ថៃតែងតាំងលោកព្រេមទីនស៊ូឡាណុនជាប្រមុខរដ្ឋស្តីទីក្នុងពេលរង់ចាំមានស្តេចថ្មី
ក្រោយពីព្រះមហាក្សត្រថៃទ្រង់សោយព្រះទិវង្គត កាលពីថ្ងៃព្រហស្បតិ៍ ព្រះអង្គម្ចាស់ មហាវជ្ជរាឡុងកន ដែលជារាជទាយាទបានស្នើសុំពន្យារពេល មិនឡើងមកស្នងរាជភ្លាមៗនោះទេ។ នៅក្នុងពេលដែលរាជបល្ល័ង្កនៅទំនេរបែបនេះ របបសឹកថៃបានប្រកាសឲ្យដឹងថា លោកព្រេមទីនស៊ូឡាណុន ដែលជាប្រធានក្រុមប្រឹក្សាព្រះមហាក្សត្រនឹងត្រូវកាន់តំណែងជាប្រមុខរដ្ឋស្តីទី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៦
យើងតាមការប្រកាសរបស់ឧបនាយករដ្ឋមន្រ្តីថៃ តំណែងជាប្រមុខរដ្ឋស្តីទីនឹងត្រូវកាន់កាប់ជាលក្ខណៈបណ្តោះអាសន្ន ដោយសារតែរាជបល្ល័ង្កនៅទំនេរ ហើយយោងតាមរដ្ឋធម្មនុញ្ញ អ្នកដែលត្រូវកាន់តំណែងជាប្រមុខរដ្ឋស្តីទីនេះ គឺលោកព្រេមទីនស៊ូឡាណុន ដែលជាប្រធានក្រុមប្រឹក្សាព្រះមហាក្សត្រ។
លោកព្រេមទីនស៊ូឡាណុន ដែលបច្ចុប្បន្នមានវ័យ ៩៦ឆ្នាំ តែហាក់មានសុខភាពមាំទាំនៅឡើយ ធ្លាប់កាន់តំណែងជាអគ្គបញ្ជាការកងទ័ព និងជាអតីតនាយករដ្ឋមន្រ្តី មុននឹងត្រូវព្រះមហាក្សត្រ ភូមិផុន អាឌុនយ៉ាដេត តែងតាំងជាប្រធានក្រុមប្រឹក្សាព្រះមហាក្សត្រ នៅឆ្នាំ១៩៩៨។
លោកព្រេមទីនស៊ូឡាណុន ត្រូវបានគេចាត់ទុកថាជាមនុស្សដ៏ជំនិតបំផុតរបស់ព្រះមហាក្សត្រ ហើយក៏ជាអ្នកដែលមានឥទ្ធិពលយ៉ាងខ្លាំងដែរ នៅក្នុងជួរកងទ័ព ក៏ដូចជា នៅក្នុងឆាកនយោបាយថៃជាទូទៅ។ គឺលោកព្រេម ដែលត្រូវគេសង្ស័យថាជាអ្នកញាក់ខ្សែពីក្រោយឆាក នៅក្នុងវិបត្តិនយោបាយថៃនាពេលបច្ចុប្បន្ន ជាពិសេស គឺរងការចោទប្រកាន់ថាជាអ្នករៀបចំរដ្ឋប្រហារទម្លាក់លោកថាក់ កាលពីឆ្នាំ២០០៦។
គួរបញ្ជាក់ថា យោងតាមច្បាប់ថៃ គឺព្រះមហាក្សត្រមុនដែលជាអ្នកមានសិទ្ធិជ្រើសរើសអ្នកស្នងរាជ្យ ហើយព្រះបាទ ភូមិផុន អាឌុនយ៉ាដេត បានតែងតាំងព្រះអង្គម្ចាស់ មហា វជិរ៉ាឡុងកន ជារាជទាយាទ តាំងពីឆ្នាំ១៩៧២។
ដូច្នេះ តាមច្បាប់ រាជបល្លង្កត្រូវតែបានទៅព្រះអង្គម្ចាស់ មហា វជិរ៉ាឡុងកន ដោយគ្មានអ្វីត្រូវមន្ទិលសង្ស័យនោះទេ។ ក៏ប៉ុន្តែ ការពន្យារពេលក្នុងការឡើងមកគ្រងរាជ្យនេះ កំពុងតែបង្កើតឲ្យមានភាពមិនច្បាស់លាស់ និងបរិយាកាសថប់បារម្ភ ដែលជាបច្ច័យមិនល្អមួយ សម្រាប់ទីផ្សារមូលបត្រថៃ ហើយក៏អាចបង្កនូវផលប៉ះពាល់ទៅដល់សេដ្ឋកិច្ចថៃផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ