ប្រធានាធិបតីអាមេរិកបំពេញទស្សនកិច្ចជាប្រវត្តិសាស្ត្រនៅម៉ាឡេស៊ី
បន្ទាប់ពីជប៉ុន និងកូរ៉េខាងត្បូង ប្រធានាធិបតីអាមេរិក លោកបារ៉ាក់ អូបាម៉ា បានអញ្ជើញទៅដល់ប្រទេសម៉ាឡេស៊ី នៅរសៀលថ្ងៃសៅរ៍ទី ២៦ មេសា នេះ សម្រាប់ទស្សនកិច្ចរយៈពេលពីរថ្ងៃ។ អាចចាត់ទុកជាទស្សនកិច្ចជាប្រវត្តិសាស្ត្រ ព្រោះនេះជាលើកទីមួយហើយ ដែលប្រធានាធិបតីអាមេរិកបានទៅដល់ទឹកដីម៉ាឡេស៊ី គិតចាប់ពីឆ្នាំ១៩៦៦។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៣
កម្មវត្ថុនៃទស្សនកិច្ច របស់លោកអូបាម៉ា នៅម៉ាឡេស៊ី មិនមែនត្រឹមតែចង់សាកល្បងជំរុញការចរចាភាពជាដៃគូអន្តរប៉ាស៊ីហ្វិកឱ្យមានដំណើរការទៅមុខលឿនប៉ុណ្ណោះទេ តែដំណើរទស្សនកិច្ចមួយជុំដែលត្រូវបញ្ចប់នៅប្រទេសហ្វីលីពីន ដៅជាពិសេសទៅការពង្រឹងវត្តមានអាមេរិកនៅតំបន់អាស៊ី ប្រឈមនឹងការស្ទុះឡើងឥតឈប់ឈររបស់ចិន។
ចំពោះកម្មវត្ថុទីមួយ ពន្លឿនសន្ធិសញ្ញាសេដ្ឋកិច្ចអន្តរប៉ាស៊ីហ្វិក ដែលជាសន្ធិសញ្ញាដ៏សំខាន់ពុំធ្លាប់មានពីមុន ដែលប្រមូលផ្តុំដោយប្រទេសនៅជុំវិញមហាសមុទ្ទប៉ាស៊ីហ្វិក ចំនួន១២ប្រទេស ពោលគឺស្មើនឹងជាង៤០%នៃផលិតផលសរុបរបស់ពិភពលោក។ សម្រាប់សហរដ្ឋអាមេរិក ដៃគូអន្តរប៉ាស៊ីហ្វិក (ជាបន្តុំប្រជាជន២០០លាននាក់) ប្រសិនបើបង្កើតចេញនឹងក្លាយជាទីផ្សារនាំចេញលំដាប់ទីបួន។ ម៉ាឡេស៊ី ប្រទេសដៃគូមួយ បានចុះហត្ថលេខាព្រមព្រៀងហើយ ប៉ុន្តែបក្សប្រឆាំង អាចជារនាំង មិនស្វាគមន៍ផែនការសេដ្ឋកិច្ចនេះទេ។
លោកប្រធានាធិបតីអាមេរិក ក៏នឹងឆ្លៀតឱកាសនេះ លើកឡើងអំពីបញ្ហាសិទ្ធិមនុស្សដែរ ព្រោះ អង្គការយូមែន រាយវច បានអំពាវនាវឱ្យលោកអូបាម៉ា និយាយចំៗច្បាស់ទៅកាន់អាជ្ញាធរម៉ាឡេស៊ី ដែលតែងបៀតបៀនបក្សប្រឆាំង ប្រើអំពើហិង្សា បង្ក្រាប បំភ័យហួសហេតុប្រឆាំងនឹងបាតុករ ក្រុមជនជាតិពិន្ធុ ឬសាសនាភាគតិច។
លោក អូបាម៉ា គឺជាប្រធានាធិបតីអាមេរិកទីមួយ ដែលអញ្ជើញទៅម៉ាឡេស៊ី ក្នុងរយៈពេលជិត៥០ឆ្នាំចុងក្រោយនេះ។ ដូច្នេះនេះជាឱកាសសម្រាប់អាមេរិកត្រូវកាយកប់អតីតកាល មិនល្អូកល្អើន ដោយផ្តល់ជាការលើកទឹកចិត្ត បំប៉ោងចំណងមិត្តភាពដល់ប្រជាជាតិមួយដែលមានបណ្តាជនភាគច្រើនជាអ្នកកាន់សាសនាអ៊ីស្លាម សមស្រប។ ហើយសម្រាប់រដ្ឋាភិបាលវិញ លោកនាយករដ្ឋមន្ត្រីម៉ាឡេស៊ី រំពឹងលើវត្តមានលោកអូបាម៉ា ដើម្បីស្តារប្រជាប្រិយភាពដែលត្រូវរងការរិះគន់យ៉ាងខ្លាំង ក្រោយគ្រោះថ្នាក់ធ្លាក់យន្តហោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ