លោកអូបាម៉ាព្រមានដកទ័ពទាំងអស់ចេញពីអាហ្វហ្កានីស្ថាននៅចុងឆ្នាំ២០១៤
ចុះផ្សាយនៅថ្ងៃ៖
ស្តាប់ - ០៥:១៩
នៅក្នុងកិច្ចសន្ទនាតាមទូរស័ព្ទ កាលពីថ្ងៃអង្គារ លោកអូបាម៉ាបានប្រាប់ លោកហាមីដ កាហ្សាយ (Hamid Karzai) ប្រធានាធិបតីអាហ្វហ្កានីស្ថានថា អាមេរិករៀបផែនការដកទ័ពទាំងអស់ចេញពីអាហ្វហ្កានីស្ថាន នៅចុងឆ្នាំ២០១៤នេះ ដោយសារតែលោកកាហ្សាយមិនព្រមចុះហត្ថលេខាលើកិច្ចព្រមព្រៀង ទាក់ទងនឹងវត្តមានទាហានអាមេរិកក្រោយឆ្នាំ២០១៤។
កាលពីដំបូង លោកអូបាម៉ាបានដាក់ចេញនូវផែនការដកកងទ័ពអាមេរិកចេញពីអាហ្វហ្កានីស្ថាន នៅត្រឹមចុងឆ្នាំ២០១៤ ក៏ប៉ុន្តែ គ្រោងរក្សាទុកទាហានខ្លះ ដើម្បីជួយហ្វឹកហ្វឺនទាហានអាហ្វហ្កានីស្ថាន។ អាមេរិកក៏បានរៀបចំកិច្ចព្រមព្រៀងមួយ ជាមួយអាហ្វហ្កានីស្ថាន ដែលគេឲ្យឈ្មោះថា “កិច្ចព្រមព្រៀងសន្តិសុខទ្វេភាគី” (Bilateral Security Agreement)។
យោងតាមកិច្ចព្រមព្រៀងនេះ ក្រោយការដកទ័ពនៅចុងឆ្នាំ២០១៤ អាមេរិកនឹងរក្សាទុកទាហានចំនួន ១៥ ០០០នាក់ នៅក្នុងប្រទេសអាហ្វហ្កានីស្ថាន សម្រាប់រយៈពេល ១០ឆ្នាំ។ កិច្ចព្រមព្រៀងនេះក៏មានចែងផងដែរ អំពីបេសកកម្ម និងដែនសមត្ថកិច្ចរបស់ទាហានអាមេរិក អំពីទំនាក់ទំនងរវាងទាហានអាមេរិក និងអាជ្ញាធរអាហ្វហ្កានីស្ថាន និងអំពីយុត្តាធិការរបស់តុលាការអាហ្វហ្កានីស្ថាន ទៅលើទាហានអាមេរិក។
កិច្ចព្រមព្រៀងនេះត្រូវបានសភាកុលសម្ព័ន្ធអាហ្វហ្កានីស្ថានបានផ្តល់ការយល់ព្រមរួចហើយ ក៏ប៉ុន្តែ លោកកាហ្សាយបដិសេធមិនព្រមចុះហត្ថលេខា។
លោកកាហ្សាយបានជំទាស់ទៅនឹងខ្លឹមសារខ្លះនៃកិច្ចព្រមព្រៀងនេះ ជាពិសេស ទាក់ទងនឹងអំណាចកងទ័ពអាមេរិក ក្នុងការចូលឆែកឆេរនៅពេលយប់ ទៅលើទីតាំងដែលគេសង្ស័យថាមានភេរវជន និងអំពីអភ័យឯកសិទ្ធិរបស់ទាហានអាមេរិក ដែលអាចរួចផុតពីការជំនុំជម្រះរបស់តុលាការអាហ្វហ្កានីស្ថាន មានន័យថា ប្រសិនបើមានទាហានអាមេរិករូបណាប្រព្រឹត្តបទល្មើសអ្វីមួយ តុលាការអាហ្វហ្កានីស្ថានមិនអាចកាត់ទោសបានទេ ដោយគេត្រូវបញ្ជូនទាហាននោះទៅឲ្យតុលាការអាមេរិកកាត់ទោស។
ម្យ៉ាងទៀត គេសង្កេតឃើញថា ទំនាក់ទំនង រវាងលោកកាហ្សាយ និងលោកអូបាម៉ា កំពុងតែមានភាពប្រេះឆាកាន់តែខ្លាំង ជាពិសេស ចាប់តាំងពីលោកកាហ្សាយសម្រេចដោះលែងអ្នកទោសជាច្រើននាក់ ដែលអាមេរិកអះអាងថា សុទ្ធតែជាអ្នកមានបាតដៃប្រឡាក់ឈាមទាហានអាមេរិក។
នៅពេលថ្មីៗចុងក្រោយនេះ លោកកាហ្សាយបានដាក់លក្ខខណ្ឌថា លោកអាចចុះហត្ថលេខាលើកិច្ចព្រមព្រៀងជាមួយអាមេរិកបាន ដរាបណាអាមេរិកសុខចិត្តរៀបចំឲ្យមានដំណើរការសន្តិភាពពិតប្រាកដមួយជាមួយពួកឧទ្ទាមតាលីបង់។
នៅពេលនេះ នៅក្នុងជួរថ្នាក់ដឹកនាំអាមេរិក មិនមានអ្នកណាម្នាក់រំពឹងថា កិច្ចព្រមព្រៀងស្តីពីវត្តមានកងទ័ពអាមេរិកនៅអាហ្វហ្កានីស្ថាន ក្រោយឆ្នាំ២០១៤ អាចនឹងត្រូវចុះហត្ថលេខា នៅមុនការបោះឆ្នោតប្រធានាធិបតីអាហ្វហ្កានីស្ថាន នៅខែមេសាខាងមុខនេះទេ។ គេមើលឃើញកាន់តែច្បាស់ថា លោកកាហ្សាយចង់ទុកសំណុំរឿងនេះឲ្យប្រធានាធិបតីថ្មីជាអ្នកចាត់ចែង។
គួរបញ្ជាក់ថា យោងតាមរដ្ឋធម្មនុញ្ញអាហ្វហ្កានីស្ថាន លោកកាហ្សាយមិនអាចឈរឈ្មោះជាប្រធានាធិបតីមួយអាណត្តិទៀតបានទេ។
ក៏ប៉ុន្តែ គេសង្កេតឃើញថា បេក្ខជនប្រធានាធិបតីអាហ្វហ្កានីស្ថានស្ទើរតែគ្រប់គ្នា ជាពិសេស អ្នកដែលមានលទ្ធភាពច្រើនក្នុងការឈ្នះឆ្នោត សុទ្ធតែបានប្រកាសសន្យាថា គេនឹងចុះហត្ថលេខាលើកិច្ចព្រមព្រៀងជាមួយអាមេរិក នៅពេលបានឡើងកាន់តំណែងជាប្រធានាធិបតី។
ក៏ប៉ុន្តែ កាលពីថ្ងៃអង្គារ លោកអូបាម៉ាបានព្រមានទុកជាមុនថា ប្រសិនបើគេកាន់តែពន្យារពេលក្នុងការចុះហត្ថលេខាលើកិច្ចព្រមព្រៀងនេះ វាកាន់តែមានភាពស្មុគស្មាញច្រើន ក្នុងការរក្សាទុកកងទ័ពអាមេរិក ក្នុងប្រទេសអាហ្វហ្កានីស្ថាន នៅក្រោយឆ្នាំ២០១៤។ ចំនួនទាហានដែលនឹងត្រូវរក្សាទុកអាចនឹងមានតិច ហើយបេសកកម្មអាចនឹងត្រូវកាត់បន្ថយឲ្យនៅតិចជាងអ្វីដែលបានគ្រោងពីមុន។
មន្រ្តីយោធាអាមេរិកបានអះអាងថា ការដកកងទ័ពរាប់ម៉ឺននាក់ រួមជាមួយនឹងគ្រឿងបរិក្ខាយោធារាប់រយពាន់តោន ត្រូវការឲ្យមានផែនការជាច្រើនខែជាមុន ដែលគេចាំបាច់ត្រូវតែសម្រេចពីពេលនេះទៅ។ ម្យ៉ាងវិញទៀត អាមេរិកត្រូវជជែក និងសម្រេចជាមួយនឹងបណ្តាប្រទេសសម្ព័ន្ធមិត្ត ក្នុងអង្គការអូតង់ ចាប់ពីពេលនេះទៅ អំពីវិភាគទានដែលបណ្តាប្រទេសទាំងនេះអាចជួយកងទ័ពអាមេរិក ក្នុងបេសកកម្មនៅអាហ្វហ្កានីស្ថាន ក្រោយឆ្នាំ២០១៤។
ទោះជាយ៉ាងណា គេសង្កេតឃើញថា ទាំងអាមេរិក និងទាំងអាហ្កានីស្ថាន សុទ្ធតែមិនចង់ឲ្យអាមេរិកដកកងទ័ពទាំងស្រុង ពីអាហ្វហ្កានីស្ថាននោះទេ នៅចុងឆ្នាំ២០១៤នេះ ពីព្រោះថា កងទ័ពជាតិអាហ្វហ្កានីស្ថាននៅមិនទាន់មានសមត្ថភាពគ្រប់គ្រាន់នៅឡើយទេ ក្នុងការទប់ទល់នឹងឧទ្ទាមតាលីបង់។
អាហ្វហ្កានីស្ថាននៅតែត្រូវការជំនួយពីអាមេរិក ជាពិសេស ជំនួយយោធារាប់ពាន់លានដុល្លារ ដែលអាមេរិកផ្តល់ដល់អាហ្វហ្កានីស្ថានក្នុងមួយឆ្នាំៗ។ ចំណែកអាមេរិកវិញ ដែលបានចំណាយលុយរាប់ពាន់លានដុល្លារ និងចំណាយអាយុជីវិតទាហានរាប់ពាន់នាក់ ក្នុងការធ្វើសង្រ្គាមនៅអាហ្វហ្កានីស្ថានជាង ១០ឆ្នាំមកហើយនោះ ក៏មិនចង់ដកទ័ពចេញទាំងអស់ ហើយទុកឲ្យអាហ្វហ្កានីស្ថានធ្លាក់ទៅក្នុងស្ថានភាពដូចជាអ៊ីរ៉ាក់បច្ចុប្បន្ននេះដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ