អាមេរិក សន្យាផ្តល់អាវុធទៅ អ៊ុយក្រែន ចំទិវាឯករាជ្យអតីតសាធារណរដ្ឋសូវៀត
រដ្ឋមន្ត្រីការពារជាតិអាមេរិកាំង Jim Mattis បានអះអាងជាថ្មីថា អាមេរិកនឹងផ្តល់អាវុធសម្រាប់ជួយកងទ័ពអ៊ុយក្រែន។ ដ្បិតសង្គ្រាមជាង៣ឆ្នាំមកហើយ ដែលអ៊ុយក្រែនខិតខំបង្ក្រាបពួកផ្តាច់ទឹកដីរុស្ស៊ីនិយម នៅតំបន់ខាងកើតអ៊ុយក្រែន។ អាមេរិកមិនកាត់ផ្តាច់ឡើយ លទ្ធភាពផ្តល់ជាអាវុធដែលអាចសម្លាប់។ នេះការថ្លែងរបស់លោក Jim Mattis នៅថ្ងៃ២៤សីហា ក្នុងក្រុងគៀវ ចំទិវាខួប២៦ឆ្នាំនៃឯករាជ្យរដ្ឋអ៊ុយក្រែន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១២
រដ្ឋមន្ត្រីការពារជាតិអាមេរិកាំង បានទៅដល់ក្រុងគៀវដើម្បីបញ្ជាក់ជាថ្មីពីការគាំទ្ររបស់ក្រុងវ៉ាស៊ីនតោន ដល់អ៊ុយក្រែន សម្រាប់ប្រឈមនឹងរុស្ស៊ី ដោយជ្រើសយកចំថ្ងៃប្រកាសឯករាជ្យរបស់អ៊ុយក្រែងតែម្តង។
ក្នុងសន្និសីទសារព័ត៌មាន រួមជាមួយប្រធានាធិបតីអ៊ុយក្រែន រដ្ឋមន្ត្រីការពារជាតិអាមេរិកាំង បានប្រើសម្តីមុតមាំទល់នឹងរុស្ស៊ី ដែលជាប់ចោទក្នុង”ការកាត់ចៀរ ឡើងវិញព្រំដែនអន្តរជាតិតាមផ្លូវប្រើកម្លាំង”។ លោក Jim Mattis ព្រមានថា ទណ្ឌកម្មប្រឆាំងម៉ូស្គូ នឹងនៅរក្សាទុកដដែល រហូតដល់ពេល ដែលរុស្ស៊ីសុខចិត្តបំពេញតាមកិច្ចព្រមព្រៀងក្រុងមិនស្ក៍ សម្រាប់តំបន់ខាងកើតអ៊ុយក្រែន។
រហូតមកទល់ឥឡូវ អាមេរិកតែងជួយកងទ័ពអ៊ុយក្រែន ជាយុទ្ធបរិក្ខារ ដែលមិនអាចបង្ក មរណភាព ឡើយ។ ក្រុងគៀវ ម្តងហើយម្តងទៀត បានសុំពួកប្រទេសខាងលិចសម្ព័ន្ធមិត្តខ្លួន ឲ្យផ្តល់ត្រង់ភ្លឹងទៅខ្លួន គឺសព្វាវុធ។ ស្តីអំពីអាវុធការពារដែលអាចសម្លាប់ លោក Jim Mattis បានប្រកាសថា៖ ក្រុងវ៉ាស៊ីនតោន កំពុងពិនិត្យ មើលបញ្ហានេះយ៉ាងសកម្ម។ តាមសម្តីគាត់ អ៊ុយក្រែន មិនមែនជាប្រទេសឈ្លានពានទេ អ៊ុយក្រែនច្បាំងតែនៅលើដែនដីខ្លួនប៉ុណ្ណោះ។
ចំណែកប្រធានាធិបតីអ៊ុយក្រែន ប៉េត្រូ ប៉ូរ៉ូឆេនកូ បានទម្លាយឲ្យដឹងថា កិច្ចសន្ទនារបស់គាត់ ជាមួយរដ្ឋមន្ត្រីការពារជាតិអាមេរិកាំង បានប្រព្រឹត្តទៅរស់រវើកក្រៃ ហើយមិនគ្រាន់តែប៉ះលើការផ្តល់ ឲ្យអ៊ុយក្រែននូវ សព្វាវុធដែលអាចសម្លាប់ប៉ុណ្ណោះទេ។ តែក៏ប៉ះលើបរិក្ខាយោធា ជាពិសេសផ្នែក អេឡិកត្រូនិក ទាំងនៅរង់ចាំ ការអនុម័តដាច់ស្រេចជាស្ថាពរ សេចក្តីសម្រេចជុំវិញរឿងនេះ។
អ្វីជាការកត់សម្គាល់ នៅមិនឆ្ងាយប៉ុន្មានពីទីលាន ដែលប្រព្រឹត្តទៅ ក្បួនព្យុហយាត្រាកងទ័ព ឧទ្ទិសដល់ទិវាឯករាជ្យនោះ នៅចំកណ្តាលក្រុងគៀវតែម្តង ស្រាប់តែមានលាន់សូរផ្ទុះ បណ្តាលឲ្យរបួសមនុស្សអស់ពីរនាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ