យន្តហោះទំលាក់គ្រាប់បែកអាមេរិកហោះនៅកូរ៉េខាងត្បូង ព្រមានកូរ៉េខាងជើង
ដើម្បីឆ្លើយតបនឹងការសាកល្បងនុយក្លេអ៊ែ កាលពីថ្ងៃសុក្រ ររបស់កូរ៉េខាងជើង ម៉ោង១០ព្រឹក ថ្ងៃអង្គារនេះ យន្តហោះទំលាក់គ្រាប់បែកអាមេរិក២គ្រឿង ប្រភេទ B1-B បានហោះក្នុងដែនអាកាសកូរ៉េខាងត្បូង ដោយមានយន្តហោះប្រដេញរបស់កូរ៉េខាងត្បូង និងយន្តហោះប្រដេញអាមេរិកខ្លួនឯង ហោះអមផងដែរ។
ចុះផ្សាយនៅថ្ងៃ៖
ស្តាប់ - ០១:១៦
ដើម្បីឆ្លើយតបនឹងការសាកល្បងនុយក្លេអ៊ែររបស់ក្រុងព្យុងយ៉ាង នៅថ្ងៃសុក្រមុន ព្រឹកថ្ងៃអង្គារនេះ អាមេរិកបានបញ្ជូនយន្តហោះទំលាក់គ្រាប់បែក២គ្រឿង ចេញពីមូលដ្ឋានអាកាស អាន់ដឺសេន នៅកោះហ្គាំ សមុទ្រប៉ាស៊ីហ្វិក សំដៅមកដែនអាកាសកូរ៉េខាងត្បូង។ នៅកូរ៉េខាងត្បូង យន្តហោះទំលាក់គ្រាប់បែកទាំង២ ហោះពីលើមូលដ្ឋានអាកាសអាមេរិក អូសាន់ ចំងាយប្រមាណ៦៤គីឡូម៉ែត្រពីភាគខាងត្បូង ក្រុងសេអ៊ូល។
កាលពីថ្ងៃសុក្រ ក្រុងព្យុងយ៉ាងបានសាកល្បងនុយក្លេអ៊ែរ លើកទី៥ ដោយជោគជ័យ។ ជាការសាកល្បង ធ្វើអោយគេភ្ញាក់ផ្អើលគ្រប់គ្នា ព្រោះអាវុធនុយក្លេអ៊ែរនេះ អាចមានអានុភាពដល់ទៅ១០គីឡូតោន មិនចាញ់គ្រាប់នុយក្លេអ៊ែរ ១៥គីឡូតោន ដែលអាមេរិកបានទំលាក់នៅហ៊ីរ៉ូស្ហ៊ីម៉ា សម័យសង្គ្រាមលោកឡើយ។
តាមរយៈការហោះហើររបស់យន្តហោះទំលាក់គ្រាប់បែកអាមេរិកទាំង២គ្រឿង នៅថ្ងៃអង្គារនេះ មេបញ្ជាការយោធាអាមេរិកប្រចាំនៅកូរ៉េខាងត្បូង បានគូសបញ្ជាក់ឡើងវិញ នូវជំហរអាមេរិកក្នុងការការពារប្រទេសសម្ព័ន្ធមិត្តក្នុងតំបន់។ អាមេរិកមានកងទ័ព២៨៥០០នាក់ នៅកូរ៉េខាងត្បូង។ មេបញ្ជាការយោធាអាមេរិកក៏បានលើកឡើងផងដែរ នូវខែលមីស៊ីលប្រឆាំងមីស៊ីលអាមេរិក ប្រភេទTHAAD ដែលត្រូវដំឡើងនៅកូរ៉េខាងត្បូង ចប់សព្វគ្រប់នៅចុងឆ្នាំ២០១៧។
ចិនជំទាស់ដាច់ខាត នឹងការដាក់ខែលមីស៊ីលប្រឆាំងមីស៊ីលរបស់អាមេរិក ជិតទឹកដីចិន ព្រោះចិនយល់ថា គេអាចប្រើវាដើម្បីស៊ើប យក ព័ត៌មានទាក់ទងប្រព័ន្ធយោធា ចិនបាន។ ក្រុមប្រឆាំងកូរ៉េខាងត្បូងក៏ជំទាស់ នឹងការដំឡើងខែលមីស៊ីលអាមេរិកដូចគ្នា ព្រោះ វាអាចបង្កភាពតានតឹងក្នុងតំបន់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ