តម្លៃម្ចាស់ឆ្នោតដែលអ្នកនយោបាយគួរមើលឲ្យច្បាស់!
ចុះផ្សាយនៅថ្ងៃ៖
ស្តាប់ - ០៥:១៥
ទោះបីជាវិបត្តិនយោបាយក្រោយការបោះឆ្នោតនៅតែមិនទាន់អាចដោះស្រាយចេញ ក៏ប៉ុន្តែ គណបក្សជាប់ឆ្នោតទាំងពីរមិនភ្លេចអ្នកបោះឆ្នោតរបស់ខ្លួនទេ។ ការចុះទៅដល់មូលដ្ឋានដើម្បីស្តាប់មតិនិងជួយដោះស្រាយបញ្ហារបស់ម្ចាស់ឆ្នោតគឺជារបៀបវារៈជួរមុខរបស់គណបក្សកាន់អំណាចក៏ដូចជាគណបក្សប្រឆាំង។ នេះសបញ្ជាក់ឲ្យឃើញថា អ្នកនយោបាយបានផ្តើមយល់អំពីតម្លៃរបស់ប្រជាពលរដ្ឋកាន់តែខ្លាំងជាងមុន។ ប៉ុន្តែ តើអ្វីទៅជាតម្លៃពិតប្រាកដរបស់ម្ចាស់ឆ្នោតក្នុងក្រសែភ្នែកអ្នកនយោបាយ?
ជាទូទៅ រដូវបោះឆ្នោតគឺជាពេលវេលាដែលអ្នកនយោបាយនាំគ្នាសកម្មក្នុងការចុះជួបប្រជាពលរដ្ឋម្ចាស់ឆ្នោត។ អំឡុងពេលប៉ុន្មានខែមុនពេលបោះឆ្នោត និងជាពិសេសក្នុងពេលយុទ្ធនាការឃោសនាបោះឆ្នោតតែម្តងដែលអ្នកនយោបាយតែងយកចិត្តអ្នកបោះឆ្នោតខ្លាំងជាងគេ។ ប៉ុន្តែ ក្រោយពេលបោះឆ្នោត សកម្មភាពក៏ស្ងប់ស្ងាត់ទៅវិញជាធម្មតា។ ពាក្យសន្យាក៏ច្រើនតែក្លាយជាចម្រៀងឥតន័យ។ នេះជាព្រឹត្តិការណ៍ដដែលៗដែលតែងកើតឡើងនៅក្នុងឆាកនយោបាយកម្ពុជា។
ប៉ុន្តែ សម្រាប់ការបោះឆ្នោតអាណត្តិទី៥នេះ ស្ថានការណ៍បានផ្លាស់ប្តូរ។ យុទ្ធសាស្ត្រនយោបាយក៏ផ្លាស់ប្តូរផ្លាស់ប្តូរទៅតាមនោះដែរ។ ទាំងគណបក្សកាន់អំណាច ទាំងគណបក្សប្រឆាំងហាក់ដូចជាខិតខំប្រឹងប្រែងជាខ្លាំងក្នុងការចុះកៀកជាមួយប្រជាពលរដ្ឋម្ចាស់ឆ្នោតតាំងពីដើមអាណត្តិ។ គណបក្សសង្គ្រោះជាតិដែលបដិសេធមិនទទួលស្គាល់លទ្ធផលឆ្នោត តែងចុះជាប់រហូតជាមួយអ្នកបោះឆ្នោតរបស់ខ្លួននៅគ្រប់ទិសទីដើម្បីស្តាប់សំណូមពររបស់ពួកគេផង និងដើម្បីរាយការណ៍អំពីសភាពការណ៍វិវឌ្ឍន៍និងអំពីគោលជំហររបស់ខ្លួនជូនដល់ម្ចាស់ឆ្នោតផង។
ងាកទៅមើលគណបក្សប្រជាជនកម្ពុជាដែលកំពុងកាន់អំណាចវិញ គណបក្សនេះក៏បានម្នីម្នារៀបចំដំណើរឆ្ពោះទៅកាន់មូលដ្ឋានដោយមិនបង្អន់យូរឡើយ។ តាំងពីដើមអាណត្តិ វេទិកាសាធារណៈ និងគណៈកម្មការចម្រុះចុះមូលដ្ឋានត្រូវបានបង្កើតឡើងដើម្បីស្តាប់សំណូមពរនិងដោះស្រាយបញ្ហាជូនប្រជាពលរដ្ឋម្ចាស់ឆ្នោត។ មិនឲ្យប្រញាប់ម្តេចនឹងកើតបើគណបក្សនេះរបូតអស់ ២២កៅអីពីក្នុងរដ្ឋសភាទៅឲ្យគណបក្សប្រឆាំងទៅហើយនោះ។ ស្ថានភាពនេះសបញ្ជាក់ថា តម្លៃប្រជាពលរដ្ឋខ្មែរក្នុងក្រសែភ្នែកអ្នកនយោបាយកាន់តែឡើងខ្ពស់ជាងមុន។ ពាក្យសន្យាអមដោយអំណោយបន្តិចបន្តួចដូចកាលពីមុនពិតជាមិនគ្រប់គ្រាន់ឡើយក្នុងការទាក់ទាញសន្លឹកឆ្នោត។
ពិតណាស់ ការស្រូតរូតរះចុះដោះស្រាយបញ្ហាជូនពលរដ្ឋម្ចាស់ឆ្នោតជារឿងត្រឹមត្រូវ ប៉ុន្តែ វត្តមាននៅឯមូលដ្ឋានរបស់មន្ត្រីថ្នាក់លើមិនមែនជារឿងថ្មីទេ។ ដូច្នេះ អ្វីដែលសំខាន់នោះគឺរបៀបធ្វើការដែលត្រូវផ្លាស់ប្តូរថ្មី។ កន្លងទៅ គណបក្សកាន់អំណាចក៏ធ្លាប់បានបង្កើតក្រុមការងារចុះពង្រឹងមូលដ្ឋាននេះរួចទៅហើយ។ ប៉ុន្តែ ក្រុមការងារទាំងនោះគ្មានប្រសិទ្ធភាពពីព្រោះតែពួកគេមិនបានស្វែងយល់និងដោះស្រាយបញ្ហាជូនពលរដ្ឋឲ្យពិតប្រាកដទេ។
ផ្ទុយទៅវិញ ក្រុមការងារទាំងនោះច្រើនតែផ្តោតលើការសំណេះសំណាលនិងចែកអំណោយតែប៉ុណ្ណោះ។ នៅក្នុងពិធីសំណេះសំណាលទៀតសោត ពួកគេចូលចិត្តនិយាយឲ្យម្ចាស់ឆ្នោតស្តាប់ តែមិនចូលចិត្តស្តាប់ម្ចាស់ឆ្នោតនិយាយទេ។ ម្យ៉ាងទៀត អ្នកដែលចូលរួមក្នុងពិធីសំណេះសំណាលត្រូវបានមេភូមិឬមេឃុំកេណ្ឌឲ្យមកអង្គុយស្តាប់លោកធំនិយាយ។ ពួកគេខិតខំប្រមូលមនុស្សឲ្យបានច្រើនតាមដែលអាចធ្វើបានដើម្បីឲ្យគណៈអធិបតីសប្បាយចិត្ត។ នៅពេលឃើញមនុស្សច្រើនមកចូលរួម មន្ត្រីថ្នាក់លើទៅពីភ្នំពេញក៏រីកមុខហើយក៏យល់ច្រឡំថាពួកគេសុទ្ធតែជាអ្នកបោះឆ្នោតឲ្យខ្លួន។ តាមពិត អ្នកខ្លះមកដោយខ្លាចអំណាចអាជ្ញាធរមូលដ្ឋាន និងអ្នកខ្លះទៀតមកដើម្បីទទួលអំណោយតែប៉ុណ្ណោះ។
បន្ទាប់ពីចែកអំណោយនិងហៅទូរទស្សន៍ទៅថតដើម្បីទុកបង្អួតនាយករដ្ឋមន្ត្រីហើយនោះ ពួកគេក៏វិលមកភ្នំពេញវិញហើយបូកលេខចំនួនអ្នកចូលរួមដើម្បីរាយការណ៍ជូនថ្នាក់លើដោយមិនបានស្វែងយល់និងដោះស្រាយបញ្ហារាប់រយជំពូកដែលម្ចាស់ឆ្នោតកំពុងជួបប្រទះនោះឡើយ។ របៀបធ្វើការដែលគ្មានប្រសិទ្ធភាពទាំងនេះហើយដែលគួរត្រូវបានផ្លាស់ប្តូរ។ អំណឹះតទៅ មន្ត្រីពង្រឹងមូលដ្ឋាន គួរប្តូរទម្លាប់ពីនិយាយឲ្យរាស្ត្រស្តាប់ ទៅជាស្តាប់មតិរាស្ត្រវិញម្តង។ ប្តូរពីទម្លាប់ស្តាប់របាយការណ៍របស់មេភូមិនិងមេឃុំទៅជាស្តាប់របាយការណ៍ផ្ទាល់ពីម្ចាស់ឆ្នោតនិងប្តូរពីទម្លាប់ធ្វើការដើម្បីផ្គាប់ចិត្តតែថ្នាក់លើទៅជាទម្លាប់ផ្គាប់ចិត្តពលរដ្ឋម្ចាស់ឆ្នោតវិញ។
សរុបមកវិញ ការផ្តល់តម្លៃដល់រាស្ត្រម្ចាស់ឆ្នោតឲ្យបានខ្លាំងគឺជាទស្សនៈវិស័យត្រឹមត្រូវនៅក្នុងបរិបទប្រជាធិបតេយ្យដែលហាក់ដូចជាកំពុងរីកលូតលាស់ចេញពីមហាជនខ្លាំងជាងថ្នាក់ដឹកនាំ។ ប៉ុន្តែ ប្រសិទ្ធភាពការងារនៅតែជាចំណោទដ៏ធំមួយត្រូវគិតគូរ។ សូមកុំភ្លេចថា អំណឹះ តទៅ អ្នកដែលបម្រើពលរដ្ឋល្អជាងគេគឺជាអ្នកទទួលជោគជួយក្នុងអាជីពនយោបាយ។ នេះជាតម្លៃរបស់ម្ចាស់ឆ្នោតដែលអ្នកនយោបាយមិនអាចមើលរំលងបានឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ