ព្យុះទីហ្វុង Chaba សម្លាប់មនុស្ស៦នាក់ នៅប្រទេសកូរ៉េខាងត្បូង
យ៉ាចហោចណាស់មនុស្ស៦បានស្លាប់និង ៤នាក់បាត់ខ្លួន ដោយសារខ្យល់ព្យុះទីហ្វុង ចាបា បានវាយប្រហារតំបន់ឆ្នេរសមុទ្រ នៃប្រទេសកូរ៉េខាងត្បូង។ ចំណែក មហោស្រពភាពយន្តដ៏ធំប្រចាំតំបន់អាស៊ី ដែលគ្រោងធ្វើឡើងនៅទីក្រុងប៊ូសាន នៅល្ងាចថ្ងៃព្រហស្បតិ៍នេះក៍ត្រូវលុបចោល ។
ចុះផ្សាយនៅថ្ងៃ៖
ស្តាប់ - ០១:២១
នៅទីក្រុងឧស្សាហកម្ម Ulsan គេរកឃើញសាកសពបុរសម្នាក់បានលង់ទឹកស្លាប់នៅក្បែរផ្ទះរបស់គាត់និងស្ត្រីម្នាក់ត្រូវបានគេរកឃើញស្លាប់ដែរ នៅកន្លែងចតរថយន្តក្រោមដីដែលលិចទឹក។ ចំណែកផ្ទះរបស់ប្រជាជនប្រមាណ ២៣ម៉ឺនខ្នង ទូទាំងតំបន់ឆ្នេរសមុទ្រត្រូវកាត់ផ្តាច់អគ្គិសនីប្រើប្រាស់ ។
នៅព្រឹកថ្ងៃព្រហស្បតិ៍នេះឥទ្ធិពលនៃព្យុះបានថមថយបន្តិច ប្រជាជននៅក្នុងប្រទេសកូរ៉េត្បូង បាននាំគ្នាសំអាតផ្ទះសំម្បែងបណ្តើរៗ និង រៀបចំទុកដាក់របស់របរដែលរងការខូតខាតដោយសារតែខ្យល់ព្យុះ ដែលបានវាយប្រហារឆ្នេរសមុទ្រភាគខាងត្បូងនៃឧបទ្វីបកូរ៉េ។
សូមជំរាបជូនថា ព្យុះទីហ្វុងចាបា បានធ្វើដំណើរមកដល់ទីក្រុងកំពង់ផែដ៏ធំ ប៊ូសាន និង ទីក្រុងឧស្សាហកម្មអ៊ុលសានរបស់កូរ៉េខាងត្បូង កាលពីថ្ងៃពុធ ។ វាបានបណ្តាលឱ្យមានភ្លៀងធ្លាក់ជោគជាំដោយបង្កជា ជំនន់ទឹកភ្លៀង ។ វីដេអូពីកាមេរ៉ាសុវត្តិភាពសាធារណៈ បានបង្ហាញឱ្យឃើញពី រថយន្ត ទូទឹកកក និងកំទេចកំទីផ្សេងៗទៀត អណ្តែតពាសពេញផ្លូវ ដែលកំពុងជន់លិច ។ មិនត្រឹមតែប៉ុណ្ណោះព្យុះ បានរំខានដល់ព្រឹត្តិការណ៍បង្ហាញខ្សែភាពយន្ដធំជាងគេនៅតំបន់អាស៊ី គឺ មហោស្រពភាពយន្តអន្តរជាតិប៊ូសាន ដែល គ្រោងនឹងបើកនៅល្ងាចថ្ងៃព្រហស្បតិ៍នេះ ។ ព្រឹត្តិការណ៍មហោស្រពនេះ គ្រោងនឹងរៀបចំនៅលើឆ្នេរទេសចរណ៍ Haeundae ជាឆ្នេរដ៏មានប្រជាប្រិយភាព របស់ទីក្រុងប៊ូសាន។
គួរជំរាបជូនថា ព្យុះទីហ្វុង ចាបា នេះបានបង្កឱ្យមានការព្រមានធ្ងន់ធ្ងរថាអាចនឹងធ្វើដំណើរទៅកាន់ប្រទេសជប៉ុនផងដែរ ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ