ក្រុមព័ត៌មានគណៈរដ្ឋមន្ត្រី ចុះផ្សាយអត្ថបទនិយាយពីបាតុកម្មរបស់គណបក្សប្រឆាំង
តាំងតែពីយប់មិញថ្ងៃអាទិត្យ គេឃើញគេហទំព័រព័ត៌មានរបស់ទីស្តីការគណៈរដ្ឋមន្ត្រី បានចុះផ្សាយបន្តអត្ថបទជាភាសាអង់គ្លេសចំនួន២របស់ទីភ្នាក់ងារព័ត៌មានបរទេសដែលនិយាយអំពីបាតុកម្មទ្រង់ទ្រាយធំចុងក្រោយរបស់គណបក្សសង្គ្រោះជាតិ។ អត្ថបទជាភាសាអង់គ្លេសរបស់ទីភ្នាក់ងារ Reuters បានដាក់ចំណងជើងថា ពលរដ្ឋកម្ពុជាដង្ហែក្បួនទាមទារអោយលោកនាយករដ្ឋមន្ត្រីចុះចេញពីអំណាច។ អ្នកនាំពាក្យអង្គភាពព័ត៌មាននិងប្រតិកម្មរហ័សរបស់ទីស្តីការគណៈរដ្ឋមន្ត្រី លោកទិតសុធាបានពន្យល់ថា ការចុះផ្សាយអត្ថបទទាំងនេះគឺរដ្ឋាភិបាលគ្រាន់តែចង់បង្ហាញអំពីស្ថានការណ៍នយោបាយនៅកម្ពុជាតាមរយៈកាសែតបរទេសតែប៉ុណ្ណោះ។
ចុះផ្សាយនៅថ្ងៃ៖
ស្តាប់ - ០១:៣៣
ប្រសិនបើវាជាករណីដ៏កម្រ ដែលគេហទំព័ររបស់ ទីស្តីការគណៈរដ្ឋមន្ត្រី (www.pressocm.com.kh) ផ្សព្វផ្សាយបន្តអត្ថបទរបស់ទីភ្នាក់ងារព័ត៌មានបរទេសដែលនិយាយអំពី បាតុកម្មទាមទាររបស់គណបក្សប្រឆាំងនោះ វាគឺជាកំណែទម្រង់មួយនៃវិស័យព័ត៌មានដែលស្ថានប័នរដ្ឋមួយនេះ ចង់បាន និងជាការបង្ហាញរបស់អំពីស្ថានភាពនយោបាយនៅកម្ពុជា តាមរយៈសារព័ត៌មានបរទេសតែប៉ុណ្ណោះ។ នេះគឺជាការពន្យល់របស់លោកទិត សុធា អ្នកនាំពាក្យអង្គភាពព័ត៌មាន និងប្រតិកម្មរហ័សរបស់ទីស្តីការគណៈរដ្ឋមន្ត្រី។
វាអាចជាការភ្ញាក់ផ្អើលមួយសម្រាប់អ្នកតាមដានព័ត៌មាន ខណៈដែលអត្ថបទកាសែតជាភាសាអង់គ្លេសរបស់ទីភ្នាក់ងារReuters ដែលមានចំណងជើងថា «ពលរដ្ឋកម្ពុជារាប់ម៉ឺននាក់ហែក្បួនទាមទារអោយលោកនាយករដ្ឋមន្ត្រី ចុះចេញពីអំណាច» ត្រូវបានបង្ហោះផ្សាយនៅលើគេហទំព័រព័ត៌មានរបស់ស្ថានប័នកំពូលរបស់ រដ្ឋាភិបាល។
ប៉ុន្តែលោកទិត សុធា មន្ត្រី ជាន់ខ្ពស់របស់ទីស្តីការគណៈរដ្ឋមន្ត្រីពន្យល់ប្រាប់គេហទំព័រថ្មីៗ នៅព្រឹកថ្ងៃចន្ទនេះតាមទូរសព្ទយ៉ាងដូច្នេះ៖«វាមិនមែនជាជំហររបស់ រដ្ឋាភិបាល តាមអត្ថន័យនៃអត្ថបទកាសែតបរទេសដែលត្រូវបានគេចុះផ្សាយនោះទេ។ យើងគ្រាន់តែចង់បង្ហាញព័ត៌មានអំពីប្រទេសកម្ពុជា តាមរយៈសារព័ត៌មានបរទេសតែប៉ុណ្ណោះ។ ឧទាហរណ៍ ជុំវិញស្ថានភាពនយោបាយកម្ពុជាបច្ចុប្បន្ន តើកាសែតបរទេសគេយល់យ៉ាងម៉េច? នេះទីមួយ។ ទី២ យើងចង់បង្ហាញអំពីភាពទូលំទូលាយនៃព័ត៌មាន។ ហើយនេះគឺជាផ្នែកមួយនៃការលើកស្ទួយវិស័យសារព័ត៌មានដែរ»។
នៅលើទំព័រដើមនៃគេហទំព័រព័ត៌មានរបស់ទីស្តីការគណៈរដ្ឋមន្ត្រី (http://www.pressocm.gov.kh) អត្ថបទកាសែតជាភាសាអង់គ្លេសទាំងពីរបានលេចឡើងនៅផ្នែកខាងស្តាំ ក្រោមខ្ទង់ដែលមានសរសេរថា ព័ត៌មានថ្មីៗ។ ហើយនៅផ្នែកខាងក្រោមនៃទំព័រដើមនេះ ក៏មានប្រអប់មួយសរសេរថា «កម្ពុជាពីកាសែតបរទេស» ដែលស្ថិតនៅក្រោមផ្នែកនៃបណ្តុំឯកសារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ