ភ្ញៀវទេសចរណ៍អន្តរជាតិនិងកើនឡើងដល់៧,៥លាននាក់នៅឆ្នាំ២០២០
នៅក្នុងឱកាសប្រារព្ធខួបលើកទី៣នៃទិវាជាតិទីក្រុងស្អាត និងជោគជ័យលើវិស័យទេសចរណ៍ លោកនាយករដ្ឋមន្ត្រី ហ៊ុន សែន បានសម្តែងនូវមោទនភាពពីកំណើនទេសចរណ៍ជារៀងរាល់ឆ្នាំ និងជួយផ្តល់ការងារដល់ប្រជាពលរដ្ឋ បន្ទាប់ពីមានការប្រលងប្រណាំងទីក្រុងស្អាតរមនីយដ្ឋានស្អាត សេវាល្អ។ ដោយឡែកទីក្រុងចំនួន៤និងខណ្ឌចំនួនមួយទទួលបានការវាយតម្លៃថា បានទទួលជ័យលាភីផ្ការំដួល៣ទង ដែលជាជ័យលាភីខ្ពស់ជាងគេ ក្នុងចំណោមទីក្រុងនិងខណ្ឌប្រកួតប្រជែងចំនួន៣។
ចុះផ្សាយនៅថ្ងៃ៖
ស្តាប់ - ០២:៤៨
លោក នាយករដ្ឋមន្ត្រីហ៊ុន សែន នៅព្រឹកថ្ងៃអង្គារទី២៤កុម្ភៈឆ្នាំ២០១៥នេះ បានវាយតម្លៃថា តាមរយៈវិស័យទេសចរណ៍ដែលជាមាសបៃតងនោះ ប្រទេសកម្ពុជានឹងមានអត្រាកំណើនភ្ញៀវទេសចរណ៍ជាបន្តបន្ទាប់ និងកើនដល់៧,៥លាននាក់នៅឆ្នាំ២០២០ខាងមុខ។ ជាមួយនេះវិស័យទេសចរណ៍ក៏បានរកចំណូលចូលរដ្ឋជាច្រើនប្រចាំឆ្នាំ និងផ្តល់ការងារដល់ប្រជាពលរដ្ឋកម្ពុជាជាច្រើននាក់ផងដែរ។
« សម្លេង ហ៊ុន សែន»
ការលើកឡើងរបស់លោកហ៊ុន សែន បែបនេះ បានធ្វើឡើងខណៈដែលលោកនាយករដ្ឋមន្ត្រីចូលរួមជាអធិបតីនៅក្នុងទិវាជាតិទីក្រុងស្អាត «ជោគជ័យទេសចរណ៍»និងពិធីប្រកាសជ័យលាភីទីក្រុងស្អាតសម្រាប់ឆ្នាំ ២០១៥-២០១៨ នៅឯសាលប្រជុំកោះពេជ្រ។
ជាការពិតការបង្កើតឲ្យមានការប្រលងប្រណាំងទីក្រុងស្អាតរបស់កម្ពុជា មិនត្រឹមតែជាកត្តាធានាបាននូវចីរភាពនៃកំណើនទេសចរណ៍ប៉ុណ្ណោះទេ គឺថែមទាំងជាការត្រៀមលក្ខណៈប្រលងប្រណាំងទីក្រុងស្អាតលំដាប់ប្រទេសអាស៊ានផងដែរ ដែលនឹងរៀបចំនៅឆ្នាំ២០១៦ ខាងមុខ។
ទាក់ទងទៅនឹងការប្រលងប្រណាំងទីក្រុងស្អាតនេះដែរ លោកថោង ខុន រដ្ឋមន្ត្រីក្រសួងទេសចរណ៍ បានលើកឡើងពីការវាយតម្លៃ លក្ខខណ្ឌនានា និងការផ្តល់ពិន្ទុទៅលើទីក្រុងនិងខណ្ឌមួយចំនួនដែលបានចូលរួមប្រកួតប្រជែងកន្លងមក ដោយទីក្រុងជ័យលាភីមានបីកម្រិតគឺផ្ការំដួល១ទង ពិន្ទុចន្លោះពី៣១ដល់៤៥ រួមមាន១១ក្រុងនិង៦ខណ្ឌ។ ផ្ការំដួល២ទង ពិន្ទុចន្លោះពី៤៦ដល់៥៧ មាន១០ក្រុងនិង២ខណ្ឌ និងផ្ការំដួល៣ទង ពិន្ទុចន្លោះពី៥៨ដល់៧៧ពិន្ទុ រួមមាន ក្រុងបាត់ដំបង ក្រុងសៀមរាប ក្រុងកែប ក្រុងកំពត និងខណ្ឌដូនពេញ។
សូមបញ្ជាក់ថា នេះជាលើកទី៣ហើយដែលប្រទេសកម្ពុជាប្រារព្ធទិវាជាតិទីក្រុងស្អាតនិងមានការប្រលងប្រជែងទីក្រុងស្អាត រមនីយដ្ឋានស្អាត សេវាល្អ ក្នុងគោលបំណងដើម្បីទាក់ទាញទេសចរ។ តាមរយៈនេះ រដ្ឋាភិបាលកម្ពុជាតែងលើកឡើងពីជោគជ័យនៃទីក្រុងស្អាត និងជោគជ័យទេសចរណ៍ ខណៈដែលកម្ពុជានៅតែមានការរិះគន់ពីមជ្ឈដ្ឋានក្រៅរដ្ឋាភិបាលពីផលអវិជ្ជមាននៃការអភិវឌ្ឍន៍ហេដ្ឋារចនាសម្ព័ន្ធ និងដីធ្លីមួយចំនួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ