អ្នកជំនាញ២០០នាក់ប្រជុំគ្នានៅអង្គការសុខភាពពិភពលោកស្វែងរកថ្នាំព្យាបាលមេរោគអេបូឡា
អ្នកជំនាញផ្នែកឱសថបានជួបប្រជុំគ្នាបន្ទាន់ រយៈពេលពីរថ្ងៃ នៅទីស្នាក់ការអង្គការសុខភាពពិភពលោក ក្នុងទីក្រុងហ្សឺណែវប្រទេសស្វីស ដើម្បីស្វែងរកថ្នាំព្យាបាលជំងឺអេបូឡា ដែលកំពុងតែយាយីអាយុជីវិតប្រជាជននៅតំបន់ភាគនិរិតីទ្វីបអាហ្វ្រិក។ សេចក្តីសង្ឃឹមថាអាចមានថ្នាំកំចាត់មេរោគអេបូឡា កំពុងតែរះសន្សឹមៗហើយ ថ្វីត្បិតតែគេត្រូវត្រូវឆ្លងកាត់នូវដំណាក់កាល ពិសោធន៍ សំខាន់ៗផ្សេងទៀតក៏ដោយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៨
នៅថ្ងៃទី៤ កញ្ញា នៅទីស្នាក់ការអង្គការសុខភាពពិភពលោក ក្នុងទីក្រុងហ្សឺណែវ មានការប្រជុំជាបន្ទាន់ ដោយមានការចូលរួមពីបណ្តាអ្នកជំនាញផ្នែកឱសថ ចំនួន២០០នាក់។ អ្នកជំនាញទាំងនេះ នឹងជួបប្រជុំគ្នារយៈពេលពីរថ្ងៃ ដើម្បីពិភាក្សា ស្វែងរកថ្នាំដែលអាចព្យាបាលអ្នកជំងឺអេបូឡា ឲ្យជាសះស្បើយ។ សូមបញ្ជាក់ថា ជំងឺអេបូឡាបានឆក់យកជីវិតប្រជាជនអាហ្វ្រិក ចំនួនជិត២ពាន់នាក់ហើយ ហើយអ្នកដែលកំពុងផ្ទុកមេរោគនេះមានចំនួន ៣៥០០នាក់ផ្សេងទៀត។
រហូតមកដល់ពេលនេះ នៅមិនទាន់មានថ្នាំព្យាបាល ដែលមានប្រសិទ្ធិភាពក្នុងការកំចាត់មេរោគអេបូឡា ដែលគេដាក់ឲ្យប្រើប្រាស់ជាផ្លូវការនោះទេ។ ប៉ុន្តែ មានថ្នាំជាច្រើនប្រភេទ ដែលកំពុងតែត្រូវបានគេធ្វើការពិសោធន៍។ អ្នកជំនាញផ្នែកឱសថ នឹងសម្រេច ថាតើថ្នាំណាមួយ ដែលអាចដាក់ឲ្យធ្វើការប្រើប្រាស់សាកល្បងនៅអាហ្រ្វិក។ អង្គការសុខភាពពិភពលោក បានកំណត់ថ្នាំព្យាបាលចំនូន៨ប្រភេទ និងវ៉ាក់សាំង ២ប្រភេទទៀត ក្នុងការបង្ការមិនឲ្យឆ្លងមេរោគអេបូឡា។ ថ្នាំទាំងនោះ នឹងត្រូវឆ្លងកាត់ការពិសោធន៍យ៉ាងម៉ត់ចត់បំផុត មុននឹងត្រូវបានគេដាក់ឲ្យប្រើប្រាស់។
តាមពិតទៅ ជាច្រើនសប្តាហ៍កន្លងមកហើយ ដែលអង្គការសុខភាពពិភពលោក បានទទួលសម្នើជាច្រើនពីបណ្តា សហគ្រាសផលិតឱសថធំៗ ប៉ុន្តែគេត្រូវរងចាំឲ្យមាន ការសិក្សាស្រាវជ្រាវឲ្យបានច្បាស់លាស់ អំពីផលវិបាករបស់ថ្នាំទាំងនោះ ទៅលើសុខភាពរបស់អ្នកជំងឺ ហើយនិង អំពីប្រសិទ្ធិភាពរបស់ថ្នាំទាំងនោះ ក្នុងការព្យាបាលមេរោគអេបូឡា ថាវាមានដល់កម្រឹតណា។ មានន័យថា ថ្នាំទាំងនោះ ត្រូវតែឆ្លងកាត់ការធ្វើពិសោធន៍ជាមួយសត្វស្វាជាមុនសិន។ អង្គការសុខភាពពិភពលោក កំពុងតែពន្លឿននិតិវិធីទាំងអស់នេះ។
ទោះបីជាយ៉ាងណា ក្នុងពេលនេះ ថ្នាំដែលគេផលិតបាន នៅមានចំនូនតិចតួចណាស់ មិនអាចឆ្លើយតបទៅនឹងតម្រូវការជាក់ស្តែងបានទេ។ ថ្នាំគ្រាប់ទាំងនោះ មិនមែនផលិតមួយថ្ងៃបានទេ គឺគេត្រូវការពេលវេលាយូរ ដើម្បីបណ្តុះសារធាតុថ្នាំ នៅក្នុងបន្ទប់ពិសោធន៍។ មួយវិញទៀត អង្គការសុខភាពពិភពលោក ត្រូវតែកំណត់ឲ្យបានច្បាល់លាស់ នូវរបៀបវារៈនៃការចែកចាយថ្នាំទាំងនោះ នៅពេលដែលផលិតបានហើយ ដោយគោរពនូវគោលការណ៍ស្មើភាព និងមនុស្សធម៌។ ពោលគឺកំណត់ថាត្រូវដាក់ឲ្យប្រើបា្រស់នៅតំបន់ណា ប្រទេសណា ចំនួនប៉ុន្មាន ហើយវិជ្ជបញ្ជារត្រូវតែគោរពឲ្យបានតឹងរឹង ជៀសវាងការចែកចាយដោយខ្ជះខ្ជាយ ហើយទីបំផុតថ្នាំដែលមានតិចតួច មិនបានធ្លាក់ដល់ដៃអ្នកជំងឺ ដែលកំពុងតែប្រឈមនឹងការបាត់បង់ជីវិត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ