ភ្ជុំបិណ្ឌឆ្នាំនេះ គ្រោះថ្នាក់ចរាចរណ៍កើនជាង៦០ ភាគរយ
រយៈពេល៥ថ្ងៃ ចាប់ពីថ្ងៃទី២០ ដល់ ២៤ ខែកញ្ញានៃពិធីបុណ្យភ្ជុំបិណ្ឌឆ្នាំនេះ គ្រោះថ្នាក់ចរាចរណ៍បានកើនឡើង ៥៣លើក ស្មើនឹង ៦៣ ភាគរយ បើប្រៀបធៀបទៅនឹងឆ្នាំ២០១៣ កន្លងមក។ នេះបើតាមទិន្នន័យរបស់អគ្គស្នងការនគរបាលជាតិដែលបានចេញផ្សាយនៅលើគេហទំព័ររបស់ខ្លួន។ សង្គមស៊ីវិលដែលធ្វើការពាក់ព័ន្ធនឹងសុវត្ថិភាពចរាចរណ៍ទាមទារឲ្យរដ្ឋាភិបាលរឹតបន្តឹងច្បាប់ចរាចរណ៍បន្ថែមទៀត ដើម្បីកាត់បន្ថយចំនួនគ្រោះថ្នាក់។
ចុះផ្សាយនៅថ្ងៃ៖
ស្តាប់ - ០២:០២
គិតជាតូរលេខ គ្រោះថ្នាក់ចរាចរណ៍ក្នុងពិធីបុណ្យភ្ជុំបិណ្ឌឆ្នាំនេះ មានចំនួន១៣៧ លើក គឺបានកើនឡើង ៥៣ លើក។ គ្រោះថ្នាក់ទាំងនេះ បណ្តាលឲ្យមនុស្សស្លាប់ចំនួន ៤៩ នាក់ គឺកើន២១ នាក់ ស្មើ ៧៥ ភាគរយ។ ចំណែកអ្នករងរបូសមានចំនួនសរុប ៣០៥ នាក់ គឺកើនឡើង ៧៨ នាក់ ឫស្មើ៣៥ ភាគរយ ក្នុងនោះអ្នករងរបួសធ្ងន់មានចំនួន ១៨៩នាក់ ។
បើតាមអគ្គស្នងការនគរបាលជាតិ មូលហេតុបង្កឲ្យមានគ្រោះថ្នាក់រួមមាន ល្មើសល្បឿន មិនគោរពសិទ្ធអាទិភាព មិនប្រកាន់ស្ដាំ បើកបរប្រជែងនិងបើកបរក្នុងស្ថានភាពស្រវឹង ។
ដោយឡែកខេត្តដែលមានគ្រោះថ្នាក់ច្រើនជាងគេ គឺ ខេត្តពោធិសាត់ ស្លាប់ ០៨នាក់ ខេត្តកណ្ដាល ស្លាប់ ០៧នាក់ ខេត្តព្រៃវែង ស្លាប់ ០៥នាក់ និងខេត្តកំពង់ធំ ស្លាប់ ០៥នាក់ ។ គ្រោះថ្នាក់ចរាចរណ៍ទាំងនោះ កើតឡើងលើផ្លូវជាតិមានចំនួន ៦៣ភាគរយ លើផ្លូវលំចំនួន ២២ភាគរយ និងលើផ្លូវរាជធានី-ខេត្ត ចំនួន០៧ភាគរយ។
បើតាមទិន្នន័យដដែល គ្រោះថ្នាក់ចរាចរណ៍ក្នុងរយៈពេល ៥ថ្ងៃនៃពិធីបុណ្យភ្ជុំបិណ្ឌនេះបានបណ្ដាលឲ្យខូចខាត ម៉ូតូចំនួន ១៧១គ្រឿង រថយន្តធុនស្រាល ៤១គ្រឿង រថយន្តធុនធ្ងន់ ០៧គ្រឿង និងយានផ្សេងៗ ចំនួន១៤គ្រឿង ។ ចំណែកអ្នកបង្កគ្រោះថ្នាក់រួមមានអ្នកបើកបរម៉ូតូ មានចំនួន៦៤ភាគរយ អ្នកបើកបររថយន្តតូចមាន ២៧ភាគរយ អ្នកបើកបររថយន្តធំ ០៣ភាគរយ និង អ្នកបើកបរគោយន្តមានចំនួន ០២ភាគរយ។
លោក គង់ សុវណ្ណ ប្រធានអង្គការដៃគូសុវត្ថិភាពចរាចរណ៍សាកល បានវាយតម្លៃថា ទិដ្ឋភាពគ្រោះថ្នាក់ចរាចរណ៍ក្នុងអំឡុងបុណ្យភ្ជុំបិណ្ឌឆ្នាំនេះ គឺជារឿងគួរឲ្យព្រួយបារម្ភចំពោះរដ្ឋាភិបាល និងស្ថាប័នពាក់ព័ន្ធ។ ប្រឈមនឹងបញ្ហានេះ លោកទាមទារឲ្យមានចូលរួមគោរពច្បាប់ចរាចរណ៍ទាំងអស់គ្នា ហើយរដ្ឋាភិបាលត្រូវបង្កើនការអប់រំ ផ្សព្វផ្សាយ និងរឹតបន្តឹងការគោរពច្បាប់បន្ថែមទៀត។ ជាមួយគ្នានេះ ប្រធានអង្គការធ្វើការខាងសុវត្ថិភាពចរាចរណ៍រូបនេះ ក៏បានជំរុញឲ្យរដ្ឋសភាជាតិ អនុម័តច្បាប់ចរាចរណ៍ថ្មីឲ្យបានឆាប់រហ័ស ដើម្បីរួមចំណែកក្នុងការកាត់បន្ថយគ្រោះថ្នាក់ចរាចរណ៍នៅលើដងផ្លូវ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ