មេដឹកនាំលោកខាងលិចធ្វើទុក្ខបុកម្នេញប្រធានាធិបតីរុស្ស៊ី ពីរឿងអ៊ុយក្រែន
នៅថ្ងៃបិទបញ្ចប់ជំនួបកំពូលG ២០ កាលពីថ្ងៃអាទិត្យ ទី ១៦វិច្ឆិកា ក្រុមមេដឹកនាំ ប្រទេសលោកខាងលិចបានឆ្លៀតចេញសេចក្តីថ្លែងការណ៍ដាក់សម្ពាធទៅលើរុស្ស៊ី ពីរឿងវិបត្តិអ៊ុយក្រែន។ ប្រទេសលោកខាងលិចនាំមុខដោយអាមេរិក និងអង់គ្លេសបានព្រមានប្រធានាធិបតីរុស្ស៊ីឲ្យប្តូរជំហរ ឈប់ឈ្លានពានអ៊ុយក្រែន បើសិនជាមិនចង់នៅឯកោ ឬទទួលទណ្ឌកម្មសេដ្ឋកិច្ចតទៅទៀត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣២
ដោយសារតែវិបត្តិនៅអ៊ុយក្រែន លោកប្រធានាធិបតីរុស្ស៊ីបានទទួលរងការរិះគន់ខ្លាំង ជាងពេលណាៗទាំងអស់។ នៅក្នុងអំឡុងជំនួបកំពូលពីរថ្ងៃ ក្នុងទីក្រុងBrisbane ប្រទេសអូស្ត្រាលី គឺសឹងនៅរាល់ជំនួបទ្វេភាគីជាមួយមេដឹកនាំលោកខាងលិច លោកប្រធានាធិបតីពូទីនបានទទួលលឺពាក្យសំដី មិនសូវស្វាគមប៉ុន្មាន ។ បទពិសោធន៍ល្វីងជូរចត់ចុងក្រោយ គឺនៅក្នុងជំនួបទ្វេភាគីកាលពីយប់ថ្ងៃសៅរ៍ នៅពេលដែលនាយករដ្ឋមន្រ្តីកាណាដាបាននិយាយទៅកាន់លោកពូទីនថា គាត់ត្រូវតែចាប់ដៃជាមួយលោកពូទីន ប៉ុន្តែគាត់មានពាក្យដ៏ខ្លីសម្រាប់និយាយទៅលោកពូទីន នោះ គឺលោកប្រធានាធិបតីពូទីនត្រូវដកទ័ពរុស្ស៊ីចេញពីទឹកដីអ៊ុយក្រែន។ នេះបើតាមអ្នកនាំពាក្យរបស់នាយករដ្ឋមន្រ្តីកាណាដា។
តាមអ្នកនាំពាក្យរបស់ប្រធានាធិបតីរុស្ស៊ី លោកពូទីនបានឆ្លើយតបថា វាមិនអាចទេ ព្រោះរុស្ស៊ី គ្មានទ័ពនៅក្នុងទឹកដី អ៊ុយក្រែន។ សម្រាប់ប្រទេសលោកខាងលិច រុស្ស៊ី នៅតែឆ្លើយបដិសេធ បើទោះបីជាអង្គការអូតង់ និងរដ្ឋាភិបាលអ៊ុយក្រែនមានភស្តុតាងបញ្ជាក់ថា ទ័ព និងសព្វាវុធរុស្ស៊ីត្រូវបានដឹកចូលទៅក្នុងតំបន់ភាគខាងកើតអ៊ុយក្រែន។
នៅក្នុងជំនួប G២០ វិបត្តិអ៊ុយក្រែន បានលុបបាំងជិតបញ្ហាដទៃទៀត ជាពិសេសសេដ្ឋកិច្ចដែលតាមពិតជាគោលដៅនៃជំនួបកំពូល។ នៅប្រទេសអូស្ត្រាលី ដោយសារទំនាក់ទំនងដ៏សោះកក្រោះរវាងមេដឹកនាំប្រទេសលោកខាងលិច ជាមួយលោកពូទីន ប្រធានាធិបតីរុស្ស៊ី បានធ្វើឲ្យឃើញពន្លកនៃសង្រ្គាមត្រជាក់រវាងរុស្ស៊ី និងប្រទេសលោកខាងលិច។
នៅក្នុងជំនួបជាមួយប្រធានាធិបតីរុស្ស៊ី លោកនាយករដ្ឋមន្រ្តីអង់គ្លេសនៅមិនឈប់ព្រមានដាក់ទណ្ឌកម្មប្រឆាំងរុស្ស៊ី ប្រសិនបើរុស្ស៊ីព្រមគោរពតាមកិច្ចព្រមព្រៀងនៅទីក្រុងMinks ដែលចែងពីបទឈប់បាញ់នៅភាគខាងកើតអ៊ុយក្រែន។ លោកប្រធានាធិបតីអាមេរិកវិញ បានអះអាងថា លោកស្វាគមការវិលត្រលប់របស់រុស្ស៊ី មកក្នុងសហគមន៍អន្តរជាតិវិញ ប៉ុន្តែ រុស្ស៊ីត្រូវតែគោរពគោលការណ៍មួយចំនួន។ តាមគោលការណ៍ រុស្ស៊ីមិនត្រូវរំលោភឈ្លានពានប្រទេសដទៃ ឬផ្តល់ថវិកា និងការគាំទ្រដើម្បីអូសទាញឲ្យក្រុមមួយធ្វើសង្រ្គាមទាមទារបំបែកទឹកដីរបស់ប្រទេសមួយទេ។
នៅមុនដំណើរចាកចេញរបស់ប្រធានាធិបតីរុស្ស៊ី ចេញពីជំនួបកំពូល អាមេរិក អូស្ត្រាលី និងជប៉ុនវិញ នៅបានចេញសេចក្តីថ្លែងការណ៍រួមមួយ ប្រឆាំងនឹងអន្តរាគមន៍របស់រុស្ស៊ីវិបត្តិផ្ទៃក្នុងអ៊ុយក្រែន។ សេចក្តីថ្លែងការណ៍របស់ប្រទេសសម្ព័ន្ធមិត្តទាំងបី បានទាមទារផងដែរ រកយុត្តិធម៌ជូនជនរងគ្រោះដែលស្លាប់នៅក្នុងគ្រោះថ្នាក់ផ្ទុះធ្លាក់យន្តហោះម៉ាឡេស៊ី MH១៧នៅភាគខាងកើតអ៊ុយក្រែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ