ទស្សនកិច្ចអូបាម៉ានៅសេអ៊ូល ក្រោមការគម្រាមសាកល្បងនុយក្លេអ៊ែរពីសំណាក់ក្រុងព្យុងយ៉ាង
ចុះផ្សាយនៅថ្ងៃ៖
ស្តាប់ - ០៥:៤៧
ក្រោយបានទស្សនកិច្ចនៅជប៉ុនរួចមក នៅថ្ងៃសុក្រនេះ ប្រធានាធិបតីអាមេរិកអូបាម៉ា បានបន្តដំណើរទស្សនកិច្ចរបស់លោក ទៅក្រុងសេអ៊ូលកូរ៉េខាងត្បូង។ លោកអូបាម៉ានឹងធានាអះអាងដល់ប្រធានាធិបតីប៉ាក់ គុនហឺថា អាមេរិកនឹងដាក់សម្ពាធលើមេដឹកនាំកូរ៉េខាងជើង ដើម្បីអោយកូរ៉េខាងជើងបោះបង់ចោលកម្មវិធីនុយក្លេអ៊ែរ។ រូបភាពជាច្រើនថតបានដោយផ្កាយរណប កាលពី២ថ្ងៃមុននេះ បង្ហាញពីសកម្មភាពនានា នៅមជ្ឈមណ្ឌលនុយក្លេអ៊ែរ ពុងហ្គី-រី Punggye-ri នៅកូរ៉េខាងជើង ធ្វើអោយគេសន្និដ្ឋានថា កូរ៉េខាងជើងប្រហែលជាកំពុងរៀបចំសាកល្បងនុយក្លេអ៊ែរជាលើកទី៤ទៀត។ នៅថ្ងៃសុក្រនេះ ប្រធានាធិបតីអាមេរិកបានព្រមានកូរ៉េខាងជើងអោយប្រុងប្រយ័ត្ន ករណីមានការសាកល្បងនុយក្លេអ៊ែរក្រោមដីជាថ្មីទៀត នោះសហគមន៍អន្តរជាតិនឹងចាត់វិធានការដាច់ខាតតបតទៅវិញមិនខាន។ ទស្សនកិច្ចរបស់លោក អូបាម៉ា ក៏ធ្វើឡើងចំពេលប្រជាជនកូរ៉េខាងត្បូងកំពុងរងទុក្ខដោយហេតុការណ៍លិចសាឡាង ដែលមានជនរងគ្រោះរាប់រយនាក់ សុទ្ធតែជាយុវជនសិស្សសាលាផងដែរ។
តើកូរ៉េខាងជើងអាចនឹងសាកល្បងនុយក្លេអ៊ែរ ដើម្បីស្វាគមន៍លោកអូបាម៉ា ក្នុងដំណើរទស្សនកិច្ចរបស់លោក នៅអាស៊ីដែរទេ ?
កូរ៉េខាងត្បូងបានអោយដំណឹង នៅសប្តាហ៍នេះដែរថា នៅមជ្ឈមណ្ឌលពុងហ្គី-រី Punggye-ri កូរ៉េខាងជើងប្រហែលជាកំពុងរៀបចំគ្រឿងផ្ទុះ ដើម្បីសាកល្បងនុយក្លេអ៊ែរក្រោមដីជាថ្មីទៀត។ មើលទៅ។ ក្នុងសន្និសីទសារព័ត៌មាននៅក្រុងសេអ៊ូល ថ្ងៃសុក្រនេះ ប្រធានាធិបតីអាមេរិកបានព្រមានកូរ៉េខាងជើងថា ការគម្រាមកំហែងនុយក្លេអ៊ែរនេះ គឺមិនផ្តល់ប្រយោជន៍អ្វីទាំងអស់ដល់កូរ៉េខាងជើង។ លោកអូបាម៉ាប្រាប់រួចហើយថា សហគមន៍អន្តរជាតិនឹងតបតវិញចៀសមិនរួចទេ ករណីមានការសាកល្បងនុយក្លេអ៊ែរ ជាថ្មីទៀតនោះ។ កន្លងមក កូរ៉េខាងជើងបានសាកល្បងនុយក្លេអ៊ែរ៣លើករួចមកហើយ គឺម្តងនៅខែតុលា ឆ្នាំ២០០៦ ម្តងទៀតនៅខែឧសភាឆ្នាំ២០០៩ ហើយលើកចុងក្រោយ គឺនៅដើមខែកុម្ភៈ ឆ្នាំ២០១៣ ឆ្នាំមុននេះឯង។ ក្រោយការសាកល្បងម្តងៗ ក្រុងព្យុងយ៉ាងតែងតែទទួលទណ្ឌកម្មធ្ងន់ពីសហគមន៍អន្តរជាតិ។ ប៉ុន្មានសប្តាហ៍ចុងក្រោយនេះ ក្រុងព្យុងយ៉ាងក៏បានបាញ់មីស៊ីលរយៈចំងាយខ្លី ជាច្រើនដើមផងដែរ។
អ្នកវិភាគនានាគិតថា ការដែលក្រុងព្យុងយ៉ាងបង្ហាញ សកម្មភាពអស់នេះ រួមទាំងសកម្មភាពនៅមជ្ឈមណ្ឌលនុយក្លេអ៊ែរ ពុងហ្គី-រី Punggye-ri នោះ ប្រហែលគ្រាន់តែជាការគម្រាម ដើម្បីអោយដំណើរទស្សនកិច្ចលោកអូបាម៉ា នៅកូរ៉េខាងត្បូង ពិសេសនៅអាស៊ីតែម្តង ជួបស្ថានភាពរអាក់រអួលប៉ុណ្ណោះ។ ក្រុងព្យុងយ៉ាងមិនហ៊ានធ្វើអ្វីធ្ងន់ធ្ងរទេ ព្រោះថា បើហ៊ានសាកល្បងនុយក្លេអ៊ែរ រឺបាញ់មីស៊ីលនៅពេលនេះ ចិនជាប្រទេសសម្ព័ន្ធមិត្តកូរ៉េខាងជើងអាចនឹងខឹងសម្បារបាន។ ចិនធ្លាប់បារម្ភម្តងហើយ កាលពីខែមិនាមុននេះ ពេលកូរ៉េខាងជើងបានបាញ់មីស៊ីលមួយដើម ក្នុងច្រកដែនអាកាសរបស់យន្តហោះចិនមួយគ្រឿង។
ស្ថិតក្រោមទណ្ឌកម្មសេដ្ឋកិច្ចរបស់សហគមន៍អន្តរជាតិ សេដ្ឋកិច្ចកូរ៉េខាងជើងពឹងផ្អែកលើចិនច្រើន ដូច្នេះ បើចិនខឹង នោះកូរ៉េខាងជើងជាអ្នកខាតបង់ទៅវិញទេ។ ម្យ៉ាងទៀត អាមេរិកក៏បានសុំអោយចិនជួយជំរុញអោយកូរ៉េខាងជើងអោយបន្ទន់ឥរិយាបថខ្លួនផងដែរ។
កន្លងមក កូរ៉េខាងជើងបាញ់មីស៊ីលរយៈចំងាយខ្លីជាច្រើនដើម ដើម្បីតបតទៅនឹងសមយុទ្ធយោធារួមគ្នារវាងអាមេរិក និងកូរ៉េខាងត្បូងប៉ុណ្ណោះ។ ប្រសិនបើមានសកម្មភាពណាមួយពីក្រុងព្យុងយ៉ាង ក្នុងដំណើរទស្សនកិច្ចប្រធានាធិបតីអាមេរិក នៅអាស៊ីពេលនេះ នោះមានន័យថា កូរ៉េខាងជើងប្រហែលចង់អោយអាមេរិក ពិសេសសហគមន៍អន្តរជាតិ គិតគូរឡើងវិញពីកិច្ចចរចា៦ភាគី មានប្រទេសកូរ៉េទាំង២ រុស្ស៊ី ចិន ជប៉ុននិងអាមេរិក ជាកិច្ចចរចាដែលបានផ្អាកកាលពីឆ្នាំ២០០៨នោះ។ ព្រោះថា កិច្ចចរចានេះមានទិសដៅអោយក្រុងព្យុងយ៉ាងបញ្ឍប់កម្មវិធីនុយក្លេអ៊ែររបស់ខ្លួន ជាការផ្តោះប្តូរនឹងជំនួយសេដ្ឋកិច្ច។
ក្នុងទស្សនកិច្ចនេះ លោកអូបាម៉ាបង្ហាញ ថា អាមេរិកត្រូវការចិនចាំបាច់ដើម្បីជម្រុញកូរ៉េខាងជើងអោយបញ្ឈប់កម្មវិធីនុយក្លេអ៊ែរ
លោកអូបាម៉ាមិនបានគ្រោងជាន់ទឹកដីចិនក្នុងទស្សនកិច្ចនៅអាស៊ីទេ។ ពេលនេះ លោកអូបាម៉ាហាក់បានបន្ទន់ឥរិយាបថចំពោះចិនវិញ។ ដើម្បីសម្រេចអោយបាននូវការធានាដល់កូរ៉េខាងត្បូងថា អាមេរិកបន្តដាក់សម្ពាធអោយកូរ៉េខាងជើងបញ្ឈប់សកម្មភាពនុយក្លេអ៊ែរ លោកអូបាម៉ាត្រូវការចិនចៀសមិនរួច ព្រោះចិនជាសម្ព័ន្ធមិត្តកូរ៉េខាងជើង។ លោកអូបាម៉ាលើកឡើងថា ចិនដឹងច្បាស់ណាស់ថា នុយក្លេអ៊ែរកូរ៉េខាងជើង គម្រាមសន្តិសុខចិន។ អ្នកជំនាញនានាប្រាប់ថា កូរ៉េខាងជើងមានសម្ភារៈ និងធាតុភ្លុយតូនីញុំគ្រប់គ្រាន់ ដើម្បីផលិតគ្រាប់បែកបរមាណូ វាយប្រហារប្រទេសជិតខាង។ កូរ៉េខាងត្បូងជាសត្រូវកូរ៉េខាងជើង កន្លងមក ក៏ធ្លាប់គ្រោងផលិតមីស៊ីលបាញ់បានចំងាយកាន់តែឆ្ងាយ ប្រឈមនឹងក្រុងព្យុងយ៉ាងផងដែរ។ ដូច្នេះ នៅអាស៊ី បើបងប្អូនកូរ៉េទាំង២ក្អេងក្អាងដាក់គ្នាកាន់តែខ្លាំង ហើយបើមានហេតុការណ៍អ្វីកើតឡើង អាមេរិកខ្លួនឯងមិនអាចទប់ជួយសម្ព័ន្ធមិត្តកូរ៉េខាងត្បូង បានតែម្នាក់ឯងនោះទេ មានតែត្រូវការចិនជួយ។
ការបន្ទន់ជំហរនេះ ក៏អាចថា ជាយុទ្ធសាស្ត្រលោកអូបាម៉ាដើម្បីបន្ថយភាពតានតឹងរវាងអាមេរិកជាមួយចិនផងដែរ ព្រោះថា ម្សិលមិញនេះ ក្នុងទស្សនកិច្ចនៅជប៉ុន លោកអូបាម៉ាបានបង្ហាញជំហរជួយការពារជប៉ុន ករណីមានការវាយប្រហារពីប្រទេសទី៣។ ជប៉ុននិងចិនឈ្លោះគ្នាដណ្តើមប្រជុំកោះសេនកាគូ ដូច្នេះ ការធានាជួយការពារជប៉ុនមិនបានធ្វើអោយចិនសប្បាយចិត្តនោះទេ។ ម្យ៉ាងទៀត ទស្សនកិច្ចរបស់លោកអូបាម៉ានៅជប៉ុនម្សិលមិញនេះ មិនបានសម្រេចចេញកិច្ចព្រមព្រៀងពាណិជ្ជកម្មសេរីទ្វេភាគីជាមួយជប៉ុន ដូចការគ្រោងទុកនោះទេ។ ជប៉ុននិងអាមេរិកខ្វែងគំនិតគ្នា លើការលុបរនាំងពន្ធគយផលិតផលនាំចូលក្នុងស្រុក។ អាមេរិកនិងជប៉ុនសុទ្ធតែជាប្រទេសមហាអំណាចសេដ្ឋកិច្ច សុទ្ធតែជាគូរប្រជែងនឹងគ្នា។
ក្នុងទស្សនកិច្ចរបស់លោកអូបាម៉ា ជប៉ុនក៏ដឹងដែរថា កូរ៉េខាងត្បូងដែលមានភាពតានតឹងជាមួយខ្លួននោះ ក៏ជាសម្ព័ន្ធមិត្តរបស់អាមេរិកដូចខ្លួនដែរ។ ដូច្នេះ ជប៉ុនចង់យកបញ្ហាកិច្ចព្រមព្រៀងពាណិជ្ជកម្មទ្វេភាគីនេះធ្វើជាគន្លឹះដាក់សម្ពាធអាមេរិក នៅពេលក្រោយទៀត។
លោកអូបាម៉ាប្រហែលជាស្តាយក្រោយហើយ ដោយសារមិនត្រឹមមិនបានសម្រេចចេញកិច្ចព្រមព្រៀងពាណិជ្ជកម្មជាមួយជប៉ុនទេ ថែមទាំងបានធ្វើអោយចិនទាស់ចិត្ត ដោយសារខ្លួនធានាការពារសន្តិសុខអោយជប៉ុន។ ពេលនេះ អាមេរិកត្រូវតែបន្ទន់ឥរិយាបថជាមួយចិនមួយកម្រិតមកវិញ ព្រោះថា ចិនក៏អាចដាក់សម្ពាធប្រទេសផ្សេងទៀតនៅអាស៊ីផងដែរ។ ហើយការបន្ទន់ឥរិយាបថចំពោះចិន ក៏ដើម្បីដាក់សម្ពាធទៅជប៉ុនវិញ ដើម្បីព្រមានជប៉ុនដែរថា ថ្វីបើជប៉ុនបង្កឧបសគ្គដល់ការចរចាបង្កើតតំបន់ពាណិជ្ជកម្មសេរីក្តី អាមេរិកអាចចាប់ដៃចិនដែលជាសត្រូវជប៉ុនបានគ្រប់ពេល។
ដោយឡែក នៅកូរ៉េខាងត្បូង កន្លងមក ប្រធានាធិបតីប៉ាក់ គុនហឺ បានរៀបចំផែនការ ចង់អោយមានការបង្រួបបង្រួមជាមួយកូរ៉េខាងជើង។ បើកូរ៉េទាំង២រួបរួមគ្នា ក៏អាចដាក់សម្ពាធជប៉ុន អាចជាប្រយោជន៍ដល់យុទ្ធសាស្ត្រអាមេរិកនៅអាស៊ីផងដែរ។ ក្នុងទស្សនកិច្ចនៅអាស៊ីពេលនេះ លោកអូបាម៉ាមានតែធ្វើយ៉ាងណាបន្ធូរបន្ថយភាពតានតឹងរវាងប្រទេសក្នុងតំបន់ ដើម្បីបន្តជំហរអាមេរិកនៅអាស៊ីប៉ាស៊ីហ្វិកទៀតប៉ុណ្ណោះ។ គួរបញ្ជាក់ដែរថា បន្ទាប់ពីកូរ៉េខាងត្បូង លោកអូបាម៉ានឹងបន្តដំណើរទៅម៉ាឡេស៊ី និងហ្វីលីពីនទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ