ប៉ាគីស្ថានសរសើរទំនាក់ទំនងជាមួយចិនក្នុងពេលកំពុងប្រេះឆាជាមួយអាមេរិក
នៅថ្ងៃអង្គារនេះ លោកយូស៊ូហ្វ រ៉ាហ្សា ហ្គីឡានី (Youssouf Raza Gilani) នាយករដ្ឋមន្រ្តីប៉ាគីស្ថានបានចាប់ផ្តើមទស្សនកិច្ចផ្លូវការ ទៅកាន់ប្រទេសចិន។ នៅមុនពេលចេញដំណើរទៅកាន់ប្រទេសចិន លោកហ្គីឡានី បានប្រាប់បណ្តាញសារព័ត៌មានចិនស៊ីនហួថា ចិនគឺជាមិត្តដ៏ល្អបំផុតរបស់ប៉ាគីស្ថាន។ ការលើកសរសើរអំពីទំនាក់ទំនងជាមួយចិននេះត្រូវបានធ្វើឡើង នៅក្នុងពេលដែលទំនាក់ទំនងប៉ាគីស្ថាន-អាមេរិកកំពុងតែជួបនឹងភាពតានតឹងខ្លាំង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥១
ដំណើរទស្សនកិច្ចរបស់លោកហ្គីឡានីនឹងត្រូវចាប់ផ្តើម នៅទីក្រុងសៀងហៃ មុននឹងធ្វើដំណើរទៅរដ្ឋធានីប៉េកាំង នៅថ្ងៃពុធស្អែក។ នៅប៉េកាំង លោកហ្គីឡានីនឹងត្រូវជួបជាមួយលោកប្រធានាធិបតីចិន ហ៊ូ ជិនតាវ និងលោកនាយករដ្ឋមន្រ្តី វេន ជៀប៉ាវ។ ភាគីទាំងពីរគ្រោងនឹងចុះហត្ថលេខាលើកិច្ចព្រមព្រៀងមួយចំនួន ហើយគ្រោងនឹងពិភាក្សាគ្នា អំពីវិធានការប្រយុទ្ធប្រឆាំងនឹងក្រុមអ៊ីស្លាមជ្រុលនិយម។
ដំណើរទស្សនកិច្ចរបស់នាយករដ្ឋមន្រ្តីប៉ាគីស្ថាន ទៅកាន់ប្រទេសចិន បានប្រព្រឹត្តទៅតែពីរសប្តាហ៍ប៉ុណ្ណោះ ក្រោយពីកងកុម្ម៉ង់ដូអាមេរិកបានចូលទៅសម្លាប់ប៊ិនឡាដិន ដល់ក្នុងទឹកដីប៉ាគីស្ថាន ដោយមិនបានប្រាប់អាជ្ញាធរម្ចាស់ផ្ទះឲ្យដឹងជាមុន។ ប៉ាគីស្ថានបានហៅប្រតិបត្តិការរបស់កងកុម្ម៉ង់ដូអាមេរិកថាជាការរំលោភលើអធិបតេយ្យភាពរបស់ប៉ាគីស្ថាន។ ចំណែកអាមេរិកវិញកំពុងតែសង្ស័យថា ការណ៍ដែលប៊ិនឡាដិនអាចលាក់ខ្លួននៅក្បែររដ្ឋធានីប៉ាគីស្ថាន គឺប្រហែលជាមកពីមានមន្រ្តីប៉ាគីស្ថានជាអ្នកជួយបិទបាំង។
កាលពីថ្ងៃចន្ទ ម្សិលមិញ នៅក្នុងដំណើរទស្សនកិច្ចទៅកាន់ប្រទេសប៉ាគីស្ថាន លោកចន ឃែរី (John Kerry) សមាជិកព្រឹទ្ធសភាអាមេរិកបានទាមទារឲ្យអាជ្ញាធរប៉ាគីស្ថានធ្វើសកម្មភាពប្រយុទ្ធប្រឆាំងនឹងភេរវកម្មដោយពិតប្រាកដ មិនមែនគ្រាន់តែនិយាយតែមាត់នោះទេ។ លោកឃែរីក៏បានបញ្ជាក់ផងដែរថា នៅពេលនេះ សភាអាមេរិកកំពុងតែសើរើមើលឡើងវិញនូវជំនួយរាប់ពាន់លានដុល្លារ ដែលអាមេរិកផ្តល់ទៅឲ្យប៉ាគីស្ថានជារៀងរាល់ឆ្នាំ។
ស្ថិតក្នុងសភាពតានតឹងជាមួយអាមេរិកបែបនេះ ប៉ាគីស្ថានកំពុងតែងាកទៅបង្កើនទំនាក់ទំនងជាមួយចិន ដែលធ្លាប់ជាមិត្តចាស់ឆ្នាំ។ លោកហ្គីឡានីបានប្រាប់បណ្តាញសារព័ត៌មានស៊ីនហួថា ប៉ាគីស្ថានអរគុណចិន ដែលតែងតែគាំទ្រប៉ាគីស្ថាន ទោះបីស្ថិតក្នុងកាលៈទេសៈពិបាកបែបណាក៏ដោយ។ ហេតុដូច្នេះហើយទើបប៉ាគីស្ថានយល់ថា ចិនគឺជាមិត្តពិតប្រាកដ ដែលចេះជួយគ្នាក្នុងគ្រាក្រ។
គួរបញ្ជាក់ថា កាលពីសប្តាហ៍មុន ប៉ាគីស្ថានទើបនឹងបានដាក់ឲ្យដំណើរការរោងចក្រអគ្គិសនីនុយក្លេអ៊ែរមួយកន្លែង ដែលចិនជួយសាងសង់។ ប៉ាគីស្ថានក៏បានបញ្ជាក់ផងដែរថា ចិនបានព្រមព្រៀងថា នឹងជួយសាងសង់រ៉េអាក់ទ័រនុយក្លេអ៊ែរចំនួនពីរបន្ថែមទៀតឲ្យប៉ាគីស្ថាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ