ស្ថានការណ៍នៅព្រះវិហារបន្តតានតឹងនៅថ្ងៃនេះ
រថក្រោះនិងគ្រឿងសព្វាវុធ ដែលកម្ពុជាបញ្ជូនទៅព្រះវិហារនៅថ្ងៃម្សិលមិញ បានទៅដល់គោលដៅហើយ នៅព្រឹកថ្ងៃសៅរ៍នេះ ដើម្បីត្រៀមទប់ទល់ជាមួយថៃក្នុងករណីដែលមានផ្ទុះសង្គ្រាមជាយថាហេតុ។ ចំណែកឯទាហានថៃវិញ បានបង្កើនចំនួនកាន់តែច្រើន និងបានជីកលេណដ្ឋាន ដើម្បីត្រៀមប្រយុទ្ធ។ យ៉ាងណាក៏ដោយ រដ្ឋមន្ត្រីការពារជាតិកម្ពុជា លោកទៀ បាញ់អះអាងថា ស្ថានការណ៍នៅមិនទាន់មានអ្វីប្រែប្រួលនៅឡើយទេ តែភាគីទាំងពីរនៅតែស្ថិតក្នុងលក្ខណៈប្រុងជើងការ។
ចុះផ្សាយនៅថ្ងៃ៖
សេចក្តីរាយការណ៍របស់ ប៉ែន បូណាពីទីក្រុងភ្នំពេញ
គ្រឿងសព្វាវុធយោធាធុនធ្ងន់ដូចជារថក្រោះ រថពាសដែក និងកាំជ្រួចប្រតិកម្ម ដែលក្រសួងការពារជាតិបានបញ្ជូនទៅកាន់តំបន់ជាយដែន បានទៅដល់ខេត្តព្រះវិហារហើយ នៅថ្ងៃសៅរ៍នេះ ដើម្បីត្រៀមលក្ខណៈទប់ទល់ជាមួយនឹងការឈ្លានពានរបស់ថៃ។
គ្រឿងសព្វាវុធធុនធ្ងន់ទាំងនោះត្រូវបានក្រសួងការពារជាតិបញ្ជាឱ្យយកទៅតំបន់ព្រំដែនកាលពីថ្ងៃម្សិលមិញ ខណៈដែលស្ថានការណ៍កាន់តែតានតឹងឡើង។ ភាពតានតឹងនេះបានកើតឡើង បណ្តាលមកពីនាយករដ្ឋមន្ត្រីថៃទាមទារឱ្យកម្ពុជាដកទង់ជាតិចេញពីវត្តកែវសិក្ខាគីរីស្វារៈ តែកម្ពុជាមិនព្រមធ្វើតាម។
ខណៈដែលកម្ពុជាបញ្ជូនសព្វាវុធទៅដល់ព្រះវិហារ ថៃចាប់ផ្តើមបង្កើនទ័ព និងជីកលេណដ្ឋាន ដើម្បីត្រៀមប្រយុទ្ធដែរ។ ប៉ុន្តែ លោកទៀ បាញ់ រដ្ឋមន្ត្រីក្រសួងការពារជាតិកម្ពុជា បានអះអាងនៅថ្ងៃនេះថា ស្ថានការណ៍នៅចំណុចព្រំដែនមានសភាពស្ងប់ស្ងាត់ មិនទាន់មានអ្វីប្រែប្រួលទេនៅថ្ងៃសៅរ៍នេះ។ កងទ័ពទាំងសងខាងស្ថិតក្នុងសភាពប្រុងជើងការរៀងៗខ្លួន តែមិនបានប៉ះទង្គិចគ្នាទេ។
សេចក្តីរាយការណ៍ពីតំបន់ព្រំដែនឲ្យដឹងថា ស្ថានភាពយោធាចាប់តាំងពីចំណុចប្រាសាទតាមាន់ តាក្របី ក្នុងខេត្តឧត្តរមានជ័យ រហូតមកដល់ប្រាសាទព្រះវិហារ កំពុងស្ថិតនៅក្នុងសភាពស្ងៀមស្ថាត់ តែតានតឹង។
ដោយឡែក ប្រភពយោធាពីជាយដែនឱ្យដឹងថា មេបញ្ជាការការពារព្រំដែនខ្មែរនិងថៃ រវាងខេត្តបន្ទាយមានជ័យ និងខេត្តបូរ៉រ៉ាំ និងខេត្តសុរិន្ទរបស់ថៃបានជួបពិភាក្សាគ្នានៅព្រឹកថ្ងៃទី២៩មករានេះ នៅឯប្រាសាទតាមាន់ធំ ដើម្បីធ្វើយ៉ាងណាបន្ធូរបន្ថយស្ថានការណ៍នៅតាមជាយដែន ដែលកំពុងតែតានតឹង និងឈានទៅរកការផ្ទុះអាវុធ។
សូមបញ្ជាក់ថា ការប្រឈមមុខដាក់គ្នាជាថ្មីរវាងទាហានខ្មែរនិងថៃបានចាប់ផ្តើមឡើងវិញ កាលពីថ្ងៃទី២៦មករា នៅពេលដែលទាហានថៃបានទាមទារឱ្យកម្ពុជារុះរើអក្សរចារឹកជាភាសាខ្មែរ ដែលបញ្ជាក់ពីការឈ្លានពានរបស់ថៃ ចេញពីមុខវត្តកែវសិក្ខាគីរីស្វារៈ។ បន្ទាប់មកទៀត ថៃបានទាមទារឱ្យកម្ពុជាដកទង់ជាតិចេញពីវត្តទៀត។ ភាពតានតឹងនេះហើយដែលជំរុញឱ្យកម្ពុជាបញ្ជូនសព្វាវុធធុនធ្ងន់ទៅកាន់ព្រះវិហារជាថ្មី។
យ៉ាងណាក៏ដោយ រដ្ឋមន្ត្រីការបរទេសកម្ពុជាលោកហោ ណាំហុង និងសមភាគីថៃ គ្រោងនឹងជួបគ្នានៅដើមខែកុម្ភៈខាងមុខនេះ ក្នុងខេត្តសៀមរាប ដើម្បីដោះស្រាយបញ្ហាមួយចំនួន។ លោកកុយ គួង អ្នកនាំពាក្យក្រសួងការបរទេស មិនអាចទាក់ទងបានទេនៅថ្ងៃនេះ ប៉ុន្តែកាលពីថ្ងៃម្សិលមិញ ក្រសួងការបរទេសកម្ពុជាបានបដិសេធយ៉ាងដាច់អហង្ការមិនព្រមដកទង់ជាតិចេញពីវត្តកែវសិក្ខាគីរីស្វារៈឡើយ ពីព្រោះវត្តនោះស្ថិតនៅលើទឹកដីខ្មែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ