហ្វហ្កានីស្ថានត្រូវមានបេសកកម្មតែមួយគត់ គឺជួយគំាទ្រ និងជួយហ្វឹកហ្វឺនកម្លំាងទាហានអាហ្វហ្កានីស្ថាន។ តែបើយោងតាមព័ត៌មានចុះផ្សាយដោយកាសែតអាមេរិក New York Times នៅថ្ងៃសុក្រ ទី២១ វិច្ឆិកាឲ្យដឹងថា លោកប្រធានាធិបតីអាមេរិកអូបាម៉ាទើបបានចុះហត្ថលេខាលើក្រិត្យមួយដោយអនុញ្ញាតឲ្យទាហានអាមេរិកំាងដែលបន្តស្ថិតក្នុងទឹកដីអាហ្វហ្កានីស្ថានអាចប្រយុទ្ធទល់នឹងពួកឧទ្ទាមតាលីបង់ដោយផ្ទាល់ក្នុងករណីដែលពួកតាលីបង់គំរាមកំហែងលើទាហានអាមេរិក ទាហានអន្តរជាតិ ឬមួយក៏លើរដ្ឋាភិបាលអាហ្វហ្កានីស្ថាន។
ទន្ទឹមគ្នានឹងការបន្តចេញមុខប្រយុទ្ធផ្ទាល់នឹងខ្មំាងសត្រូវ លោកអូបាម៉ាក៏បានអនុញ្ញាតឲ្យទាហានអាមេរិកំាងអាចប្រើយន្តហោះចម្បំាង យន្តហោះទម្លាក់គ្រាប់បែក ឬមួយក៏យន្តហោះគ្មានមនុស្សបើកបរដ្រូនដែរ ពោលគឺបន្តបេសកកម្មដូចដែលពួកគេធ្លាប់បានធ្វើកន្លងមក។ តែអ្នកទទួលខុសត្រូវជាន់ខ្ពស់អាមេរិកម្នាក់បានគូសបញ្ជាក់ថា ទាហានអាមេរិកប្រហែលជាមិនធ្វើការដើរល្បាតជាអចិន្ត្រៃយ៍ស្វែងរកពួកឧទ្ទាមតាលីបង់ដូចដែលពួកគេធ្លាប់បានធ្វើកន្លងមកទេ។ យ៉ាងណាក៏ដោយ ការផ្លាស់ប្តូរយុទ្ធសាស្រ្តរបស់លោកអូបាម៉ាពេលនេះត្រូវបានគេមើលឃើញថា គឺមកពីមានការគំរាមកាន់តែខ្លំាងឡើងៗពីអង្គការរដ្ឋអ៊ីស្លាមនៅក្នុងប្រទេសអ៊ីរ៉ាក់ និងស៊ីរី។ ការគំរាមរបស់អង្គការរដ្ឋអ៊ីស្លាមដែលលោកអូបាម៉ាបានទទួលការរិះគន់យ៉ាងខ្លំាងពីការដែលលោកបានសម្រេចដកទ័ពអាមេរិកចេញពីអ៊ីរ៉ាក់ មុននឹងកម្លំាងទ័ពអ៊ីរ៉ាក់រឹងដៃ រឹងជើងអាចការពារខ្លួនដោយខ្លួនឯងបាន។
លោកប្រធានាធិបតីថ្មីអាហ្វហ្វានីស្ថាន Ashraf Ghani ហាក់ដូចមិនបានជំទាស់នឹងការផ្លាស់ប្តូរយុទ្ធសាស្រ្តរបស់លោកអូបាម៉ាទេ ពោលគឺមិនដូចលោកអតីតប្រធានាធិបតី Hamid Karzaï ដែលមិនចង់បន្តទុកវត្តមានកម្លំាងបរទេសក្នុងទឹកដីខ្លួន។ សព្វថ្ងៃនេះ អាមេរិកមានកម្លំាងទាហានរបស់ខ្លួនចំនួន ២៧ ០០០នាក់ដែលកំពុងបំពេញបេសកកម្មក្នុងប្រទេសអាហ្វហ្កានីស្ថាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ