ប្រទេសម៉ាលីចូលខ្លួនបំភ្លឺក្រុមប្រទេសផ្តល់ជំនួយជុំវិញការប្រើជំនួយបរទេស
ចុះផ្សាយនៅថ្ងៃ៖
ស្តាប់ - ០៤:៥២
កាលពីមួយឆ្នំាមុន ពោលនៅថ្ងៃទី១៥ ឧសភា ឆ្នំា ២០១៣ សហគមន៍អន្តរជាតិបានរួមប្រជុំគ្នាក្នុងទីក្រុងព្រុចសែល ប្រទេសបែលហ្ស៊ិកដើម្បីស្វែងរកជំនួយជួយកសាងប្រទេសម៉ាលីឡើងវិញ។ កិច្ចប្រជុំកាលណោះ សហគមន៍អន្តរជាតិប្រមែប្រមូលបានជំនួយជាង ៣ ០០០លានអឺរ៉ូសម្រាប់ប្រទេសម៉ាលីដែលទើបងើបផុតពីសង្រ្គាមរំដោះតំបន់ប៉ែកខាងជើងចេញពីកណ្តាប់ដៃក្រុមអ៊ីស្លាមនិយមជ្រុល។ នៅថ្ងៃនេះ និងមួយឆ្នំាក្រោយមក ក្រុមប្រទេសផ្តល់ជំនួយបានត្រឡប់មកជួបប្រជុំគ្នាជាថ្មីដែលលើកនេះ មិនមែននៅទីក្រុងព្រុចសែល ប្រទេសបែលហ្ស៊ិកទេ តែនៅក្នុងទីក្រុងបាម៉ាកូ ប្រទេសម៉ាលីតែម្តង។ កម្មវត្ថុនៃកិច្ចប្រជុំលើកនេះ គឺដើម្បីធ្វើការបូកលទ្ធផលនៃការប្រើប្រាស់ជំនួយរបស់រដ្ឋាភិបាលម៉ាលីក្នុងរយៈពេល ១ឆ្នំាកន្លងទៅ។ អ្វីជាការកត់សម្គាល់ កិច្ចប្រជុំលើកនេះបានធ្វើឡើង ចំពេលដែលមានផ្ទុះរឿងអាស្រូវជុំវិញការទិញយន្តហោះមួយគ្រឿងសម្រាប់លោកប្រធានាធិបតីម៉ាលី អ៊ីប្រាហ៊ីម ប៊ូបាការ កេតា។
វាជារឿងមួយធម្មតាទេ ដែលក្រុមប្រទេសផ្តល់ជំនួយចង់ដឹងពីការប្រើប្រាស់ជំនួយរបស់ខ្លួន។ អ្វីក្រុមប្រទេសផ្តល់ជំនួយចង់ពិនិត្យមើលឲ្យបានជាក់ស្តែងនឹងភ្នែកនោះគឺថា តើប្រទេសដែលខ្លួនបានជួយនោះពិតជាបានប្រើប្រាស់ជំនួយចំទិសដៅក្នុងផលប្រយោជន៍ប្រទេស និងប្រជាជនរបស់ខ្លួនដែរ ឬទេ។ សូមជម្រាបជូនថា ជំនួបរបស់ក្រុមប្រទេសផ្តល់ជំនួយឲ្យម៉ាលីដែលបានរៀបចំពេលនេះ គឺជាលើកទី៣ និងដែលគ្រប់គ្នាបានចាត់ទុកថា មានសារៈសំខាន់ខ្លំាង។ សារៈសំខាន់ខ្លំាងនៅត្រង់ថា រដ្ឋាភិបាលម៉ាលីដឹកនំាដោយលោកនាយករដ្ឋមន្រ្តីមូសសា ម៉ារ៉ា និងដែលមានរដ្ឋមន្រ្តី ៨រូបអមជាមួយផងនោះ ត្រូវឆ្លើយនឹងសំណួរម្តងមួយៗរបស់ក្រុមប្រទេសផ្តល់ជំនួយ។ សំណួរដែលទាក់ទងពិសេសនឹងការប្រើប្រាស់ជំនួយបរទេសនារយៈពេល ១ឆ្នំាកន្លងទៅ។
ពីការអនុវត្តន៍នយោបាយបង្រួបបង្រួមជាតិរហូតដល់គម្រោងកំណែទម្រង់វិស័យអប់រំ ដោយឆ្លងកាត់វិស័យសេដ្ឋកិច្ចផងផងនោះ រដ្ឋាភិបាលរបស់លោកមូសសា ម៉ារ៉ាគ្មានជម្រើសអ្វី ក្រៅពីបង្ហាញកម្មវិធីនយោបាយដែលលោកកំពុងអនុវត្តន៍ និងលទ្ធផលជាក់ស្តែងដែលទទួលបានក្នុងរយៈពេល ១ឆ្នំាកន្លងទៅ។ សម្រាប់ក្រុមប្រទេសផ្តល់ជំនួយ កិច្ចប្រជុំពេលនេះមិនមែនជាទង្វើឆ្កឹះកកាយអ្វីទេ តែវាជាកតាព្វកិច្ចមួយដើម្បីធានាថា តើពាក្យសន្យាដែលរដ្ឋាភិបាលទីក្រុងបាម៉ាកូបានសន្យាជាមួយសហគមន៍អន្តរជាតិដើម្បីទទួលបានជំនួយកាលណោះ ពិតជាបានគោរពត្រឹមត្រូវ ឬទេ ពិសេសការរៀបចំឲ្យមានអភិបាលកិច្ចល្អ និងការប្រយុទ្ធប្រឆំាងនឹងអំពើពុករលួយ។
សូមជម្រាបជូនថា ទឹកប្រាក់ជំនួយចំនួន ៣ ៣០០លានអឺរ៉ូដែលប្រទេសផ្តល់ជំនួយបានសន្យាផ្តល់ឲ្យម៉ាលីកាលពីខែឧសភា ឆ្នំា ២០១៣ កន្លងទៅ មានប្រាក់ជំនួយឥតសំណង និងប្រាក់កម្ចីមានអត្រាការប្រាក់ទាប។ រហូតមកដល់ពេលនេះ មានប្រាក់ជំនួយជាងចំនួន ២ភាគ៣នៃចំនួនទឹកប្រាក់សន្យាជួយទំាង ៣ ៣០០លានអឺរ៉ូត្រូវបានផ្តល់ទៅឲ្យរដ្ឋាភិបាលម៉ាលីហើយ។ ជាទូទៅ ក្រុមប្រទេសផ្តល់ជំនួយបានសម្តែងការពេញចិត្តចំពោះការងារប្រកបដោយតម្លាភាពរបស់រដ្ឋាភិបាលម៉ាលី រួមមាន ការប្រឹងប្រែងក្នុងការប្រយុទ្ធប្រឆំាងនឹងអំពើពុករលួយ បង្កើនបរិយាកាសធូរស្រាលនៅក្នុងសង្គមទូទៅ និងវិធានការចំាបាច់មួយចំនួនក្នុងការនំាជនភៀសខ្លួន ព្រមទំាងអ្នកផ្លាស់ប្តូរលំនៅដ្ឋានឲ្យវិលមកកាន់ផ្ទះសម្បែងវិញ។ ក្រៅពីនេះ រដ្ឋាភិបាលទីក្រុងបាម៉ាកូក៏បានបង្កើតឲ្យមានកម្មវិធីអភិវឌ្ឍន៍សេដ្ឋកិច្ច ដោយផ្តោតលើការបង្កើតប៉ូលអភិវឌ្ឍន៍វិស័យកសិកម្ម ព្រមទំាងដាក់ឲ្យដំណើរការឡើងវិញនូវហេដ្ឋារចនាសម្ព័ន្ធមួយចំនួនដែលខូចខាតដោយសារសង្រ្គាម ពិសេសសាលារៀន។
ក៏ប៉ុន្តែ និងអ្វីបានកំពុងធ្វើឲ្យរដ្ឋាភិបាលទីក្រុងបាម៉ាកូឈឺក្បាល ទើសទាល់ចិត្តខ្លំាងនៅចំពោះមុខក្រុមប្រទេសផ្តល់ជំនួយពេលនេះ គឺយន្តហោះប្រធានាធិបតីមួយគ្រឿងដែលរដ្ឋាភិបាលបានទិញឲ្យលោកប្រធានាធិបតីអ៊ីប្រាហ៊ីម ប៊ូបាការ កេតាក្នុងតម្លៃ ៣០លានអឺរ៉ូ។ វាពិតជាមិនចម្លែកទេដែលប្រធានាធិបតីនៅក្នុងប្រទេសមួយត្រូវតែមានយន្តហោះមួយគ្រឿងសម្រាប់ធ្វើដំណើរការផ្លូវការនោះ។ តែអ្វីដែលចម្លែកបន្តិចសម្រាប់ប្រទេសម៉ាលីនៅត្រង់ថា ទី១ លោកអតីតប្រធានាធិបតីអាម៉ាឌូ ទូម៉ានី ទូរ៉េធ្លាប់បានទិញយន្តហោះមួយគ្រឿងរួចហើយ ចុះវាចំាបាច់អីទៅទិញថែមមួយគ្រឿងទៀតនោះ និងទី២ តើវាចំាបាច់ខ្លំាងឬដែលរដ្ឋាភិបាលត្រូវចំណាយលុយយ៉ាងច្រើនសម្បើមដើម្បីទិញយន្តហោះគ្រឿងសម្រាប់ប្រធានាធិបតីនៅក្នុងកាលៈទេសៈដែលប្រទេសកំពុងមានតម្រូវការចំណាយអាទិភាពផ្សេងទៀតនោះ។
កន្លងមក លោកស្រីគ្រីស្ទីន ឡាហ្កាដ នាយិកាអង្គការមូលនិធិរូបិយវត្ថុអន្តរជាតិបានសុំការពន្យល់បំភ្លឺពីរដ្ឋាភិបាលក្រុងបាម៉ាកូចំពោះការទិញយន្តហោះនោះ។ លោកនាយករដ្ឋមន្រ្តីម៉ាលីមូសសា ម៉ារ៉ាបានពន្យល់ថា មកពីយន្តហោះចាស់មិនទាន់សម័យ ហើយតម្លៃនៃការជួសជុលយន្តហោះចាស់ត្រូវចំណាយច្រើនជាងការជួលយន្តហោះថ្មីទៅទៀត។ តែបញ្ហានៅត្រង់ថា ការអះអាងរបស់លោកម៉ារ៉ាមិនបានធ្វើឲ្យមជ្ឈដ្ឋានជាតិ និងអន្តរជាតិទទួលយកបានឡើយ ពិសេសក្រុមប្រទេសផ្តល់ជំនួយដែលបានចំណាយលុយយ៉ាងច្រើនសម្បើមដើម្បីជួយកសាងប្រទេសម៉ាលី គឺមិនមែនដើម្បីទិញយន្តហោះបន្ថែមសម្រាប់បម្រើលោកប្រធានាធិបតីនោះទេ។
សូមជម្រាបជូនថា គឺទើបតែនៅប៉ុន្មានខែក្រោយការជាប់ឆ្នោតប្រធានាធិបតីរបស់លោកអ៊ីប្រាហ៊ីម ប៊ូបាការ កេតា (Ibrahim Boubacar Keïta) ទេ ដែលស្ថានការណ៍ទូទៅនៅម៉ាលីបាន និងកំពុងវិលមករកភាពប្រក្រតីឡើងវិញជាបណ្តើរៗនៅពេលនេះ។ មានអាយុ ៦៨ឆ្នំា លោកអ៊ីប្រាហ៊ីម ប៊ូបាការ កេតា គឺជាឥស្សរជនម្នាក់ដែលមានភាពចាស់ទុំច្រើនខាងនយោបាយ និងដែលប្រជាជនម៉ាលីទូទៅចាត់ទុកលោក ជាមនុស្សដែលស្គាល់ស្ថានការណ៍ប្រទេសច្បាស់លាស់ និងយល់ដឹងអំពីកិត្តិយស និងសេចក្តីថ្លៃថ្នូរ ព្រមទំាងទុក្ខធុរៈរបស់ប្រជាជន។ សក្ខីកម្មជាក់ស្តែងមិនអាចប្រកែកបាន គឺស្ថានការណ៍ល្អប្រសើររបស់ម៉ាលីដែលបាន និងកំពុងធ្វើឲ្យសហគមន៍អន្តរជាតិបង្កើនជំនឿទុកចិត្តនាពេលសព្វថ្ងៃ។
តែទោះជាយ៉ាងនេះក្តី ក៏នៅមានបញ្ហាចម្បងមួយដែលលោកអ៊ីប្រាហ៊ីមត្រូវព្យាយាមសម្រេចឲ្យបាន ពិសេសគឺការបន្តនិយាយផ្សះផ្សាប្រជាជនម៉ាលីដែលបាន និងកំពុងបន្តហែកហួរគ្នា រហូតដល់គំរាមពុះប្រទេសជាពីរបំណែក ខាងជើង និងខាងត្បូង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ