អាជ្ញាធរថៃចាប់បានអ្នកចាប់ជំរិត និងជួញដូរជនជាតិរ៉ូហ៊ីងយ៉ា
កាលពីថ្ងៃអាទិត្យទី ១២តុលា អាជ្ញាធរថៃបានអះអាងថា គេបានរកឃើញប្រជាជនរ៉ូហ៊ីងយ៉ាមួយក្រុមនៅក្នុងចំការកៅស៊ូ នៅក្នុងខេត្តផាង ង៉ាដែលស្ថិតនៅភាគខាងត្បូងប្រទេសថៃ។ នៅក្នុងប្រតិបត្តិការបង្រ្កាបជនអន្តោប្រវេសន៍ខុសច្បាប់ ប៉ូលិសថៃបានចាប់មនុស្សពីរនាក់ដែលគេសង្ស័យជាមេចាប់ជំរិត ជនជាតិរ៉ូហ៊ីងយ៉ា និងជួយញដូរពួកគេឲ្យទៅធ្វើការដោយបង្ខំ នៅក្នុងចំការកៅស៊ូថៃ។
ចុះផ្សាយនៅថ្ងៃ៖
ស្តាប់ - ០១:៥០
ក្នុងចំណោមជនទាំង៥៣នាក់ ដែលអាជ្ញាធរថៃរកឃើញនៅក្នុងចំការកៅស៊ូ កាលពីថ្ងៃសៅរ៍ ភាគច្រើនជាជនជាតិរ៉ូហ៊ីងយ៉ា ភៀសខ្លួន រត់គេចចេញពីអំពើហិង្សានៅ ភូមា និងមួយចំនួនទៀត ជាជនជាតិបង់ក្លាដែស។ ពួកគេទាំងនោះ មិនមែនជាជនអន្តោប្រវេសន៍ដែលលួចចូលខុសច្បាប់ក្នុងទឹកដីថៃ ដូចករណីមុនៗដែលអាជ្ញាធរថៃចាប់បានទេ។ តាមអាជ្ញាធរថៃ បន្ទាប់ពីបានសាកសួរ គេបានដឹងថា ជនជាតិរ៉ូហ៊ីងយ៉ាទាំងនោះ ត្រូវបានគេជួញដូរមកពីប្រទេសបង់ក្លាដែស។
►សូមអាន៖ មន្ត្រីយោធាថៃពាក់ព័ន្ធក្នុងការរកស៊ីរត់ពន្ធមនុស្ស
នៅក្នុងប្រទេសថៃ ជនជាតិរ៉ូហ៊ីងយ៉ានឹងមិនត្រូវគេចាត់ទុកជាក្រុមមនុស្សលួចឆ្លងដែនខុសច្បាប់ ប៉ុន្តែ ជាជនរងគ្រោះដោយសារការជួញដូរ។ ជនជាតិថៃពីររូបត្រូវបានចាប់ខ្លួន និងចោទប្រកាន់ពីបទជួយដូរមនុស្ស។
យោងតាមកាសែតក្នុងស្រុកថៃ ភាគច្រើននៃមនុស្សដែលគេរកឃើញ គឺជាជនភៀសខ្លួនពីប្រទេសភូមា ដែលរស់នៅក្នុងជំរំមួយរបស់អង្គការសហប្រជាជាតិក្នុងប្រទេសបង់ក្លាដែស។ ពួកគេមួយចំនួនដែលស្រមៃចង់ធ្វើដំណើរទៅប្រទេសម៉ាឡេស៊ី បានចាញ់ឧបាយកលរបស់ឈ្មួញជួញដូរ ក្នុងពេលជនរងគ្រោះមួយចំនួនផ្សេងទៀតត្រូវបានពួកឈ្មួញដាក់ថ្នាំសន្លប់ លើកដាក់លើទូក សំដៅភាគខាងត្បូងប្រទេសថៃ។
យោងតាមក្រុមការពារសិទ្ធិមនុស្ស ជនភៀសខ្លួនដែលរសាត់អណ្តែតគ្មានលំនៅច្បាស់លាស់តែងតែធ្លាក់រងគ្រោះក្នុងសកម្មភាពជួញដូរមនុស្ស។ អង្គការការពារសិទ្ធិមនុស្សក៏ធ្លាប់បានបន្ទោសអាជ្ញាធរថៃ ពីរឿងចាប់បញ្ជូនចេញ ជនភៀសខ្លួនរ៉ូហ៊ីងយ៉ា នៅពេលពួកគេរត់គេចចេញពីអំពើហិង្សា នៅក្នុងប្រទេសភូមា។
នៅភូមា មានប្រជាជនរ៉ូហ៊ីងយ៉ា ប្រមាណ៨សែននាក់។ ប៉ុន្តែ អំពើហិង្សាសាសនានៅភូមា បានជំរុញឲ្យក្រុមជាតិភាគតិចនេះ រត់គេចពីភូមា ទៅប្រទេសជិតខាង ជាពិសេសប្រទេសម៉ាឡេស៊ី ។ រដ្ឋាភិបាលភូមាមិនបានចាត់ទុកជាតិភាគតិច រ៉ូហ៊ីងយ៉ា ជាជនជាតិភូមាទេ ប៉ុន្តែ ជាជនអន្តោប្រវេសន៍ ដែលចូលមករស់នៅខុសច្បាប់នៅភូមា។ ជនជាតិរ៉ូហ៊ីងយ៉ាធ្លាប់ត្រូវបានអង្គការសហប្រជាជាតិវាយតម្លៃថា ជាជនជាតិដែលទទួលរងការធ្វើទុកបុកម្នេញ និងសម្លាប់ រុកគួនខ្លាំងជាងគេ នៅក្នុងពិភពលោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ