ពីបញ្ហាសមុទ្រចិនខាងត្បូងមកជាទំនាស់ផ្លូវទូតទ្វេភាគី
ជម្លោះសមុទ្រចិនខាងត្បូងកំពុងតែរាលដាលដល់ទំនាស់ផ្លូវទូតរវាងកម្ពុជានិងហ្វីលីពីន។ កាលពីរសៀលថ្ងៃអង្គារនេះ លោកកៅ គឹមហួនរដ្ឋលេខាធិការក្រសួងការបរទេសកម្ពុជាកោះហៅភារៈធារីស្តីទីនៃស្ថានទូតហ្វីលីពីនប្រចាំកម្ពុជាដើម្បីបង្ហាញការតវ៉ារបស់កម្ពុជាចំពោះហេតុការណ៍នៃការបិទផ្សាយកំណត់ទូតកោះហៅឯកអគ្គរាជទូតកម្ពុជារបស់រដ្ឋាភិបាលហ្វីលីពីននៅលើជញ្ជាំងស្ថានទូតកម្ពុជានោះ។ អ្នកនាំពាក្យរបស់ក្រសួងការបរទេសកម្ពុជាចាត់ទុកថានេះ ជាសកម្មភាពពុំគួរគប្បី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៦
សង្គ្រាមប៉ាការវាងហ្វីលីពីន និងកម្ពុជាជុំវិញបញ្ហាសេចក្តីថ្លែងការណ៍រួមនៃរដ្ឋមន្ត្រីការបរទេសអាស៊ាន និងបញ្ហាជម្លោះក្នុងសមុទ្រចិនខាងត្បូងនោះ ឥឡូវនេះកំពុងរាលដាលដល់ការប៉ះទង្គិចផ្នែកទំនាក់ទំនងការទូតរវាងហ្វីលីពីននិងកម្ពុជា។
កាលពីរសៀលថ្ងៃអង្គារនេះ លោកកៅ គឹមហួនរដ្ឋលេខាធិការក្រសួងការបរទេសបានបង្ហាញកំណត់ទូតតវ៉ាមួយទៅភារៈធារីស្តីទីនៃស្ថានទូតហ្វីលីពីនប្រចាំកម្ពុជា ប្រឆាំងនឹងការបិទផ្សាយទំព័រកាសែតដែលមានចុះផ្សាយកំណត់ទូតរដ្ឋាភិបាលហ្វីលីពីនកោះហៅឯកអគ្គរាជទូតកម្ពុជា។ គឺក្រសួងការបរទេសហ្វីលីពីនបានកោះហៅឯកអគ្គរាជទូតកម្ពុជា បន្ទាប់ពីឯកអគ្គរាជទូត លោក ហើស សិរីធនបានចុះផ្សាយការឆ្លើយតបរបស់លោកប្រតិកម្មទៅនឹងអត្ថបទរបស់លោកស្រីអនុរដ្ឋមន្ត្រីការបរទេសហ្វីលីពីននៅលើទំព័រកាសែត Philippines Star។
យោងតាមការបញ្ជាក់របស់អ្នកនាំពាក្យក្រសួងការបរទេសកម្ពុជា ភារៈធារីស្តីទីនៃស្ថានទូតហ្វីលីពីននឹងផ្ញើរកំណត់ទូតតវ៉ារបស់រដ្ឋាភិបាលកម្ពុជានេះទៅរដ្ឋាភិបាលក្រុងម៉ានីលភ្លាម។ ការប៉ះទង្គិចក្នុងទំនាក់ទំនងការទូតជាមួយហ្វីលីពីនដ៏កម្រនេះ បានកើតមានឡើងនៅពេលដែលហ្វីលីពីនក្នុងនាមសមាជិកអាស៊ានមួយ និងកម្ពុជាក្នុងឋានៈជាប្រធានអាស៊ាននៅពេលនេះ កំពុងតែមើលមុខគ្នាមិនត្រង់ ដោយសារតែជម្លោះសមុទ្រចិនខាងត្បូងដែលហ្វីលីពីនគឺជាភាគីជម្លោះជាមួយចិន។
ការមិនអាចចេញផ្សាយសេចក្តីថ្លែងការណ៍រួមនៃរដ្ឋមន្ត្រីក្រសួងការបរទេសអាស៊ានលើកទី៤៥នៅក្នុងខែកក្កដានេះ បានតម្រូវអោយហ្វីលីពីនធ្វើអត្ថាធិប្បាយដាក់ការទទួលខុសត្រូវមកលើកម្ពុជា។ ការអត្ថាធិប្បាយដែលចុងក្រោយនេះបានធ្វើឡើងដោយលោកស្រីអនុរដ្ឋមន្ត្រីការបរទេសហ្វីលីពីន លើទំព័រកាសែត Philippines Star បានបង្ខំអោយឯកអគ្គរាជទូតកម្ពុជាប្រតិកម្មយ៉ាងខ្លាំងតាមរយៈអត្ថបទសរសេរមួយវិញនៅលើទំព័រកាសែតដដែលនេះ។
អត្ថបទឆ្លើយតបរបស់ឯកអគ្គរាជទូតកម្ពុជាដែលបានវាយប្រហារធ្ងន់ៗលើហ្វីលីពីនតាមការជាក់ស្តែងនេះហើយ ដែលធ្វើអោយក្រសួងការបរទេសហ្វីលីពីនធ្វើកំណត់ទូតកោះហៅឯកអគ្គរាជទូតកម្ពុជា។ កំណត់ទូតនេះត្រូវបានចុះផ្សាយនៅលើទំព័រមុខរបស់កាសែតទៀតផង។ អ្នកនាំពាក្យក្រសួងការបរទេសកម្ពុជាអត្ថាធិប្បាយថា សកម្មភាពបិទផ្សាយកំណត់ទូតកោះហៅឯកអគ្គរាជទូតកម្ពុជានៅលើជញ្ជាំងស្ថានទូតកម្ពុជានេះ គឺជាអំពើពុំគួរគប្បីមួយក្នុងនាមជាសមាជិកអាស៊ាន៕
ឯកអគ្គរាជទូតកម្ពុជាប្រចាំប្រទេសហ្វីលីពីនបានធ្វើសេចក្តីថ្លែងការណ៍ដើម្បីប្រតិកម្មទៅនឹងអត្ថបទរបស់លោកស្រីអនុរដ្ឋមន្ត្រីការបរទេសហ្វីលីពីននៅក្នុងកាសែត The Philippines Stars។ នៅពេលដែលលោកស្រី Erlinda Basilio ពិពណ៌នាដាក់ការទទួលខុសត្រូវមកលើកម្ពុជាក្នុងនាមប្រធានអាស៊ាន ដែលមិនអាចចេញបាននូវសេចក្តីថ្លែងការណ៍រួមនៃរដ្ឋមន្ត្រីការបរទេសអាស៊ាននោះ ឯកអគ្គរដ្ឋទូតកម្ពុជាប្រចាំប្រទេសហ្វីលីពីន លោកហើស សិរីធន បានពន្យល់វិញថា គឺប្រទេសសមាជិកអាស៊ានចំនួន២ ហ្វីលីពីន និងវៀតណាមទេ ដែលបានប្រកាន់ជំហររឹងទទឹង មិនអាចចរចារបានដើម្បីអាចចេញផ្សាយសេចក្តីថ្លែងការណ៍រួមរបស់រដ្ឋមន្ត្រីការបរទេសអាស៊ាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ