លោក អភិបាលខេត្តព្រះសីហនុ សម្រេចផ្អាកបណ្តោះអាសន្ន កម្មវិធី KaZantip ដែលគ្រោងធ្វើនៅកោះពស់
លោកអភិបាលខេត្តព្រះសីហនុ នៅ ក្នុងកិច្ចប្រជុំដែលទើបបញ្ចប់ទៅម៉ោងប្រហែង៦ល្ងាចនេះ បានសម្រេចផ្អាកកម្មវីធី KaZantip ដែលគ្រោងធ្វើនៅកោះពស់ប្រទេសកម្ពុជា រយៈពេលដប់ថ្ងៃនាពាក់កណ្តាលខែកុម្ភៈខាងមុខនេះ។ តន្ត្រីKaZantip ដែលអ្នកចូលរួម អាចជ្រុលជ្រួសបំពានច្បាប់ដោយប្រព្រឹត្តិអំពើអាក្រាតកាយ និងការប្រើប្រាស់គ្រឿងញៀន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៥
ក្នុងកិច្ចប្រជុំដែលបានចាប់ផ្តើមឡើងតាំងពីរសៀលថ្ងៃទី ០២ កុម្ភៈនេះ លោក អភិបាលខេត្តព្រះសីហនុ ឈិត សុខុន បានសម្រេចផ្អាកកម្មវិធី KaZantip ជាបណ្តោះអាសន្នដោយសារតែមាន ការព្រួយបារម្ភអំពីអំពើខុសឆ្គងមួយចំនួនដែលអាចនឹងកើតមានឡើងនៅប្រទេសកម្ពុជា ។ ប៉ុន្តែលោកបានបញ្ជាក់ប្រាប់វិទ្យុបារាំងអន្តរជាតិនៅល្ងាចនេះថា នៅក្នុងសំណើររបស់ក្រុមហ៊ុន ក្រុមហ៊ុនគ្រាន់តែសុំធ្វើដំណើរកម្សាន្តធម្មតានោះទេ។
យ៉ាងណាក៏ដោយ ដោយសារតែមានក្តីបារម្ភអំពីបញ្ហាខុសទំនៀមទំលាប់កម្ពុជា ក្រោយកិច្ចប្រជុំ អាជ្ញាធរព្រមព្រៀងគ្នា ផ្អាកជាបណ្តោះអាសន្ននូវកម្មវិធីមួយនេះ ហើយនឹងបន្តស្នើសុំមតិយោបល់ពីក្រសួងទេសចរណ៍។ នេះបើតាមប្រសាសន៍ លោកអភិបាលខេត្តព្រះសីហនុ។
ចំនែកលោក ជា បូរ៉ា ដែលជារដ្ឋលេខាធិការក្រសួងទេសចណ៍ ដែលនិយាយនៅព្រឹកនេះថាមិនមានទទួលបានលិខិតស្នើសុំប្រគុំតន្ត្រីkaZantipអ្វីនោះ បានបញ្ជាក់ ថា ក្រសួងទេសចរណ៍ ប្រឆាំងដាច់ខាតចំពោះទេសចរណាដែលចូលមកកម្ពុជាប្រព្រឹត្តអំពើមិនសមរម្យ នៅប្រទេសកម្ពុជា។ តែ កម្ពុជាស្វាគមន៍ជានិច្ចចំពោះទេសចរណ៍វប្បធម៌ ធម្មជាតិ និងការកម្សាន្តនានា។
សូមបញ្ចាក់ថា គេហទំពរ័របស់ KaZantip បានបង្ហាញថា កម្មវិធីតន្ត្រីនេះនឹងធ្វើឡើងនៅកោះពស់ ខេត្តព្រះសីហនុប្រទេសកម្ពុជា ចាប់ពីថ្ងៃទី ១៨ កុម្ភៈ ដល់ថ្ងៃទី២៨ ខែកុម្ភៈឆ្នាំ ២០១៥ ខាងមុខនេះ។
កម្មវិធី KaZantip មានប្រភពមកពីឧបទ្វីបគ្រីមេនៃតំបន់អឺរ៉ុបខាងកើត ។វាត្រូវបានធ្វើឡើងជារៀង រាល់ឆ្នាំ ចាប់តាំងពីឆ្នាំ ១៩៩២មក ដើម្បីអបអរសាទរបិទបញ្ចប់រដូវក្តៅ។ នៅក្នុងពិធីនោះមានការរាំច្រៀង និង ពិធីជប់លៀង សប្បាយសប្បាយ នៅលើឆ្នេរសមុទ្រ ដែលជារឿយៗត្រូវបានសាធារណៈជនព្រួយបារម្ភអំពី អំពើអាសអាភាស អាក្រាតកាយ និង ការប្រពឹត្តបទល្មើសគ្រឿងញៀនជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ