រដ្ឋធម្មនុញ្ញថៃថ្មីនឹងរក្សាទុកក្រុមយោធាឱ្យដឹកនាំប្រទេសដដែល
បន្ទាប់ពីមន្ត្រីយោធាជាន់ខ្ពស់ ថ្ងៃនេះដល់វេនលោក ប្រាយុទ្ធចាន់-អូចាម្តងដែលចេញមុខការពារខ្លួន ប្រកាសបដិសេធថាមិនបានរៀបចំផែនការអ្វីទុកជាមុន ដែលនាំឱ្យសម្រេចបាននូវរដ្ឋប្រហារថ្ងៃទី២២ឧសភាទេ។ ប្រតិកម្មតាមកញ្ចក់ទូរទស្សន៍នេះ ធ្វើឡើងបន្ទាប់ពីកាសែតក្នុងស្រុក បានចុះផ្សាយថាមេដឹកនាំបាតុកម្មនិងមេទ័ពថៃ បានរៀបគម្រោងទម្លាក់រដ្ឋាភិបាលតាំងពីឆ្នាំ២០១០មក។ ក្នុងពេលជាមួយគ្នានោះ បើតាមសារព័ត៌មានក្នុងស្រុក របបដឹកនាំសឹកនេះ នឹងមិនត្រូវរំលាយចោលឡើយ ក្រោយការកែប្រែរដ្ឋធម្មនុញ្ញរួច។
ចុះផ្សាយនៅថ្ងៃ៖
ស្តាប់ - ០២:០០
“មិនពិតទេ” ! ខ្ញុំមិនបានកាន់បក្សកាន់ពួកឡើយ ខាងណាឡើយ ! នេះប្រសាសន៍បដិសេធ របស់ លោក ប្រាយុទ្ធ ចាន់អូចា ដោយផ្ទាល់នៅក្នុងបទសម្ភាសន៍ប្រចាំសប្តាហ៍យប់មិញ ដើម្បីឆ្លើយតបទៅនឹងពាក្យចចាមអារាមដែលថា លោកមេទ័ពបានពិភាក្សាជាមួយប្រមុខបក្សប្រឆាំងរៀបចំធ្វើរដ្ឋប្រហារតាំងពីឆ្នាំ២០១០មក។ ឆ្លៀតឱកាសនោះ លោកប្រាយុទ្ធចាន់អូចា បានរំលឹកព្រមានហាមឃាត់មិនឱ្យមានសុន្ទរកថានយោបាយ ឬការប្រមូលមូលនិធិដើម្បីប្រយោជន៍នយោបាយទេ ដរាបណាថៃស្ថិតក្រោមច្បាប់អាជ្ញាសឹក និងបានបង្ហាញអំពីកាលបរិច្ឆេទសំខាន់នៃការស្ថាបនាជាតិ។
បើតាមលោកប្រាយុទ្ធចាន់អូចា រដ្ឋធម្មនុញ្ញថ្មីបណ្តោះអាសន្ននឹងត្រូវបញ្ចប់នៅខែក្រោយ សភាជាតិនឹងត្រូវតែងតាំងនៅខែកញ្ញា សម្រាប់បង្កើតរដ្ឋាភិបាលអន្តរកាល បន្ទាប់មកទើបមានបង្កើតក្រុមប្រឹក្សាកំណែទម្រង់ ដើម្បីតាក់តែងរដ្ឋធម្មនុញ្ញសម្រេច មុននឹងឈានដល់ការបោះឆ្នោត បីខែក្រោយរដ្ឋធម្មនុញ្ញចូលជាធរមាន។
របបសឹកដែលទំនងជាត្រូវបន្តគ្រប់គ្រងប្រទេសរយៈពេលយូរទៅមុខទៀត ព្រោះបើតាម ខ្លឹមសារលម្អិតនៃរដ្ឋធម្មនុញ្ញបណ្តោះអាសន្ន ដែលធ្លាយចេញលើសារព័ត៌មានក្នុងស្រុកមួយ របបដឹកនាំដោយយោធា នឹងនៅរក្សាទុកដដែល ហើយមានលទ្ធភាពចេញក្រិត្យផ្សេងៗ ដែលមានពាក់ព័ន្ធនឹងបញ្ហាសន្តិសុខ។ រដ្ឋាភិបាលបណ្តោះអាសន្ននឹងស្ថិតក្រោយអំណាចរបស់យោធា។
ទន្ទឹមគ្នានោះដែរ ក្រុមប្រឹក្សាសភានឹងត្រូវបង្កើតឡើង ដែលមានសមាជិក២០០នាក់តែងតាំងដោយយោធា។ សមាជិកពាក់កណ្តាលគឺជាមន្ត្រីកងទ័ពសកម្មមានឋាន្តរសិក្តតែម្តង។ បន្ទាប់មក ទើបមានក្រុមប្រឹក្សាកំណែទម្រង់នយោបាយ។
ប្រសិនបើព័ត៌មានធ្លាយចេញនេះជាការពិត នោះប្រទេសថៃកំពុងបោះជំហានដើរថយក្រោយ គួរឱ្យកត់សម្គាល់វិលទៅរករបបផ្តាច់ការដូចទសវត្សឆ្នាំ១៩៥០-៦០។ កាលពីរដ្ឋប្រហារឆ្នាំ២០០៦ ក្រុមយោធាបានផ្ទេរអំណាចយ៉ាងឆាប់រហ័សទៅឱ្យរដ្ឋាភិបាលស៊ីវិល ដែលឈរដឹកនាំប្រទេសយ៉ាងឯករាជ្យ។ ឥលូវក្រុមយោធាទំនងជាមានបទពិសោធន៍ ហាក់ចង់កាន់កាប់តំណែងដឹកនាំប្រទេសរហូតរៀងទៅ ៖ គ្មានឡើយផែនការរៀបចំក្នុងរយៈពេលមួយឆ្នាំខាងមុខ។ សេរីភាពរបស់ប្រជាពលរដ្ឋត្រូវបានរិតបណ្តឹង ក្រោមហេតុផលតែមួយគឺស្តារសណ្តាប់ធ្នាប់សង្គម និងសេចក្តីសុខប្រជាជន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ