អង្គការសិទ្ធិមនុស្សទាមទារកុំឲ្យម៉ាឡេស៊ីបណ្តេញជនជាតិអ៊ុយហ្គួឲ្យទៅចិនវិញ
អង្គការសិទ្ធិមនុស្សម៉ាឡេស៊ី បានទាមទារដោយទទូច នៅថ្ងៃអាទិត្យ កុំឲ្យរដ្ឋាភិបាលម៉ាឡេស៊ីបញ្ជូនទៅចិន នូវជនជាតិអ៊ុយហ្គួចំនួន ១៥៥នាក់ ដែលអាជ្ញាធរទើបនឹងរកឃើញថា កំពុងស្នាក់នៅដោយខុសច្បាប់ ក្នុងប្រទេសម៉ាឡេស៊ី។ អង្គការសិទ្ធិមនុស្សបានបង្ហាញនូវក្តីបារម្ភ ជនជាតិអ៊ុយហ្គួទាំងនេះអាចនឹងត្រូវទទួលរងនូវការធ្វើទុក្ខបុកម្នេញពីអាជ្ញាធរចិន។
ចុះផ្សាយនៅថ្ងៃ៖
ស្តាប់ - ០១:៥០
យោងតាមបណ្តាញសារព័ត៌មានក្នុងស្រុក ដែលចុះផ្សាយ កាលពីថ្ងៃសុក្រ អាជ្ញាធរម៉ាឡេស៊ីបានឆែកឆេររកឃើញជនជាតិអ៊ុយហ្គួចំនួន ១៥៥នាក់ ក្នុងនោះ មាន ៧៦នាក់ ជាកុមារ កំពុងរស់នៅដោយលួចលាក់ នៅក្នុងផ្ទះល្វែងចំនួន ២ នៅក្នុងទីក្រុងគួឡាឡាំពួរ។
រហូតមកទល់នឹងពេលនេះ រដ្ឋាភិបាលម៉ាឡេស៊ីនៅមិនទាន់បានប្រកាសឲ្យដឹងនៅឡើយទេថា តើគេនឹងចាត់វិធានការបែបណាចំពោះជនជាតិអ៊ុយហ្គួទាំងនេះ។ ក៏ប៉ុន្តែ កាលពីឆ្នាំ២០១១ និងឆ្នាំ២០១២ នៅក្នុងករណីស្រដៀងគ្នានេះ រដ្ឋាភិបាលម៉ាឡេស៊ី ដែលកំពុងតែព្យាយាមស្វះស្វែងពង្រឹងទំនាក់ទំនងខាងផ្នែកពាណិជ្ជកម្មជាមួយចិន ធ្លាប់បានចាប់បញ្ជូនជនជាតិអ៊ុយហ្គួឲ្យត្រឡប់ទៅប្រទេសចិនវិញពីរលើករួចមកហើយ ដែលកាលណោះបានបណ្តាលឲ្យមានការរិះគន់យ៉ាងខ្លាំង ពីសំណាក់អង្គការសិទ្ធិមនុស្ស ក៏ដូចជា ទីភ្នាក់ងារអ.ស.បទទួលបន្ទុកជនភៀសខ្លួន។
នៅថ្ងៃអាទិត្យ អង្គការសិទ្ធិមនុស្សម៉ាឡេស៊ីបានធ្វើការអំពាវនាវដល់រដ្ឋាភិបាលម៉ាឡេស៊ី កុំឲ្យបណ្តេញជនជាតិអ៊ុយហ្គួទាំងនេះឲ្យត្រឡប់ទៅកាន់ប្រទេសចិនវិញដូចកាលពីមុនទៀត ដោយសម្តែងនូវក្តីបារម្ភអំពីគ្រោះថ្នាក់ដល់អាយុជីវិត ដែលពួកគេត្រូវប្រឈមមុខ នៅក្នុងប្រទេសចិន។
គួរបញ្ជាក់ថា ម៉ាឡេស៊ីមិនមែនជាប្រទេសហត្ថលេខីនៃសន្ធិសញ្ញាជនភៀសខ្លួនរបស់អ.ស.បនោះទេ ក៏ប៉ុន្តែ អង្គការសិទ្ធិមនុស្សបានក្រើនរំឭកដល់រដ្ឋាភិបាលក្រុងគួឡាឡាំពួរថា ម៉ាឡេស៊ីនៅតែជាប់កាតព្វកិច្ចត្រូវគោរពតាមគោលការណ៍ជាមូលដ្ឋាននៃច្បាប់អន្តរជាតិ ដែលហាមឃាត់មិនឲ្យមានការចាប់បញ្ជូនជនភៀសខ្លួនឲ្យទៅកាន់ទីកន្លែង ដែលពួកគេអាចនឹងត្រូវទទួលរងនូវការធ្វើទុក្ខបុកម្នេញ។
នៅចិន ជនជាតិអ៊ុយហ្គួ គឺជាជនជាតិភាគតិចកាន់សាសនាអ៊ីស្លាម ហើយច្រើនរស់នៅប្រមូលផ្តុំគ្នា នៅក្នុងតំបន់ស៊ីងជាំង ដែលតែងតែកើតមានអំពើហិង្សាជារឿយៗ ហើយនៅក្នុងអំពើហិង្សានេះ អាជ្ញាធរក្រុងប៉េកាំងច្រើនតែចោទប្រកាន់ពួកអ៊ុយហ្គួថាជា “ភេរវជន”៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ