តំណាងសហជីពរាប់សិបនាក់នឹងរង់ចាំស្តាប់លទ្ធផលកិច្ចប្រជុំដំឡើងប្រាក់ឈ្នួលនៅរសៀលនេះ
នៅរសៀលថ្ងៃទី ២៦ កញ្ញានេះ គឺជាពេលកំណត់នៃការប្រជុំក្រុមប្រឹក្សាការងារ (LAC) ត្រីភាគី រវាងតំណាងសហជីពកម្មករកាត់ដេរ និយោជក និងរដ្ឋាភិបាល ដើម្បីកំណត់ប្រាក់ឈ្នួលអប្បបរមាសម្រាប់កម្មករបម្រើការងារក្នុងវិស័យវាយនភ័ណ្ឌនៅកម្ពុជា។ តំណាងសហជីពពី ៥០ នាក់ទៅ ១០០ នាក់នឹងឈររង់ចាំស្តាប់លទ្ធផលនៃកិច្ចប្រជុំនេះ នៅខាងក្រៅក្រសួងការងារនឹងបណ្តុះបណ្តាលវិជ្ជាជីវៈ។
ចុះផ្សាយនៅថ្ងៃ៖
ស្តាប់ - ០១:៥៨
តំណាងសហជីព និយោជក និងរដ្ឋាភិបាល នឹងជួបប្រជុំពិភាក្សាត្រីភាគីជាថ្មីម្តងទៀត នៅម៉ោង៣ រសៀលនេះ ដើម្បីសម្រេចពីការដំឡើងប្រាក់ឈ្នួលជូនដល់កម្មករកាត់ដេរកម្ពុជា។ កិច្ចប្រជុំនេះ នឹងធ្វើឡើងនៅក្រសួងការងារ និងបណ្តុះបណ្តាលវិជ្ជាជីវៈ ក្រោមការដឹកនាំដោយលោករដ្ឋមន្ត្រីអ៊ិត សំហេង។ តំណាងសហជីពពី ៥០ នាក់ទៅ ១០០ នាក់នឹងទៅប្រមូលផ្តុំគ្នានៅខាងក្រៅក្រសួងការងារដើម្បីរង់ចាំស្តាប់លទ្ធផលនៃកិច្ចប្រជុំនេះ។ នេះបើយោងតាមលោកអាត់ ធន់ ប្រធានសហជីពប្រជាធិបតេយ្យកម្មករកាត់ដេរកម្ពុជា ហៅកាត់ថា ស៊ីខៅឌូ ។
លោកបានប្រាប់វិទ្យុបារាំងនៅព្រឹកនេះថា តំណាងខាងសហជីពដែលចូលរួមប្រជុំនៅរសៀលនេះគឺមានចំនួន ៧ នាក់ ដែលសុទ្ធតែជាសមាជិកគណៈកម្មការប្រឹក្សាការងារ ហើយក្នុងនោះរួមមានលោក អាត់ ធន់ លោកជួន មុំថុល និងលោកសោមអូនជាដើម។ លោកបញ្ជាក់ថា ក្នុងកិច្ចប្រជុំនេះ មានតំណាងសហជីពចូលរួមចំនួន ៧នាក់ និយោជកចំនួន ៧នាក់ និងតំណាងខាងរដ្ឋាភិបាល ចំនួន ១៤ នាក់។
លោកអាត់ ធន់ រំពឹងថា កិច្ចប្រជុំនៅសៀលនេះ អាចនឹងឲ្យនិយោជកជួយដំឡើងប្រាក់ឈ្នួលបន្ថែមដល់កម្មករ ហើយខាងសហជីពវិញក៏អាចនឹងចុះបន្ថិច ដែលក្រោមការទាមទារ ១៧៧ដុល្លាផងដែរ។ លោកយល់ឃើញបែបនេះ បន្ទាប់ពីលោកបានមើលឃើញពីលទ្ធផលនៃការធ្វើយុទ្ធនាការទាមទារដំឡើងប្រាក់ឈ្នួលជាច្រើន នាពេលកន្លងមក បានធ្វើឲ្យអ្នកបញ្ជាទិញ ជួយអន្តរាគមន៍នៅក្នុងយុទ្ធនាការនេះដែរ។
ក្រុមហ៊ុនបញ្ជាទិញធំៗ នៅក្នុងតំបន់អឺរ៉ុបអស់ទាំងនោះ មានដូចជា H&M, C&A និងNewlook ជាដើម ដែលបានផ្ញើរលិខិតជូនដល់រដ្ឋាភិបាលកម្ពុជាឲ្យដោះស្រាយបញ្ហាប្រាក់ឈ្នួលកម្មករកម្ពុជា ឲ្យបានសមរម ដើម្បីអាចឲ្យពួកគេផ្តត់ផ្គត់ជីវភាពបាន។
សូមបញ្ជាក់ថា កន្លងមកក្រុមសហជីពបានធ្វើយុទ្ធនាការជាច្រើនទាមទារឲ្យមានការដំឡើងប្រាក់ឈ្នួលអប្បបរមាចំនួន ១៧៧ដុល្លា ក្នុងមួយខែ ប៉ុន្តែការទាមទារត្រូវបានខាងតំណាងចៅកែរោងចក្រកាត់ដេរ សម្រេចផ្តល់ឲ្យត្រឹមតែ ១១០ដុល្លាប៉ុណ្ណោះ។ កត្តានេះ ហើយដែលធ្វើឲ្យសហជីពនៅតែបន្តទាមទារឲ្យមានការដំឡើងជាបន្តទៀត មុននឹងមានការសម្រេចដំឡើងប្រាក់ឈ្នួលជូនដល់កម្មករកម្ពុជា ជាផ្លូវការនៅដើមខែតុលាក្រោយនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ