នៅវេទិកាវិនិយោគអន្តរជាតិ លោកពូទីនផ្តោតលើពាណិជ្ជកម្មជាមួយអាស៊ី ជាពិសេសចិន
ចុះផ្សាយនៅថ្ងៃ៖
ស្តាប់ - ០៤:៣២
វេទិកាវិនិយោគលើកនេះ ដែលជាលើកទី ៦ បានធ្វើការងារខ្លួន នៅម៉ូស្គូ អស់ពីរថ្ងៃជាប់ គឺថ្ងៃទី១ និងទី២ តុលាកន្លងទៅ។ នេះជាលើកទី១ ដែលវាប្រព្រឹត្តទៅ ក្នុងស្ថានភាព ដែលប្រទេសរុស្ស៊ី រងទណ្ឌកម្មគ្មានឈប់ ពីខាងបស្ចិមលោក ក្រោយពីរុស្ស៊ី កាលពីកន្លះឆ្នាំមុន បានភ្ជាប់យកទឹកដីគ្រីមេ ដោយផ្តាច់វាចេញពីរដ្ឋអ៊ុយក្រែន។ រសៀលថ្ងៃទី ២ ដែលជាថ្ងៃបិទ បញ្ចប់វេទិកានេះ លោកប្រធានាធិបតីរុស្ស៊ី ពូទីនបានឡើងថ្លែងសុន្ទរកថា ប៉ះលើទណ្ឌកម្មនេះ ប៉ះលើផ្នែកសេដ្ឋកិច្ច ពាណិជ្ជកម្ម ហិរញ្ញវត្ថុ និងប្រាកដណាស់ទាំងស្ថានការណ៍ នៅអ៊ុយក្រែន។
ទោះបីរុស្ស៊ី ជាប់ក្នុងទណ្ឌកម្មនោះក្តី ក៏ប្រតិភូដែលមកចូលរួម មានមិនតិច ជាងលើក មុនៗឡើយ ដ្បិតមជ្ឈដ្ឋានធុរកិច្ច ខុសពីពួកអ្នកនយោបាយ គេនៅតែចង់រកស៊ី ក្នុងប្រទេសរុស្ស៊ី ដដែល។ គេទាំងនោះ ជាវិនិយោគិន និងធុរជន មានគ្នាដល់ទៅ១.៥០០នាក់ មកពីជាង ៥០ ប្រទេស ដែលភាគច្រើន មកពីទ្វីបអាស៊ី បែបយ៉ាង ពួកមហាសេដ្ឋីឥណ្ឌា ពួកថៅកែក្រុមហ៊ុន ខាងបច្ចេកវិជ្ជាព័ត៌មាន មកពីប្រទេសចិនដីគោក ព្រមទាំងពួកវិនិយោគិន មកពីបណ្តាប្រទេស អារ៉ាប់ តំបន់ដើមបូព៌ា។
មិនតែប៉ុណ្ណោះ ក៏មានមិនស្ទើរឡើយ ពួកសហគ្រិន និង ពួកតំណាងនៃមូលនិធិវិនិយោគ មកពីបណ្តាប្រទេសអឺរ៉ុប និង ស.រ.អា.ផងដែរ។
វិនិយោគិនជាច្រើនដែលមកកាន់ក្រុងម៉ូស្គូ គេចង់យល់ដឹង តើការបោះទុនមកក្នុងប្រទេសរុស្ស៊ី អាចហុចជាគុណប្រយោជន៍ យ៉ាងណាដែរ សម្រាប់គេ និងតើសេដ្ឋកិច្ចរុស្ស៊ី ក្នុងថ្ងៃមុខនឹងវិវឌ្ឍ តាមផ្លូវណា។ អ្នកខ្លះបានស្ទាបស្ទង់ត្រួសៗជាមុន ទៅហើយ អំពីផែនការធ្វើឯកជនឧបនីយកម្ម វិស័យប្លែកៗ នៃសេដ្ឋកិច្ចរុស្ស៊ី ជាអាទិ៍ វិស័យថាមពល។
អំពីទណ្ឌកម្មដាក់ដោយបស្ចិមលោកទល់នឹងរុស្ស៊ី លោកពូទីន ចាត់ទុកសកម្មភាពរដ្ឋាភិបាល ប្រទេសខាងលិចទាំងនោះ ដែលរឹតត្បិត មជ្ឈដ្ឋានធុរកិច្ចខ្លួន មិនឲ្យរកស៊ី ក្នុងប្រទេសដែលមានទស្សនវិស័យដ៏ល្អ បែបយ៉ាងប្រទេសរុស្ស៊ីថា ជា ”រឿងភ្លើសុទ្ធ”។ តាមលោកពូទីន ម៉ូស្គូមិនសូវខ្វល់ទេ នឹងទណ្ឌកម្មនេះ។ មិនតែប៉ុណ្ណោះ គាត់យល់ថា ទណ្ឌកម្មនោះឯង គឺវា“បំពានលើគោលការណ៍ជាគ្រឹះរបស់អង្គការពាណិជ្ជកម្មពិភពលោក OMC, វានាំឲ្យរង្គោះរង្គើដល់ទំនុកចិត្ត លើស្ថាប័នហិរញ្ញវត្ថុអន្តរជាតិ និងទំនុកចិត្តលើរូបិយវត្ថុផ្ទាល់។ លោកពូទីន ក៏ថ្លែងថា សម្ពាធ ពីក្រៅ គឺបង្កើតជាសន្ទុះចិត្ត សម្រាប់រុស្ស៊ី សម្រេចឲ្យបាននូវ លទ្ធផលតាមមុខព្រួញណា ជាអាទិភាពនៃការអភិវឌ្ឍន៍សេដ្ឋកិច្ចខ្លួន។
អំពីសហប្រតិបត្តិការ ក្នុងក្របខ័ណ្ឌ OMC លោកពូទីន លើកឡើងថា រុស្ស៊ីខុសពីពួកប្រទេស ដែលថា ជា”ស្ថាបនិក”របស់វា គឺគាំទ្រដល់ គោលការណ៍របស់អង្គការនេះ ហើយកំពុងប្រែ សេដ្ឋកិច្ចខ្លួន ជាសេដ្ឋកិច្ចទីផ្សារ បើកចំហ។ នេះជាបន្ទាត់យុទ្ធសាស្ត្រឥតប្រែប្រួលឡើយ។
អំពីសេដ្ឋកិច្ចរុស្ស៊ី លោកពូទីន បង្ហើបឲ្យដឹងថា ក្នុង ៨ខែឆ្នាំនេះពី ខែមករា ដល់សីហា ខ្ទង់ចំណូល នៃថវិកាសហព័ន្ធ គឺលើសពីខ្ទង់ចំណាយ ដល់ទៅ ៩០០.០០០លានរូប្ល គិតតាមអត្រាបច្ចុប្បន្ន គឺប្រមាណ២៣.០០០លានដុល្លារ។ ហើយក្នុងគម្រោងថវិកា សម្រាប់ឆ្នាំ ២០១៥ គឺមានប្រមើល នូវឧនភាពថវិកា ដ៏ស្រគត់ស្រគំទេតើ ត្រឹម ០,៣% នៃផលិតផលក្នុងស្រុកសរុប ឬ PIB។ ប៉ុន្តែ អតិផរណា ទៅទល់ដំណាច់ឆ្នាំនេះ អាចស្ទុះ ដល់ ៨%។ ទោះបីអត្រាប្រាក់រូប្ល នាពេលចុង ក្រោយ ចុះខ្សោយក្តី ក៏លោកពូទីនអះអាងថា រុស្ស៊ីមានកត្តាធំៗ ជាគ្រឹះ បែបយ៉ាង ស្តុករូបិយវត្ថុក្រាស់ក្រែល , ថវិកាសឹងគ្មានឧនភាព ,សមត្ថភាពបង់ប្រាក់យ៉ាងមាំ ដែលធានាឲ្យសេដ្ឋកិច្ចខ្លួនមានស្ថិរភាពដដែល។
អំពីសហប្រតិបត្តិការសេដ្ឋកិច្ចអន្តរជាតិ លោកពូទីន បានឲ្យដឹងថា រុស្ស៊ីគ្មានចេតនាមូរ ចំណងសេដ្ឋកិច្ច ជាមួយអឺរ៉ុបឡើយ ប៉ុន្តែ យល់ថា មានទស្សនវិស័យល្អជាង គឺពង្រីក សហប្រតិបត្តិការ ជាមួយទ្វីបអាស៊ី រួចជាបឋម គឺជាមួយមហាប្រទេសចិន។ មិនតែប៉ុណ្ណោះ ក្នុងការទូទាត់ពាណិជ្ជកម្ម រវាងរុស្ស៊ី និង ចិន គឺមានចាប់ប្រើរូបិយវត្ថុជាតិរៀងៗ ខ្លួនទៅហើយ។ រុស្ស៊ីក៏បង្កើនសហប្រតិបត្តិការពាណិជ្ជកម្មសេដ្ឋកិច្ច ទាំងជាមួយប្រទេសឯទៀតនៃ ក្រុម BRICS គឺ ឥណ្ឌា ប្រេស៊ីល អាហ្វ្រិកខាងត្បូង។
អំពីស្ថានការណ៍ នៅអ៊ុយក្រែន លោកប្រធានាធិបតីរុស្ស៊ី សង្ឃឹមថា លទ្ធផលនៃការបោះឆ្នោត សភាថ្ងៃមុខ នឹងនាំស្ថិរភាពដែលគេរង់ចាំយូរមកហើយ។ ម៉ូស្គូពីចំណែកខ្លួន នឹងធ្វើសព្វបែបយ៉ាង ដើម្បីរកច្រកចេញពីវិបត្តិនៅទីនោះ តាមផ្លូវនយោបាយ។ តាមលោកពូទីន ផលប្រយោជន៍ជាតិរបស់រុស្ស៊ី តម្រូវឲ្យ ប្រទេសអ៊ុយក្រែនជិតខាង ចេះដកខ្លួនចេញផុត ពី វិបត្តិនយោបាយ និង វិបត្តិសេដ្ឋកិច្ច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ