ចំណូលពីពលរដ្ឋនឹងបន្ថយការពឹងផ្អែកលើហិរញ្ញប្បទានបរទេសសម្រាប់កម្ពុជា
ព្រឹកមិញ គណៈរដ្ឋមន្ត្រីកម្ពុជាបានប្រជុំឆ្លងសេចក្តីព្រាងយុទ្ធសាស្ត្រកៀរគរចំណូលរយៈពេលមធ្យមពីឆ្នាំ២០១៤ ដល់ឆ្នាំ២០១៨ ក្រោមអធិបតីភាពរបស់នាយករដ្ឋមន្ត្រី ហ៊ុន សែន។ អ្នកនាំពាក្យទីស្តីការគណៈរដ្ឋមន្ត្រីបានបង្ហាញអំពីគោលបំណង គោលដៅ និងអភិក្រមនៃសេចក្តីព្រាងយុទ្ធសាស្ត្រកៀរគរ ចំណូលក្នុងរយៈពេល៥ឆ្នាំខាងមុខ។ យុទ្ធសាស្ត្រនេះនឹងងាកទៅរកចំណូលពីប្រជាពលរដ្ឋ ដែលជាអ្នកបង់ពន្ធវិញ ជាជាងពឹងផ្អែកលើហិរញ្ញប្បទានពីក្រៅប្រទេស។
ចុះផ្សាយនៅថ្ងៃ៖
ស្តាប់ - ០២:០៣
រដ្ឋាភិបាលកម្ពុជាមានគោលដៅបង្កើនចំណូលចរន្តសរុបពី១៥,២០% នៃផលិតផលសរុបក្នុងស្រុកនៅឆ្នាំ២០១៤ ដល់១៧,៣៦%នៃផលិតផលសរុបក្នុងស្រុកនៅឆ្នាំ២០១៨។ នេះបើយោងតាមការឱ្យដឹងរបស់លោក ផៃ ស៊ីផាន នៅព្រឹកថ្ងៃសុក្រ។
អ្នកនាំពាក្យទីស្តីការគណៈរដ្ឋមន្ត្រីបន្តថា សេចក្តីព្រាងយុទ្ធសាស្ត្រកៀរគរចំណូលរយៈពេលមធ្យម ពីឆ្នាំ២០១៤ដល់ឆ្នាំ២០១៨ ដែលទីស្តីការគណៈរដ្ឋមន្ត្រី បានអនុម័តនៅពេលនោះ គឺផ្តោតជាចម្បងលើការពង្រឹងរដ្ឋបាលសារពើពន្ធ និងមិនមែនសារពើពន្ធ ក៏ដូចជាលើការលើកកម្ពស់វប្បធម៌បង់ពន្ធដែរ។
តាមលោក ផៃ ស៊ីផាន ដើម្បីឆ្លើយតបទៅនឹងតម្រូវការសេដ្ឋកិច្ចទីផ្សារដែលកំពុងលូតលាស់ កំណើននៃចំនួនអ្នកបង់ពន្ធ ក៏ដូចជាភាពស្មុគស្មាញនៃសកម្មភាពធុរកិច្ចសម័យទំនើប រដ្ឋាភិបាលនឹងខំប្រមូលចំណូលពន្ធគយ ចំណូលពន្ធដារ ព្រមទាំងចំណូលមិនមែនសារពើពន្ធ ឱ្យមានប្រសិទ្ធភាព និងឱ្យអស់សក្តានុពល តាមរយៈការកែលម្អរដ្ឋបាលសារពើពន្ធ និងការលើកកម្ពស់អភិបាលកិច្ច។ ជារួម សេចក្តីព្រាងយុទ្ធសាស្ត្រកៀរគរចំណូលរយៈពេលមធ្យមនេះ ផ្អែកលើសសរស្តម្ភបី ក្នុងនោះមានការពង្រឹងរដ្ឋបាលចំណូល ការកែលម្អគោលនយោបាយចំណូល និងការពង្រឹងការត្រួតពិនិត្យ និងវាយតម្លៃ។
ក្នុងចំណោមគោលបំណងជាច្រើនទៀត ក្រៅពីដើម្បីពង្រីកលំហថវិកាដើម្បីពង្រឹងស្ថិរភាពម៉ាក្រូសេដ្ឋកិច្ច និងហិរញ្ញវត្ថុ យុទ្ធសាស្ត្រថ្មីនេះនឹងជួយគ្រប់គ្រងបំណុលប្រកបដោយចីរភាព និងកាត់បន្ថយការពឹងផ្អែកលើហិរញ្ញប្បទានពីក្រៅប្រទេស។ លោក ផៃ ស៊ីផាន អះអាងដូច្នេះ ដោយបន្ថែមថា យុទ្ធសាស្ត្រកៀរគរចំណូលរយៈពេលមធ្យម២០១៤-២០១៨ ក៏នឹងបង្កើនធនធានថវិកាសម្រាប់តម្រូវការបន្ទាន់របស់រដ្ឋាភិបាល នាពេលអនាគតផងដែរ។
បច្ចុប្បន្ន ក្រសួងសេដ្ឋកិច្ច ដែលជាអ្នកតាក់តែងសេចក្តីព្រាងយុទ្ធសាស្ត្រនោះតាំងពីឆ្នាំ២០១៣មក បាននិងកំពុងសាងសង់ អាគារធំៗច្រើនជាន់ សម្រាប់មន្ត្រីពន្ធដានៅទូទាំងប្រទេស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ