វិបត្តិអ៊ុយក្រែន៖ ប្រទេសលោកខាងលិចកំពុងរង់ចាំសង្រ្គប់រុស្ស៊ី នៅក្នុងជំនួបកំពូលG២០ នៅអូស្ត្រាលី
ចុះផ្សាយនៅថ្ងៃ៖
កិច្ចប្រជុំកំពូលG២០ ត្រូវបើកធ្វើ នៅថ្ងៃសៅរ៍ ទី ១៥ វិច្ឆិកា ក្នុងទីក្រុង Brisbane របស់ប្រទេសអូស្ត្រាលី។ ក្រៅតែពីបញ្ហាសេដ្ឋកិច្ច ការប្រយុទ្ធប្រឆាំងនឹងក្រុមជីហាត និងការប្រែប្រួលអាកាសធាតុ ជម្លោះទឹកដីនៅភាគខាងកើតអ៊ុយក្រែន នឹងក្លាយជាប្រធានបទសំខាន់ដែលប្រមុខដឹកនាំប្រទេសមហាអំណាចឧស្សាហកម្មលើកយកទៅជជែកនៅក្នុងជំនួបកំពូល។ ប្រទេសលោកខាងលិចកំពុងដាក់សម្ពាធលើប្រទេសរុស្ស៊ី បន្ទាប់ពីមានការបញ្ជាក់របស់អង្គការអូតង់អំពីក្បួនដឹកទ័ពរុស្ស៊ីចូលទៅក្នុងទឹកដីភាគខាងកើតអ៊ុយក្រែន នៅក្នុងរយៈពេលប៉ុន្មានថ្ងៃចុងក្រោយនេះ។ នៅថ្ងៃនេះ នៅក្នុងទីក្រុងនាយករដ្ឋមន្រ្តីអង់គ្លេសបានព្រមានដាក់ទណ្ឌកម្មបន្ថែម ប្រសិនបើរុស្ស៊ីមិនព្រមចូលរួមដោះស្រាយជម្លោះ នៅភាគខាងកើតអ៊ុយក្រែន។
ជំនួបកំពូល ប្រទេសមហាអំណាចឧស្សាហកម្ម ទាំង២០ ឬហៅកាត់ថា G20នឹងបើកទ្វារនៅថ្ងៃសៅរ៍ស្អែកនៅក្នុងប្រទេសអូស្រ្តាលី។ មេដឹកនាំប្រទេសលោកខាងលិចកំពុងរង់ចាំយកជំនួបG ២០ដើម្បីទាមទារចម្លើយពីរុស្ស៊ី បន្ទាប់ពីអង្គការអូតង់បានបញ្ជាក់ថា ពិតជាមានការដឹកជញ្ជូនទ័ព និងសព្វាវុធរុស្ស៊ីចូលទៅក្នុងទឹកដីអ៊ុយក្រែន ។ រុស្ស៊ីដែលបានចេញមុខគាំទ្រផ្នែកនយោបាយរបស់ក្រុមឧទ្ទាមបំបែកទឹកដីអ៊ុយក្រែន បានបដិសេធទាត់ចោលការអះអាងរបស់អូតង់។
តាំងពីមុនចាកចេញទៅអូស្ត្រាលីម្ល៉េះ នាយករដ្ឋមន្រ្តីអង់គ្លេស ដាវីដ កាម៉ារ៉ូនផ្ទាល់ បានព្រមានរួចហើយថា នឹងដាក់ទណ្ឌកម្មបន្ថែមប្រឆាំងរុស្ស៊ី បើសិនជារុស្ស៊ីនៅតែចូលរួមធ្វើឲ្យជម្លោះទឹកដីអ៊ុយក្រែនកាន់តែធ្លាក់ធ្ងន់ធ្ងរ។ សម្រាប់អង់គ្លេស រុស្ស៊ីដែលជាមហាអំណាច គួរឈប់រំលោភឈ្លានពានទៅលើប្រទេសតូចតាចជាងខ្លួន ដូចជាអ៊ុយក្រែនទៀតទៅ។ សេតវិមានវិញ បានបញ្ជាក់កាលពីថ្ងៃពុធ ថា នឹងពិភាក្សាជាមួយសហភាពអឺរ៉ុបដើម្បីបង្កើនការដាក់ទណ្ឌកម្មបន្ថែម ប្រឆាំងនឹងរុស្ស៊ី។
តាមនាយករដ្ឋមន្រ្តីអាល្លឺម៉ង់វិញ ដែលកំពុងធ្វើទស្សនកិច្ចនៅក្នុងប្រទេសនូវែលហ្សេឡង់ មុននឹងចាកចេញបន្តទៅអូស្ត្រាលី នៅល្ងាចថ្ងៃសុក្រនេះ សហភាពអឺរ៉ុប នឹងជជែកបញ្ហាអ៊ុយក្រែន នៅថ្ងៃចន្ទខាងមុខ។ លោកស្រីនាយករដ្ឋមន្រ្តីអាល្លឺម៉ង់បានពន្លយឲ្យដឹងពីគម្រោងដាក់បញ្ចូលមេដឹកនាំក្រុមឧទ្ទាមនិយមរុស្ស៊ីចូលទៅក្នុងបញ្ជីដាក់ទណ្ឌកម្ម ប៉ុន្តែ បានសង្កត់ធ្ងន់ថា រហូតមកដល់ពេលនេះគេនៅមិនទាន់គិតគូរពីការដាក់ទណ្ឌកម្មសេដ្ឋកិច្ច បន្ថែមទៅលើរុស្ស៊ីនៅឡើយទេ។
អ៊ុយក្រែនខ្លាចរុស្ស៊ីធ្វើសង្រ្គាមចូលក្នុងទឹកដីអ៊ុយក្រែន
អ្នកជំនាញជាច្រើនបានវាយតម្លៃថា សង្រ្គាមធំមួយនៅក្នុងទឹកដីអ៊ុយក្រែននឹងមិនផ្ទុះនៅក្នុងពេលឆាប់ៗខាងមុខនេះទេ។ ឲ្យប្រាកដច្បាស់ សង្រ្គាមនៅអ៊ុយក្រែននឹងមិនអាចផ្ទុះឡើងនៅក្នុងរដូវធ្លាក់ទឹកកកនោះទេ ប៉ុន្តែ ដោយសារតែការផ្គត់ផ្គង់ ផ្តល់ជំនួយយោធារបស់រុស្ស៊ី ក្រុមឧទ្ទាមមានកម្លាំងប្រយុទ្ធតទល់នឹងទ័ពអ៊ុយក្រែន ក្នុងសង្រ្គាមរយៈពេលវែង។
តាមអ្នកជំនាញ ជាការណ៍ពិត រុស្ស៊ីបានបញ្ជូនទ័ព និងដឹកសព្វាវុធឆ្លងចូលក្នុងទឹកដីអ៊ុយក្រែនមែន ប៉ុន្តែ ចំនួនយានយន្តរុស្ស៊ីដែលមានសណ្តោងត្រឹមកាំភ្លើងធំ មិនមានច្រើន ហើយមិនសូវមានរថក្រោះទំនើបៗ ដែលនឹងអាចឲ្យរុស្ស៊ីធ្វើការវាយប្រហារទៅលើប្រទេសអ៊ុយក្រែនបានទេ។ អ្នកជំនាញវាយតម្លៃថា រុស្ស៊ីទំនងមានយុទ្ធសាស្រ្តពង្រឹងកម្លាំងរបស់ក្រុមឧទ្ទាម ដើម្បីទប់ទល់នឹងទ័ពរដ្ឋាភិបាលអ៊ុយក្រែន តែប៉ុណ្ណោះ។ រុស្ស៊ីចង់ជួយពួកឧទ្ទាមដើម្បីវាយយកមកវិញ ទីតាំងសំខាន់ ដូចជាព្រលានយន្តហោះដូណេតស៍ ដែលពួកឧទ្ទាមបានបាត់បង់ទៅក្នុងដៃរបស់ទ័ពរដ្ឋាភិបាលអ៊ុយក្រែន។ ម្យ៉ាងទៀត រុស្ស៊ីចង់ជួយពួកឧទ្ទាមប្រយុទ្ធទប់ទល់នឹងទ័ពអ៊ុយក្រែន ដើម្បីធ្វើយ៉ាងណាកុំឲ្យតំបន់ដែលសំបូររ៉ែធនធានធម្មជាតិដែលស្ថិតនៅភាកខាងកើតអ៊ុយក្រែន ធ្លាក់ទៅក្នុងដៃរបស់ទ័ពរដ្ឋាភិបាលអ៊ុយក្រែន។
វិបត្តិអ៊ុយក្រែនបានធ្វើឲ្យមានភាពតានតឹងរវាងប្រទេសលោកខាងលិច និងរុស្ស៊ី។ សង្រ្គាមត្រជាក់ថ្មីមួយទៀត កំពុងលេចមុខបណ្តើរៗ។ ចាប់តាំងពីមានភាពតានតឹងជាមួយរុស្ស៊ី អង្គការអូតង់បានទាញសញ្ញាអាសន្នជាច្រើនលើក ពីវត្តមានរបស់យន្តហោះចម្បាំង និងនាវាមុជទឹករបស់រុស្ស៊ី ដែលបើកឆ្វែល នៅក្នុងដែនអាកាស និងដែនទឹករបស់ប្រទេសសមាជិកអង្គការអូតង់ ជាពិសេសប្រទេសអតីតសមាជិករបស់សហភាពសូវៀត។
នៅសប្តាហ៍នេះទៀត សូម្បីអាមេរិកក៏បានកត់សំគាល់ឃើញវត្តមានយន្តហោះទម្លាក់ គ្រាប់បែករបស់រុស្ស៊ី ហោះក្បែរដែនអាកាសរបស់កាណាដា ដែលជាប់ព្រំដែនជាមួយអាមេរិក។ នាយករដ្ឋមន្រ្តីអូស្ត្រាលីនៅថ្ងៃនេះ ក៏បានអះអាងថា កងទ័ពអូស្ត្រាលីបានរកឃើញនាវាចម្បាំងរបស់រុស្ស៊ីបើកក្នុងដែនទឹក អន្តរជាតិ ដែលស្ថិតនៅមិនឆ្ងាយប៉ុន្មានពីដែនទឹកភាគខាងជើងអូស្ត្រាលី។ សម្រាប់នាយករដ្ឋមន្រ្តីអូស្ត្រាលី មិនថា យន្តហោះរុស្ស៊ីបើកក្រវែលដែនអាកាសអឺរ៉ុប ជប៉ុន ឬនាវាចម្បាំងរុស្ស៊ីបើកក្នុងមហាសមុទ្រប៉ាស៊ីហ្វិកក្បែរអូស្រ្តាលី រុស្ស៊ី នៅពេលនេះ បានបង្ហាញភាពជឿជាក់របស់ខ្លួនខាងវិស័យយោធាជាងមុន។ តាមអ្នកជំនាញ រុស្ស៊ីបានដាក់ខ្លួនជាសត្វខ្លាឃ្មុំដែលចង់ធ្វើអ្វីមួយ ដោយមិនចាំបាច់សួរ សុំការអនុញ្ញាតិពីអ្នកណានោះទេ។
នៅថ្ងៃនេះដែរ រុស្ស៊ីមិនខ្លាចនឹងព្រមានបារំាងពីរឿងកប៉ាល់ដឹកយន្តហោះ មីស្ត្រាល់ ដែលបារាំងត្រូវលក់ឲ្យរុស្ស៊ី។ ទីក្រុងម៉ូស្គូបានព្រមានរួចហើយថា បើបារាំងមិនប្រគល់នាវាចម្បាំងMistrale ទៅឲ្យរុស្ស៊ី នៅក្នុងរយៈពេលពីរសប្តាហ៍ខាងមុខនេះទេ រុស្ស៊ីនឹងប្តឹងទារសំណងជម្ងឺចិត្ត ពីបារំាង។ នាវា Mistrale ជានាវាទំនើប ដែលអាចដើរតួជាច្រើនយ៉ាង នៅក្នុងប្រតិបត្តិការយោធា។ ដោយសារតែវិបត្តិអ៊ុយក្រែន បារាំងត្រូវទទួលគំនាបពីប្រទេសអឺរ៉ុប និងអាមេរិក ដែលហាមបារាំងមិនឲ្យប្រគល់លក់នាវាMistrale ទៅឲ្យរុស្ស៊ី ដែលគេខ្លាចថា រុស្ស៊ីនឹងយកទៅប្រើវាយប្រហារប្រទេសអឺរ៉ុបនៅសមុទ្របាល់ទិក។ ប៉ុន្តែ បើបារាំង មិនព្រមប្រគល់លក់នាវាចម្បាំងទៅឲ្យរុស្ស៊ីទេ នោះ បារាំងនឹងប្រឈមនឹងការទិតៀនក្នុងនាមជាប្រទេសដែលមិនគោរពកិច្ចសន្យា និងអាចប្រឈមនឹងការបង់ប្រាក់ពិន័យ ដែលបារាំងពិបាកនឹងរកមកសង ដោយសារវិបត្តិសេដ្ឋកិច្ចក្នុងស្រុក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ