នគរបាលជាតិ១៥៧នាក់ត្រៀមការពារក្បួនដង្ហែរព្រះបរមសព
អគ្គស្នងការដ្ឋាននគរបាលជាតិ បានត្រៀមកម្លាំងនគរបាលចំនួន១៥៧នាក់ដើម្បីពង្រាយការពារក្បួនដង្ហែរព្រះបរមសពព្រះរតនៈកោដ្ឋនៅនៅថ្ងៃទី១កុម្ភៈ។ នៅដើមខែកុម្ភៈនោះ ក្រសួងស្ថាប័នរដ្ឋ សាលារៀន ផ្សារ និងក្រុមហ៊ុនឯកជនមួយចំនួនដែលស្ថិតនៅតាមមហាវិថីដែលក្បួនដង្ហែព្រះបរមសពឆ្លងកាត់នឹងត្រូវបានស្នើអោយបិទទ្វារ។
ចុះផ្សាយនៅថ្ងៃ៖
ស្តាប់ - ០១:៤១
អគ្គស្នងការដ្ឋាននគរបាលជាតិបានផ្តើមហ្វឹកហាត់កងកម្លាំងនគរបាលចំនួន១៥៧នាក់ដើម្បីពង្រាយការពារក្បួនដង្ហែរព្រះបរមសពព្រះរតនកោដ្ឋ។ នេះបើតាមការផ្សាយអោយដឹងពីគេហទំព័រនគរបាលជាតិ។
យោងតាមគេហទំព័រនគរបាលជាតិដដែល លោក ឧត្តមសេនីយទោ ជុំ សាវុឌ្ឍ អនុប្រធានសេនាធិការដ្ឋាននគរបាលជាតិបានពន្យល់បែបបច្ចេកទេសសន្តិសុខថា កងកម្លាំងទាំង១៥៧នាក់នោះនឹងត្រូវចែកចេញជាពីរក្រុម គឺក្រុមទី១ ជាផ្នែកការពារក្បួនដង្ហែរ និងក្រុមទី២គឺការពារពេលបិទក្បួនដង្ហែរ។
ព្រះបរមសពសម្តេចឪនរោត្តម សីហនុត្រូវគ្រោងដង្ហែរចេញពីព្រះបរមរាជវាំងនៅថ្ងៃទី១កុម្ភៈ ដើម្បីយកទៅតម្កល់នៅទីលានព្រះមេរុរយៈពេល៣ថ្ងៃ។ ហើយពិធីថ្វាយព្រះភ្លើងនឹងត្រូវប្រព្រឹត្តិទៅនៅថ្ងៃទី៤កុម្ភៈ។
នៅដើមខែកុម្ភៈនោះ នឹងមានការឈប់សំរាករយៈពេល២ថ្ងៃដែរ។ សាលារៀន ផ្សារ និងក្រុមហ៊ុនឯកជនដែលស្ថិតនៅតាមបណ្តោយមហាវិថីដែលក្បួនដង្ហែរព្រះបរមសពព្រះរតនកោដ្ឋត្រូវឆ្លងកាត់ត្រូវបានបញ្ជាអោយបិទនៅព្រឹក ថ្ងៃទី១កុម្ភៈ។ ចំណែកឯមន្ត្រីរាជការនៅក្នុងរាជធានីភ្នំពេញវិញ ក៏ត្រូវអនុញ្ញាតអោយឈប់សំរាករយៈពេល២ថ្ងៃដែរ គឺថ្ងៃទី១ និងថ្ងៃទី៤ ខែកុម្ភៈនោះ។ ថ្ងៃទី៤កុម្ភៈដែលជាថ្ងៃថ្វាយព្រះភ្លើងថ្វាយព្រះបរមសព។
គួរបញ្ជាក់ផងដែរថា នៅថ្ងៃថ្វាយព្រះភ្លើងនោះរដ្ឋាភិបាលនឹងបញ្ចេញក្រដាសប្រាក់១០០០រៀលថ្មីសម្រាប់ការប្រើប្រាស់ និងការរក្សាជាវត្ថុអនុស្សាវរីយ៍របស់ប្រជាពលរដ្ឋខ្មែរជាមួយនឹងសម្តេចឪនរោត្តមសីហនុ។ លើសពីក្រដាសប្រាក់ថ្មី១០០០រៀលនេះ ចំរៀងរម្លឹកអំពីស្នាព្រះហស្ថអតីតព្រះមហាវីរក្សត្រ ដែលទើបត្រូវបាននិពន្ធថ្មី ក៏ត្រូវបានបណ្តាញទូរទស្សន៍ផ្សព្វផ្សាយជាបណ្តើរៗហើយដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ