ចិនចុះកិច្ចសន្យាទិញឧស្ម័នពីរុស្ស៊ីក្នុងតម្លៃរាប់រយពាន់លានដុល្លារ
រុស្ស៊ី និងចិន បានចុះហត្ថលេខាលើកិច្ចសន្យាទិញលក់ឧស្ម័ន ក្នុងតម្លៃរាប់រយពាន់លានដុល្លារ កាលពីថ្ងៃពុធ។ កិច្ចសន្យានេះត្រូវបានចុះ នៅថ្ងៃចុងក្រោយនៃដំណើរទស្សនកិច្ចរបស់លោកប្រធានាធិបតីរុស្ស៊ី វ៉្លាឌីមៀរ ពូទីន នៅក្នុងប្រទេសចិន។ ការចុះកិច្ចសន្យាលក់ឧស្ម័នទៅឲ្យចិននេះ គឺជាគោលដៅដ៏ចម្បងមួយ ដែលលោកពូទីនចង់សម្រេចឲ្យបាន នៅក្នុងពេលដែលរុស្ស៊ីកំពុងមានភាពតានតឹងជាមួយបណ្តាប្រទេសនៅអឺរ៉ុប ជុំវិញវិបត្តិនៅអ៊ុយក្រែន។
ចុះផ្សាយនៅថ្ងៃ៖ កែប្រែថ្ងៃទី៖
កិច្ចសន្យាទិញលក់ឧស្ម័ន ត្រូវបានចុះ រវាងក្រុមហ៊ុន Gazprom ដែលជាក្រុមហ៊ុនរដ្ឋរុស្ស៊ី និងក្រុមហ៊ុន China National Petroleum Corp ដែលជាក្រុមហ៊ុនរដ្ឋរបស់ចិន។ ពិធីចុះហត្ថលេខាត្រូវបានធ្វើឡើង នៅទីក្រុងសៀងហៃ ក្រោមអធិបតីភាពរបស់លោកវ៉ា្លឌីមៀរ ពូទីន និងលោកស៊ី ជីនពីង។ រុស្ស៊ី និងចិន មិនបានបង្ហាញឲ្យដឹង អំពីទំហំទឹកប្រាក់នៃកិច្ចសន្យានេះទេ ក៏ប៉ុន្តែ គេបានប៉ាន់ប្រមាណថា វាមានតម្លៃសរុបរហូតដល់ទៅប្រមាណជា ៤០០ពាន់លានដុល្លារ។
តាមរយៈកិច្ចសន្យានេះ រុស្ស៊ីនឹងត្រូវផ្គត់ផ្គង់ឧស្ម័នទៅឲ្យចិន ប្រមាណជា ៣៨ពាន់លានម៉ែត្រគុបក្នុងមួយឆ្នាំៗ សម្រាប់រយៈពេល ៣០ឆ្នាំ។ ក៏ប៉ុន្តែ ទាល់តែដល់ឆ្នាំ២០១៨ ទើបការផ្គត់ផ្គង់ឧស្ម័ននេះនឹងត្រូវចាប់ផ្តើមធ្វើ តាមរយៈបំពង់បង្ហូរឧស្ម័ន ចេញពីរុស្ស៊ី កាត់តាមតំបន់ស៊ីបេរី ទៅដល់ប្រទេសចិន។
គួរបញ្ជាក់ថា កិច្ចសន្យាទិញលក់ឧស្ម័ននេះ ត្រូវបានចិន និងរុស្ស៊ី ចរចាគ្នា អស់រយៈពេលប្រមាណជា ១០ឆ្នាំមកហើយ។ ចំណុចចម្រូងចម្រាសចុងក្រោយបំផុត គឺទាក់ទងនឹងតម្លៃ។ គិតមកទល់នឹងពេលដែលលោកពូទីនចាប់ផ្តើមដំណើរទស្សនកិច្ច ទៅកាន់ប្រទេសចិន កិច្ចសន្យាទិញលក់ឧស្ម័ននេះក៏នៅមិនទាន់ត្រូវបានភាគីទាំងពីរចរចាត្រូវរ៉ូវគ្នានៅឡើយដែរ ខណៈពេលដែលលោកពូទីនរំពឹងចង់ចុះកិច្ចសន្យានេះឲ្យបាន មុនពេលលោកបញ្ចប់ដំណើរទស្សនកិច្ចនៅចិន។
អ្នកជំនាញខាងការចរចាពាណិជ្ជកម្មអន្តរជាតិខ្លះគិតថា ចិនទំនងជាកិកកុកខ្លាំងរឿងតម្លៃ ដោយសារតែចិនដឹងថា រុស្ស៊ីកំពុងមានភាពតានតឹងជាមួយប្រទេសនៅអឺរ៉ុប ដោយសារតែវិបត្តិអ៊ុយក្រែន ហើយកំពុងស្វះស្វែងរកអតិថិជនថ្មី សម្រាប់លក់ឧស្ម័ន។ ដូច្នេះ រុស្ស៊ីទំនងជាសុខចិត្តបញ្ចុះតម្លៃទៅតាមការទាមទាររបស់ចិន ទើបកិច្ចសន្យានេះត្រូវបានចុះ នៅក្នុងអំឡុងដំណើរទស្សនកិច្ចរបស់លោកពូទីន ដូចអ្វីដែលលោកប្រាថ្នាចង់បាន។
គួររំឭកឡើងវិញផងដែរថា រុស្ស៊ីធ្លាប់បានព្រមានសហភាពអឺរ៉ុបថា ចាប់ពីដើមខែមិថុនាខាងមុខនេះទៅ ប្រសិនបើអ៊ុយក្រែនមិនព្រមសងលុយថ្លៃឧស្ម័នដែលជំពាក់ទេនោះ រុស្ស៊ី នឹងផ្តាច់ការផ្គត់ផ្គង់ឧស្ម័នទៅឲ្យអ៊ុយក្រែន ហើយការផ្គត់ផ្គង់ប្រេងទៅកាន់ប្រទេសនៅអឺរ៉ុបដោយឆ្លងកាត់ប្រទេសអ៊ុយក្រែន ក៏អាចនឹងត្រូវកាត់ផ្តាច់ផងដែរ។
កាលពីប៉ុន្មានថ្ងៃមុននេះ លោកឌីមីទ្រី មេដវេដេវ នាយករដ្ឋមន្រ្តីរុស្ស៊ី ធ្លាប់បាននិយាយផ្គើន សហភាពអឺរ៉ុប ដែលដាក់ទណ្ឌកម្មលើរុស្ស៊ី ជុំវិញវិបត្តិនៅអ៊ុយក្រែនថា រុស្ស៊ីនឹងបង្វែរឧស្ម័ន ដែលធ្លាប់តែលក់ទៅឲ្យអឺរ៉ុប យកទៅលក់ឲ្យចិនវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ