ប្រេសិតអ.ស.បថាវៀតណាមនៅតែរំលោភសិទ្ធិសេរីភាពខាងជំនឿសាសនា
ប្រេសិតពិសេសរបស់អ.ស.ប ដែលទើបនឹងបញ្ចប់ដំណើរទស្សនកិច្ច នៅក្នុងប្រទេសវៀតណាម នៅថ្ងៃព្រហស្បតិ៍ ៣១កក្កដានេះ បានធ្វើសេចក្តីសន្និដ្ឋានថា អាជ្ញាធរវៀតណាមនៅតែបន្តរំលោភសិទ្ធិសេរីភាពខាងជំនឿសាសនារបស់ប្រជាជន។ លោកក៏បានរិះគន់ផងដែរចំពោះអាជ្ញាធរវៀតណាម ដែលបានព្យាយាមរំខានដំណើរទស្សនកិច្ចរបស់លោក។
ចុះផ្សាយនៅថ្ងៃ៖
ស្តាប់ - ០១:៥៩
លោក Heiner Bielefeldt អ្នករាយការណ៍ពិសេសរបស់អ.ស.ប ទទួលបន្ទុកផ្នែកសិទ្ធិសេរីភាពខាងជំនឿសាសនា បានទៅបំពេញទស្សនកិច្ច នៅក្នុងប្រទេសវៀតណាម ពីថ្ងៃទី២១ ដល់ថ្ងៃទី៣១ខែកក្កដា ទៅតាមការអញ្ជើញរបស់រដ្ឋាភិបាលវៀតណាម។
ក៏ប៉ុន្តែ នៅក្នុងសេចក្តីប្រកាសព័ត៌មាន ចេញផ្សាយនៅថ្ងៃព្រហស្បតិ៍នេះ លោក Bielefeldt បានរិះគន់អាជ្ញាធរវៀតណាមថាមិនបានគោរពតាមលក្ខខណ្ឌនៃដំណើរទស្សនកិច្ចរបស់លោកនោះទេ។ ប្រេសិតពិសេសរបស់អ.ស.បបានលើកឡើងថា ដំណើរទស្សនកិច្ចរយៈពេល ១០ថ្ងៃនេះ តែងតែត្រូវរំខានដោយប៉ូលិស និងកងកម្លាំងសន្តិសុខវៀតណាម ដែលបានតាមឃ្លាំមើលដំណើររបស់លោកយ៉ាងជាប់ ព្រមទាំងបានរារាំងមិនឲ្យលោកអាចជួបជជែកជាមួយនឹងប្រជាជនបានតាមចិត្តចង់នោះទេ។
អង្គការ Human Rights Watch ប្រចាំតំបន់អាស៊ី បានរិះគន់ផងថា ការណ៍ដែលអាជ្ញាធរវៀតណាមតាមរារាំងរំខានដំណើរទស្សនកិច្ចរបស់ប្រេសិតពិសេសអ.ស.ប គឺដោយសារតែវៀតណាមចង់បិទបាំងរឿងអាក្រក់របស់ខ្លួន។
ក៏ប៉ុន្តែ អ្នកនាំពាក្យក្រសួងការបរទេសវៀតណាមវិញ បានប្រាប់អ្នកសារព័ត៌មាន នៅក្នុងទីក្រុងហាណូយថា រដ្ឋាភិបាលវៀតណាម “បានព្យាយាមធ្វើអ្វីៗគ្រប់យ៉ាងទាំងអស់ដែលអាចធ្វើទៅបាន ដើម្បីឆ្លើយតបទៅតាមតម្រូវការរបស់គណៈប្រតិភូអ.ស.ប នៅក្នុងអំឡុងដំណើរទស្សនកិច្ចនៅវៀតណាមនេះ”។
លោក Bielefeldt បានឲ្យដឹង នៅថ្ងៃព្រហស្បតិ៍នេះថា ថ្វីដ្បិតតែដំណើរទស្សនកិច្ចរបស់លោកត្រូវទទួលការរំខានច្រើន ដែលធ្វើឲ្យលោកមិនអាចវាយតម្លៃទៅលើករណីនីមួយៗឲ្យបានពេញលេញ ក៏ប៉ុន្តែ លោកអាចធ្វើការសន្និដ្ឋានបានជារួមថា ថ្វីដ្បិតតែលោកសង្កេតឃើញមានការវិវឌ្ឍជាវិជ្ជមានខ្លះៗ ក៏ប៉ុន្តែ “ការរំលោភដ៏ធ្ងន់ធ្ងរទៅលើសិទ្ធិសេរីភាពខាងជំនឿសាសនាកំពុងបន្តកើតមាន នៅក្នុងប្រទេសវៀតណាម”។
លោក Bielefeldt បានលើកឡើងថា ករណីរំលោភសិទ្ធិដែលលោកបានរកឃើញ តាមរយៈការសាកសួរសាក្សី គឺរួមមាន ដូចជា “ករណីអ្នកគោរពសាសនាមួយចំនួនត្រូវបានប៉ូលិសកោះហៅទៅសាកសួរជាញឹកញាប់ ឬក៏ត្រូវតាមយាយីរំខាន ចាប់ឃុំនៅក្នុងផ្ទះ ឬនៅក្នុងមន្ទីរឃុំឃាំង ការបំផ្លិចបំផ្លាញទីកន្លែងគោរពសាសនា” ។ល។ និង ។ល។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ