មេគុកព្រៃស បែរជាមិនឲ្យគណបក្សយុវជនជួបទណ្ឌិតបក្សសង្គ្រោះជាតិ ១៥នាក់វិញ!
សមាជិករបស់គណបក្សយុវជនកម្ពុជា មិនត្រូវបានខាងអគ្គនាយកដ្ឋានពន្ធនាគារ អនុញ្ញាតឲ្យចូលសួរសុខទុក្ខសកម្មជនគណបក្សសង្គ្រោះជាតិ ១៥នាក់ ដែលកំពុងជាប់ឃុំ នៅពន្ធនាគារព្រៃសនោះទេ នៅព្រឹកថ្ងៃទី ២៥កុម្ភៈនេះ។ ការមិនអនុញ្ញាតនេះ ជារឿងមួយដែលធ្វើឲ្យប្រធានគណបក្សយុវជនកម្ពុជា ហួសចិត្តជាខ្លាំង ដោយសារកាលពីថ្ងៃទី ២៤កុម្ភៈ អគ្គនាយកដ្ឋានពន្ធនាគារ ទើបតែផ្ញើរលិខិតអនុញ្ញាតសំណើរសុំជួបនេះ។ ខាងពន្ធនាគារ ថាការបដិសេធនេះ ព្រោះមានបញ្ហាបច្ចេកទេស តែខាងគណបក្សយុវជន ថាក្រសួងមហាផ្ទៃ ធ្វើការ «សេញ៉េ នឹងដៃ លុបនឹងជើង»។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៩
បន្ទាប់ពីទទួលបានភ្លើងខៀវអនុញ្ញាតភ្លាម ប្រធាន និងសមាជិកគណបក្សយុវជនកម្ពុជា បាននាំគ្នាទៅពន្ធនាគារព្រៃស នៅម៉ោងប្រមាណ ៨និង៣០នាទីព្រឹក ថ្ងៃទី ២៥កុម្ភៈ ដើម្បីជួបជាមួយនឹងសកម្មជន ១៥នាក់របស់គណបក្សសង្គ្រោះជាតិ ដែលកំពុងជាប់ឃុំនៅទីនោះ។ ប៉ុន្តែការទៅជួបនេះ ត្រូវបានបរាជ័យវិញ ដោយសារខាងមេពន្ធនាគារ មិនអនុញ្ញាត ហើយប្រាប់ថាថ្នាក់លើ បានដូរផែនការភ្លាមៗ។ នេះបើតាមលោកពេជ្រ ស្រស់ ប្រធានគណបក្សយុវជនកម្ពុជា ដែលបានប្រាប់វិទ្យុបារាំង នៅថ្ងៃព្រហស្បតិ៍នេះ។
យ៉ាងណាក៏ដោយ លោកពេជ្រ ស្រស់ បានបញ្ជាក់ថា លោកនៅតែរក្សាជំហរចូលជួបដដែល ប៉ុន្តែត្រូវមើលលើឆន្ទៈនយោបាយរបស់រដ្ឋាភិបាលសិន ថាតើពិតជាអនុញ្ញាតមែនទែន ឬអត់។ ប្រធានគណបក្សយុវជនកម្ពុជារូបនេះ អះអាងថា មូលហេតុដែលលោកចង់ជួបជាមួយសកម្មជនគណបក្សសង្គ្រោះជាតិនោះ គឺក្នុងនាមជាអ្នកនយោបាយដូចគ្នា ហើយលោកចង់ដឹងពីបទពិសោធន៍នៃអ្នកនយោបាយ ដែលជាប់គុក ព្រោះខ្លាចថាបើថ្ងៃណាមួយលោកជាប់គុកដែរ ក៏នឹងអាចមានគេចូលទៅសួរសុខទុក្ខលោក។
លោកពេជ្រ ស្រស់ បានមានប្រសាសន៍ថា៖ «ដោយសារតែខ្ញុំបានលើកជំហរថា ជាអ្នកនយោបាយដូចគ្នា មិនថាអ្នកនៅបក្សផ្សេងគ្នាទេ ប៉ុន្តែខ្ញុំមានសណ្តានចិត្តមួយចង់សួរសុខទុក្ខ។ ថ្ងៃណាមួយ ខ្ញុំជាប់គុក វាអាច ណា៎ យើងមើលមិនឃើញ ដោយសារតុលាការមិនអាព្យាក្រិតដូច្នេះ។ ចឹង! ខ្ញុំអាចជាប់គុក ចឹងមន្ត្រីជីវិតអ្នកនយោបាយផ្សេងគ្នា គេអាចទៅជួបលើកទឹកចិត្ត ឬរកដំណោះស្រាយអ្វីមួយ ………»
អ្នកនាំពាក្យគណបក្សសង្គ្រោះជាតិ លោក យ៉ែម បុញ្ញឬទ្ធិ បានស្វាគមន៍ចំពោះការស្នើសុំសួរសុខទុក្ខរបស់ខាងគណបក្សយុវជនកម្ពុជានេះ ព្រោះថាសុទ្ធតែជាអ្នកនយោបាយដូចគ្នា។ ហើយលោកបានបញ្ជាក់ថា ប្រសិនបើមានជំនួយយកទៅជួយឧបត្ថម្ភបន្ថែមទៀត គឺកាន់តែប្រសើរ ដោយសារតែពេលនេះ សកម្មជនទាំងនោះ កំពុងតែខ្វះខាត និងត្រូវការការជួយជាចាំបាច់។
ប៉ុន្តែបើតាមលោកនុត សាវ៉ាណា អ្នកនាំពាក្យអគ្គនាយកដ្ឋានពន្ធនាគារ បានឲ្យដឹងថា ការមិនអនុញ្ញាតនេះ ដោយសារតែមានបញ្ហាបែបបទរដ្ឋបាលបន្តិចបន្តួច ហើយខាងនាយកដ្ឋាន នឹងពិនិត្យសារឡើងវិញ រួចទើបសម្រេចជាក្រោយ។
សូមបញ្ជាក់ថា សកម្មជនគណបក្សសង្គ្រោះជាតិ ទាំង ១៥នាក់នោះ រួមមានទាំងលោកមាជ សុវណ្ណារ៉ា ប្រធានផ្នែកព័ត៌មាននៃគណបក្សសង្គ្រោះជាតិ លោកហុង សុខហួរ សមាជិកព្រឹទ្ធសភាគណបក្សសម រង្ស៊ី និងសកម្មជនផ្សេងទៀត។ អ្នកទាំងនោះ បានជាប់ឃុំ ដោយត្រូវបានចោទប្រកាន់ ពីបទក្លែងឯកសារសាធារណៈ និងបទចោទថាមានពាក់ព័ន្ធនឹងអំពើហិង្សាក្បែរទីលានប្រជាធិបតេយ្យ កាលពីឆ្នាំ ២០១៤កន្លងទៅជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ